To a tamne (09.05.23)
Zhromadnje z konjom do tramwajki zalězł je muž w Stuttgarće. Na wjacorych widejach je widźeć, kak muž z cowboyjowym kłobukom a běłym lacom hač na nastupnišćo přijěcha. Tam wón z konja zalěze a zwěrjo při hłowojcy do tramwajki wjedźeše. Kuriozna scena je so njedźelu rano w Fellbachu sewjernje Stuttgarta wothrawała. Pječa pak je muž z konjom hnydom zaso wulězł, po tym zo běchu ludźo scenu ze šmóratkom nahrawali.
Hobersku słomjanu wutrobu je winicar w Stuttgarće swojimaj dźowkomaj wěnował. Na naddimensionalnej wutrobje stej mjenje Lotte a Ida čitajomnej. Wutroba njeje jenož wuznaće lubosće nana k dźowkomaj w starobje dweju a dźewjeć lět, ale je tež cyle praktiski srědk přećiwo zesuwanju zemje na nahłej skłoninje. Muž produkuje na swojim „Małym kuble“ wot lěta 2020 přirodne wino.
Nabožina dźensa (08.05.23)
Drježdźany (dpa/SN). Nazymu 2021 załožena Židowska kultusowa wosada Drježdźany je mjeztym wo nimale dwě třećinje rostła. „Mamy wokomiknje něhdźe 200 čłonow“, rjekny rabi Akiva Weingarten w zwisku z připrawjenjom Dawidoweje hwězdy kónc apryla na wonkownej sćěnje domicila. W měsće su mnozy židźa, kotřiž do toho žanej wosadźe přisłušeli njejsu a su pola nich domiznu našli. „Studowacy, Israelića abo tež němscy židźa“. Ze starobnym přerězkom 28 lět je kultusowa wosada nimo toho młode zhromadźenstwo.
Dawidowu hwězdu je po słowach Weingartena Drježdźanska gratytwarska firma z drohowocla zhotowiła. Jako přewšo rědki mjenowaše rabi fakt, zo je „ultraortodoksny rabiner“ připrawił zdobom mesusu, kapslu spisow z tekstami, na pergamenće z biblije.
Rěčna podpěra za „žiwu serbsku dušu“ Wojerec
Přezcyłne sposrědkowanje serbšćiny wot pěstowarnje hač do matury we Wojerecach - tute žadanje běše najwažniša tema na posedźenju parlamentariskeje přirady Załožby za serbski lud w měsće.
Wojerecy (SN/mb). We wšěch wjesnych dźělach Wojerec nimo Hórnikec poskićuja dźěćom we Witaj-skupinach žiwu serbšćinu. Po pěstowarni móža na zakładnej šuli „Handrij Zejler“ po koncepće „2plus“ abo jako cuzu rěč serbšćinu wuknyć. Za přichodne šulske lěto je samo wjace přizjewjenjow hač městna k dispoziciji steja, tohodla je dalša wučerka serbšćiny njeparujomna, tak županka župy „Handrij Zejler“ Wojerecy, Gabriela Linakowa, w rozprawje parlamentariskej přiradźe zašły pjatk we Wojerowskim domje Domowiny. Tola z wuwučowanjom serbšćiny na dale wjeducych šulach klaca.
Kretschmer w New Yorku pobył
Policija w Londonje kritizowana
London (dpa/SN). Policija britiskeje stolicy dyrbi so po krónowanskej ceremoniji Charlesa III. hrubeho postupowanja přećiwo demonstrantam dla zamołwić. Tole je předsydka přisłušneho wuběrka parlamenta Caroline Russel rozhłosownikam připowědźiła. Temu chcedźa na dnjowy porjad sadźić, politikarka britiskich Zelenych zdźěli. Za čas krónowanskeje ceremonije je policija dźesatki přećiwnikow monarchije a škitarjow klimy w stolicy na zdźěla hrube wašnje zajała.
