Medije: Pólska policija čušli
Politikarjow opozicije a wobydlerskich aktiwistow wobkedźbowała
Waršawa (dpa/SN). Pólska policija je po informacijach medijow za čas protestow přećiwo dwělomnej justicnej reformje narodnokonserwatiwneho knježerstwa politikarjow opozicije a aktiwistow wobkedźbowała. Nowina Gazeta Wyborcza wozjewi wčera protokol policajskeho škričkoweho kanala, kotryž bě wot anonymneho informanta dóstała. „Knjez Petru je runje z hosćenca na hasy Wiejska 13 přišoł. Nětko so prašam, hač mamy jeho dale wobkedźować“, tam mjez druhim rěka. Zapósłanc pólskeho sejma Ryszard Petru je jedyn z nawodow opozicije přećiwo knježerstwu strony Prawo a sprawnosć (PiS). Nahrawanje pochadźa z 21. julija, jako debatowaše senat wo zakonju, z kotrymž měješe so najwyše sudnistwo kraja znowa rjadować.
Wobkedźbowała je policija po tutej rozprawje tež Wojciecha Kinasiewicza a Tadeusza Jakrzewskeho wot wobydlerskeho hibanja Obywatele RP. Čušlenje traje hižo wjacore měsacy, wonaj nowinarjam rjeknyštaj.
Wěstotne mocy wulce nahladne
POLICIJA w Čěskej smě so zawěrno wjeselić – dobreho mjena mjez ludźimi dla. Wuchadźa dźě z wotpowědneho woprašowanja zwěsćowarnje měnjenjow STEM, zo 65 procentow wobydlerjow policiji dowěrja. Tak wulki njebě podźěl w minjenych 25 lětach hišće nihdy. Lěta 2002, jako je so STEM w tejle naležnosći prěni raz wobhonjała, wučinješe kwota 46 procentow. Najniša bě wona 1997 z jeničce 27 procentami „Daty ze zažnych 90tych lět přeradźeja, zo njeje za policiju po změnje režima 1989 lochko było ludźi wo swojej dowěryhódnosći přeswědčić“, prawiznicy agentury hódnoća. Po jich analyzy je minjeny čas dowěra do policije wosebje mjez ludźimi, staršimi hač 60 lět, a wobydlerjemi z nišim kubłanjom chětro přibyła. Wot poslednjeho zwěsćowanja je nahladnosć policije cyłkownje wo štyri procenty zrostła. „Smě so za to měć, zo tuchwilny staw policije zjawnosć tež tohodla pozitiwnje hódnoći, dokelž njeje mjez njej wuraznych aferow. A najskerje wotbłyšćuje so w tym žedźba za zwyšenej prezencu wěstotnych słužbow dźiwajo na migracisku krizu“ prawiznicy STEM komentuja. Na justicu so porno tomu křiwje hlada.
Čěska chromi dale za zapadom
„Wobraz Europy změnili“
Wopyt princowskeho porika z Londona w Pólskej wulki podawk był
Waršawa. Z wulkim zajimom a jara na- drobnje su w Pólskej wopyt princowskeho porika z Wulkeje Britaniskeje sćěhowali. Wšako bě wizita princa Williama a jeho mandźelskeje Kate spočatk tydźenja po prezidenće USA Donaldźe Trumpje hižo druha politiska atrakcija w běhu krótkeho časa. Krajanam je wopyt tež politisce wulce wuznamny: We Wulkej Britaniskej bydlitej a dźěłatej mjeztym dwaj milionaj Polakow, najwjetša skupina wukrajnikow to na kupje. Tući so hladajo na planowany wustup kraja z Europskeje unije starosća, hač móža tam wostać. Bjezposrědnje po ludowym rozsudźe wo brexiće bě w Jendźelskej k wjacorym njeluboznym nacionalistiskim akcijam a k antipólskim móranjam dóšło. Wšo to bě w Pólskej starosće zbudźiło.
Wo młodych a wo starych
NJEDOWĚRA staršich ludźi napřećo młodej generaciji je w Čěskej přeco hišće wulka. Něhdźe połojca dorosćenych nad 30 sej mysli, zo młodźi ludźo jeno za lěpšinami hladaja. Přibližnje połojca staršich dorosćenych drje młodej generaciji tež dobroćelske skutkowanje přicpěwa, ale jeničce swójskeho wužitka dla a skerje njedobrowólnje. Tajke nahlady zwěsći přepytowanje agentury Ipsos za młodźinu podpěracu Załožbu 02. Tak nic mjenje hač 79 procentow respondentow nad 30 lětami měni, zo młodźi najradšo w kompjuteru surfuja a z hrami so zabawjeja resp. w socialnych syćach za něčim rozbudźacym pytaja.
