Praha (ČŽ/K). Industrijna produkcija rosće w Čěskej kaž hewak nihdźe w Europskej uniji. W awgusće přiby wona porno julijej, jako bě hižo 3,3 procenty wučinjała, wo 5,8 procentow. Wotpowědne daty wozjewi Čěski statistiski zarjad (ČSÚ). Po tydźenjach dowola w juliju je přemysło w awgusće z połnej paru dźěłać móhło. Analytikarjo pokazuja na to, zo su k wurjadnemu hospodarskemu wuslědkej předewšěm přinošowali produkcija kaž tež wotbytk miliny, płuna a klimatizowaneho powětra. ČSÚ zdobom zwěsća, zo je w spomnjenym času produkcija pola łódźow, lokomotiwow, lětadłow a kolesow wo dźesać procentow spadnyła. Za to je so twarstwo zhrabać móhło. W zawodach industrije z wjace hač 50 sobudźěłaćerjemi je so ličba dźěławych w awgusće wo 1,9 procentow rozšěriła. W nich zwyši so přerězna měsačna mzda porno lońšemu lětu wo 7,5 procentow..

W Pólskej wěnuja so skónčnje jebarskemu wobohaćenju

Waršawa. Pady reprewatizacije Pólsku tuchwilu chětro zaběraja. Zjaw je jedyn wuskutk Druheje swětoweje wójny, kotraž njeje sej jenož wjele woporow w ludnosći žadała, ale tež tójšto ruinow zawostajiła. Pólski stat bě po wójnje z dekretami spytał wšitko zrjadować. Hłowny stołp změnow bě cyłkowne zestat- njenje, k čemuž słušachu mjez druhim ležownosće a twarjenja. Priwatnosć njeje hižo eksistowała. Hakle ze změnu po lěće 1989 počinaše přestrukturowanje. Takrjec kóždy, kotremuž bě do zestatnjenja ležownosć abo twarjenje słušało, móžeše je wróćo dóstać. Přizjewili pak njejsu so jenož mějićeljo abo jich namrěwcy, ale kaž so dale a bóle wujewja tež tójšto wobšudnikow. Z pomocu swojich překle­panych prawiznikow su puće našli so z imo­bilijemi wobohaćić. Zakonje, kotrež repriwatizaciju w Pólskej rjaduja, dźě tam tak prawje nimaja. Tuž móžachu so wobšudnicy aktiwnje posłužować. Ze zdźěla jara drastiskimi metodami spytachu potom wobydlerjow z bydlenjow wuhnać. Na přikład zwyšichu wjacekróć podruž bydlenjow.

Běłohród (ČŽ/K/SN). W Běłohrodźe je so sobotu po 95 lětach zaso jónu kralowski kwas swjećił. W katedrali swjateho arcyjandźela Michała zwěrowa hłowa prawosławneje cyrkwje kraja, patriarch Irinej, 35lětneho serbiskeho princa Filipa Karađjorđjevića z 31lětnej wuměłču Danicu Marinković, dźowku wuznamneho serbiskeho molerja. Na wurjadnym podawku wobdźělichu so mnozy přisłušnicy europskich kralowskich dworow. Nawoženja Filip je jedyn z třoch synow serbiskeho krónoweho princa Alexandra Karađjorđjevića a princesny Marie da Glória d’Orléans-Bragance, přiwuzneje španiskeho krala Juana Carlosa. Nan Filipa a tuchwilny naslědnik njeeksistowaceho serbiskeho tróna bě so z dowolnosću serbiskeho knježerstwa ze swójbu lěta 2002 do domizny nawróćił. Narodźił je so wón 1945 w Londonje. W britiskej stolicy bě kral Peter I. po nadpadźe hitlerskeje Němskeje 1941 na Juhosłowjansku wućek pytał. Po Druhej swětowej wójnje je Titowe komunistiske knježerstwo monarchiju wotstroniło. Kwasna hosćina je so wulkotnje w kralowskim hrodźe Beli Dvor wotměła.

WJETŠINA čěskich dźěći, cyłkownje 66 procentow – najwjace w rjedźe krajow – skutkuje we wólnym času w najwšelakorišich kružkach. Tole zwěsća agentura IPSOS, kotraž je staw w tymle nastupanju zdobom w Słowakskej, Bołharskej a Pólskej přepytowała. W Słowakskej zaběra so w kružkach runje połojca dźěćiny, w tamnymaj krajomaj hišće mjenje. W Čěskej wšak starši swoje dźěći po šuli do zajimawych kružkow sćelu. Najwjace z nich je přeswědčenych, zo su kružki wažny wobstatk kubłanja a zdźěłowanja. Eksperća maja bjeztoho za to, zo hraje zaběra w kružkach wuznamnu rólu při formowanju wosobiny. Najpopularniše su sportowe a wuměłstwowe kružki, na přikład hudźbne, tworićelske, rěčne a dźiwadłowe. Hudźbne a druhe muziske skutkowanje poskićeja zakładne wuměłstwowe šule. Aktiwity w kružkach zmóžnjeja tež mnohe šulske kubłanišća, dźěćace a młodźinske domy a nimale dwě třećinje pěstowarnjow. Kružki tam słuža hłownje tomu, wuknyć cuze rěče abo hrać na pišćałce resp. hajić ludowe reje. W pěstowarnjach je wobdźělenje darmotne, šule zběraja zwjetša skromny přinošk.