Wažny móst rozbuchnjeny
Lüdenscheid (dpa/SN). Tysacy ludźi su rozbuchnjenje dotrjebaneho mosta awtodróhi A 45 w Sewjerorynsko-Westfalskej w Lündenscheidće wobkedźbowali a woswjećili. 17 000 tonow ćežka a hač do 70 metrow wysoka twarska konstrukcija na za Němsku jara wažnej awtodróze je so z pomocu 150 kilogramow rozbuchliny wčera w běhu někotrych sekundow zwjezła. Zwjazkowy wobchadny minister Volker Wissing (FDP) a toho krajny kolega Oliver Krischer (Zeleni) staj rozbuchnjenje wobkedźbowałoj.
Erdoğan: Wužadar je „žlokanc“
Historiski to wokomik: Prěni króć smědźeštaj britiski kral ...
Wuswobodźenje wopominali
Podstupim/Berlin (dpa/SN). Braniborski krajny sejm je dźens wuswobodźenje wot nacionalsocializma a kónc Druheje swětoweje wójny před 78 lětami wopominał. K tomu su ministerski prezident Dietmar Woidke (SPD), prezidentka krajneho sejma Ulrike Liedtke a pólski wulkopósłanc Dariusz Pawlos w nutřkownym dworje krajneho sejma porěčeli. Tež w mnohich komunach su na centralnych zarjadowanjach wěncy kładli.
Srjedźišćo wopominanskich zarjadowanjow bě tež lětsa zaso Berlin. Policija je so hižo zwoprědka na mylenja a rozestajenja nastajiła a wjace hač 1 500 zastojnikow zasadźiła. Do toho bě zarjadniske sudnistwo stolicy minjeny tydźeń postajeny zakaz ukrainskich chorhojow zběhnyło. Zamołwići z tym ličachu, zo dóńdźe wójny w Ukrainje dla k rozestajenjam mjez přiwisnikami a přećiwnikami Ruskeje.
Serbiski minister wotstupił
Dalše ruske nadpady na Ukrainu
Kijew/Odessa (dpa/SN). Ukraina je dźensa wo dalšich ruskich nadpadach we wjacorych dźělach Ukrainy rozprawjała, mjez druhim w stolicy Kijewje. Tam je so při nócnym wobtřělenju znajmjeńša pjeć ludźi zraniło, měšćanosta Witalij Kličko rozprawja. Dźěle trutow su na bydlenski dom padnyli. Po informacijach wojerskeho zarjadnistwa stolicy su 30 njewobsadźenych lětacych objektow wottřělili. Tež w Odessy rěča wo ruskich nadpadach z raketami. Tam je so skład žiwidłow zapalił, zamołwići zdźěleja.
W bliskim času wočakowana ofensiwa ukrainskeho wójska k wróćozdobyću wobsadźenych kónčin zawinuje w ruskim wojerskim rozkaznistwje přiběrajcy paniku, rjekny zastupowacy zakitowanski minister Wolodymyr Hawrylow. Krjeml z tym liči, zo Rusojo poněčim rozměr ruskich stratow w Ukrainje spóznawaja. „Njemóžeš swojich wobydlerjow lěta dołho zjebać. Njemóžeš smjerć syna, mandźelskeho abo bratra schować.“ Za to dyrbi Moskwa prjedy abo pozdźišo konsekwency před swojim ludom přewzać.
Kraje zwyšeja ćišć na Berlin
Nutřkowni ministrojo krajow žadaja sej wjace pomocy ćěkancow dla
Berlin (dpa/SN). Do planowaneho wjerškoweho zetkanja zastupnikow Zwjazka a zwjazkowych krajow k politice ćěkancam napřećo zajutřišim, srjedu, su ministerscy prezidenća krajow swoje žadanje za lěpšej pjenježnej podpěru ze stron Zwjazka potwjerdźili. „Stronske mjezy přesahujo je so 16 krajow na to dojednało, zo měli sej Zwjazk a kraje nastawace kóšty dźělić, znajmjeńša 50:50“, rjekny sewjerorynsko-westfalski ministerski prezident Hendrik Wüst (CDU) Düsseldorfskim nowinarjam.
