Kanclerski kandidat unije na róčnicy zběžka 1944 we Waršawje był

Waršawa (dpa/SN). Kanclerski kandidat CDU/CSU Armin Laschet je wčera w pólskej stolicy składnostnje 77. róčnicy zahajenja Waršawskeho zběžka wopory nacionalsocialistiskeje okupacije wopominał. „To je cyle wosebite městno na cyle wosebitym dnju, kotryž pokazuje njepředstajomne surowosće Němcow“, rjekny wón wčera na wopyće w muzeju, kiž je zběžkej wěnowany, před sćěnu z mjenami tysacow padnjenych wojowarjow.

„Móžemy jeno ze stawiznow wuknyć, zo bychmy tomu zadźěwali, zo so tajke něšto znowa stanje“, rjekny ministerski prezident Sewjerorynsko-Westfalskeje. Muzej, kotryž běchu w lěće 2004 wote­wrěli, je „městnosć, europskeje kultury wopominanja“. Bywši pólski statny prezident Lech Kaczyński (1949–2010) bě załoženje muzeja swój čas nastorčił.

Praha (ČŽ/K/SN). Po njewjedrach, wichorach a tornadu, kotrež su w juniju a juliju we wšelkich dźělach kraja zachadźeli, bu zawěsćernjam 34 000 škodow přizjewjene, kotrež wučinjeja 4,7 miliardow krónow (přibližnje 185 milionow eurow). Trochowane wot ekspertow wšak je 39 500 škodow, wučinjace hódnotu 5,4 miliardow krónow (ca. 217 milionow eurow). To je nětko powěsćernja čtk wozjewiła, publikujo wotpowědne informacije Asociacije čěskich zawěsćernjow.

Z wonych registrowanych zawěsćenskich padow je mjeztym 45 proc. z nich zrjadowane. Nastupajo zawěsćenje twarjenjow ludźi je dotal 65 procentow wobstarane. Wobydlerjam su zawěsćernje nastate škody donětka ze 763 milionami krónow zarunali, firmownikam z 271 milionami krónow. Wobydlerjo poćer­pichu w přerězku škody we wysokosći 75 000 krónow, firmownicy porno tomu we wysokosći 380 000 krónow. W padźe tornada, kiž bě na južnej Morawje mjez Hodoninom a Břeclavu jědnaće wsow zapusćił, mjez nimi sydlišćo Lužice (Łužica), nasta po trochowanju ekspertow 11 200 škodow wot něhdźe 3,4 miliardy krónow. Zawěsćernjam přizjewjene je dotal hakle 8 500 škodow.

Praha (ČŽ/K/SN). Mjez krajemi Visegrádskeje štyrki steji Čěska republika nastupajo přerěznu měsačnu bruttomzdu z 1 368 eurami na čole. W Pólskej wučinja wona 1 331 eurow, w Madźarskej 1 147 eurow a w Słowakskej 1 113 eurow. To konstatuja čěske nowiny na zakładźe wotpowědneje studije poradźowanskeje towaršnosće Mazars. W Brüsselu sydlaca instanca je w 21 krajach srjedźneje, wuchodneje a južneje Europy přepytowała, kak wysoka je w nich přerězna měsačna brutto­mzda. Najwyša je wona po spomnjenej studiji z 3 978 eurami w Němskej, kotrejž sćěhuje Awstriska z 3 106 eurami. Na poslednim městnje steji z najnišej přerěznej bruttomzdu Kosowo, hdźež wona runje 400 eurow wučinja. A z 432 eurami wona w Ukrainje rěčehódnje wyša njeje.

Z woneje studije zdobom wuchadźa, zo bjeru dawki a druhe popłatki dźěławym wot bruttomzdy přerěznje 15 procentow. Mjez jednotliwymi krajemi su wšak njemałe rozdźěle. Mjeztym zo w Rumunskej „wotedawki“ ani pjeć procentow njewučinjeja, „spóžěraja“ wone w Němskej dźěławemu něhdźe połojcu bruttoweje zasłužby. W Čěskej přińdźe dźěławy wo 33,8 procentow bruttomzdy, w Słowakskej wo 35,2 procentaj.

Marek Krawc rozprawja wo aktualnje rozjimanych temach w Čěskej

Praha. Ryby móža so wot drogow, kaž je to crystal meth, wotwisne stać, to zwěsćichu čěscy wědomostnicy. Tele w susodnym kraju jako pervitín znate wopojadło produkuja a konsumuja tam we wulkich mnóstwach. Zbytki wopojnych jědow, lěkow a dalšich chemikalijow namakaja swój puć přez wopłokowanske připrawy do připrawjernjow wody a wottam do čěskich rěkow a rěčkow. Ryby a dalše wódne žiwochi su tajkim jědojtym maći­znam wustajene a wot nich počasu samo wotwisne, kaž studija Čěskeje agrarneje uniwersity wujewja. Wosebje pola pstruhow su biologojo mylenja w zadźerženju wobkedźbowali. Ryby njemóža ani porjadnje žrać ani so na njepřihódne wuměnjenja w swojim žiwjenskim rumje nastajić.