Praha a Waršawa so wobaratej
Zwada mjez EU a Čěskej a Pólskej wo přiwzaće ćěkancow dale traje
Praha (dpa/SN). Pólska a Čěska wumjetujetej w zwadźe wo přiwzaće ćěkancow Italskej a Grjekskej, zo njejstej k zhromadnemu dźěłu zwólniwej. W tymaj krajomaj „njeje tuchwilu nichtó, kiž by wuměnjenja za přesydlenje spjelnił“, rjekny čěski nutřkowny minister Milan Chovanec. „Kóždyžkuli poskitk Čěskeje, ćěkancow přiwzać, je tuž zbytny.“
Komisija Europskeje unije bě formelne jednanja přećiwo Pólskej, Čěskej a Madźarskej zahajiła, dokelž kraje kwoty EU nastupajo přiwzaće ćěkancow z Italskeje a Grjekskeje njespjelnjeja. Tři čłonske kraje EU mějachu hač do dźensnišeho chwile swoju poziciju wopodstatnić. Po planach EU dyrbjała Čěska 2 600 ćěkancow přiwzać, Pólska 6 100. Wobaj krajej wumjetowanja EU wotpokazujetej.
ANO dale prědku
Praha (ČŽ/K/SN). Połoženje do wólbow čěskeho sejma w oktobru njeje so minjeny měsac wulce změniło, wuchadźa z woprašowanja agentury STEM. Hibanje ANO něhdyšeho financneho ministra Andreja Babiša steji z 32,9 procentami dale samotnje na čole. Z njecyłej połojcu, dokładnje 14,3 procentami, sćěhuja komunisća na druhim městnje, polěpšiwši so porno meji wo 1,6 dypkow. ČSSD premiera Bohuslava Sobotki je po měsacach stajneho spadowanja z reakcije na zapletki ekspředsydy Sobotki přećiwo Babišej prěni raz zaso porostła a přińdźe z plusom 1,9 dypkow na 9,1 procent, zwostawajo wšak dale za KSČM. Porno tomu njemóža wobydlerscy demokraća spad zadźeržeć – porno róžownikej je ODS z 9,6 procentow zjěła na 9,1 procent. Do sejma zaćahnyłoj byštej hišće KDU-ČSL a TOP 09, dóstawši 6,7 resp. 6,2 procentaj.
Słowakski dźenik SME wo sćěhach tajkeho wuslědka měni: „Demokratiske strony w Čěskej njezměja so po přichodnych wólbach lochko. Dwě móžnosći so jim skićitej – pak so swojeho programa wzdać a přećiwo ANO Andreja Babiša koalěrować, abo z nim hromadźe dźěłać.“
Wšelakorosć dopokazana
Wěriwosć Čechow wuwzaće
Za wěriwosću ludźi do Boha a jich identifikaciju z nabožinu je so mjezynarodna agentura Pew Research Center wobhonjała we 18 krajach srjedźneje a wuchodneje Europy a při tym přewšo zajimawe wuslědki nazběrała. Čěski dźenik Mladá fronta dnes žně tohole njewšědneho zwěsćowanja wobšěrnje referuje a pohódnoćenje swójskeho kraja přez awtorow studije takle cituje: „W něhdyšim wuchodnym bloku, kotryž bě w 20. lětstotku dołho wobknježił ateistiski Sowjetski zwjazk, je Čěska republika nastupajo aspekty woprašowanja najwjetše wuwzaće.“ Z čimž woni zawěrno ani kuska njepřehnawaja.
Pólske medije: Naš Donald
Prezident USA na wopyće we Waršawje euforisce witany
Waršawa. Prezident USA Donald Trump je dźensa na oficialnym wopyće w Pólskej był, po tym zo bě wčera wječor do stolicy Waršawy dolećał. Tam jeho statny prezident Andrzej Duda z wojerskej ceremoniju witaše. Nimo toho zetka so Trump z prezidentami dwanaće wuchodoeuropskich krajow, kotřiž so runje dźensa we Waršawje schadźuja. W tym zwisku zdźělichu, zo chcedźa USA Pólskej lětadła a rakety wotwobaracy system typa Patriot dodawać.
