Praha (ČŽ/K). W Praze zemrě sobotu po ćežkej chorosći kardinal Miloslav Vlk. Praski arcybiskop a wuski přećel njeboćičkeho, kardinal Dominik Duka, rjekny, do wěčneho kralestwa je wotešoł „wobnowjer čěskeje katolskeje cyrkwje“. 18 lět bě Vlk jeje hłowa, tak jako předsyda Českeje biskopskeje konferency. Miloslav Vlk, 17. meje 1932 w juhočěskej wsy Lišnice rodźeny, njesmědźeše na studij a je po maturje 1952 tuž w tworni dźěłał. Po wojerskej słužbje móžeše archiwarstwo studować. 1968 bu na duchowneho wu­swjećeny a je w mjeńšich wosadach skutkował. Dźesać lět pozdźišo jemu komunistiski režim kritiskeho nastajenja dla dowolnosć wotezna. W stolicy žiwješe so na to z myćom woknow, a naslědnje bě w statnej bance archiwar. Skradźu je w mjeńšich skupinach wěriwych tež fararił. Po tym zo bě režim jemu w januaru 1989 dowolnosć wróćił, sta so Vlk spočatk 90tych lět z biskopom w Českich Budějovicach­ a 1991 z Praskim arcybiskopom. Prezident Václav Havel spožči jemu lěta 2002 za wurjadne zasłužby Rjad Tomáša G. Masaryka.

Poćah mjez Pólskej a Europskej uniju so dale pohubjeńša

Šef knježaceje strony PiS w Pólskej Jarosław Kaczyński je bjez wuspěcha přećiwo swojemu njepřećelej Donaldej Tuskej wojował a přećiwneho kandidata za zastojnstwo prezidenta rady Europskeje unije namjetował. Zwrěšćenje wón jeno ćežko akceptuje.

Waršawa/Brüssel (dpa/SN). Jarosław Kaczyński je podarmo noweho kandidata za zastojnstwo prezidenta Europskeje unije namjetował. 27 z cyłkownje 28 čłonow EU rozsudźi so za stareho a noweho prezidenta Donalda Tuska.

Medije susodneho kraja komentuja wustupowanje Pólskeje w Europje jako „politiske fiasko“ a „kompletnu blamažu“. Fachowcy rěča samo wo „diplomatiskej katastrofje“. Tež ludnosć swoje měnjenja w internetnych socialnych syćach rozšěrja. „Smy so w Europje kompromitěrowali“, tam něchtó pisa.

Praha (ČŽ/K). Čěska socialdemokratiska strona ČSSD je w morawskej stolicy Brnje swój stronski zjězd wotměła. Wuznamny je wón za nju předewšěm tohodla był, zo su na dnjowym porjedźe stali wólby předsydstwa a k tomu nowy dlěšodobny program. Kaž wočakowane, su dotalnemu předsydźe ČSSD Bohuslavej Sobotce zastojnstwo znowa dowěrili. Wón dósta dwě třećinje hłosow – 460 delegatow wupraji so za njeho, 201 přećiwo njemu. Sobotka­ rjekny: „Sym spokojom.“ Před lětomaj bě nětčiši ministerski prezident hišće 85 procentow přihłosowanja delegatow nažnjał. Za jeho prěnjeho naměstnika wuzwolichu přitomni nutřkowneho ministra Milana Chovaneca.

NAWOČI su w susodnym kraju zawěrno požadany artikl. Dobre štyri miliardy krónow měješe wóčna optika loni wobrota. Wot něhdźe lěta 2010 sem su optikarjo kóžde lěto štyri hač do šěsć procentow wjace nawočow předali. Na přehladce Opta w Brnje zdźěli tole nowinarjam čłon předsydstwa Zjednoćenstwa čěskich optikarjow a optometristow Ivan Vymyslický. Po jeho sudźenju ke konjunkturje na brylowych wikach předewšěm přinošuje wobstejnosć, zo ličba staršich ludźi njepřestajnje rosće. Ći sej z přiběracymi financnymi móžnosćemi časćišo nowe nawoči popřewaja a hladaja k tomu tež hišće na lěpšu kwalitu. Dalši pozitiwny faktor móhł być, zo nałožuja firmy wjace pjenjez za kwalifikaciju sobudźěłaćerjow a wšelakore jich kubłanja kaž tež za marketing. Wukrajne discountery kaž němski Fielmann njejsu so na čěskich wikach přesadźić móhli. Te wobknježa syće čěskich mějićelow. Najwjetšej syći matej firmje Fokus Optik a Eiffel Optik, kóžda z 90 předawarnjemi po cyłym kraju.