Praha (ČŽ/K/SN). Zakładnych družin žita nažnjachu čěscy ratarjo lětsa wosom procentow wjace hač loni, tak zo je wunošk na 6,988 milionow tonow rozrostł. To wuchadźa z datow Čěskeho statistiskeho zarjada. Po wudawanju Agrarneje komory Čěskeje republiki orientuja so burja suchoty dla přiběrajcy na nazymske družiny. Jenož rěpika su lětsa 15,5 procentow mjenje domchowali hač loni, namłóćiwši 1,194 mio. tonow. Pola maka wočakuja wuslědk něhdźe 24 000 tonow, štož je dwójce telko kaž lěta 2018. Nahladny přibytk wšak ratarjo docpěchu, zo plahowachu mak na wjele wjetšej płoninje hač zašłe lěta, lubjo sej z podróšeneho maka wyše dochody. Lětuše wunoški trejdy hódnoći Agrarna komora ČR cyłkownje jako přerězne. Pola nalětnjeje pšeńcy wučinja pak minus porno zašłym lětam 40 procentow. Nawodny sobudźěłaćer Agrarneje komory ČR Jan Doležal buram tuž poruča přeńć dale bóle k nazymskemu wusywej. Porosty zamóža nazymsku a zymsku włóžnotu lěpje zwužitkować, kotrejež je porno nalětnjej stajnje dosć. Stabilne wunoški ječmjenja su nic naposledk w zajimje piwarnjow a słodarnjow.

Waršawa sadźa debatu wo wójnskim wotškódnjenju na dnjowy porjad

Waršawa (dpa/SN). Krótko do 80. róčnicy wudyrjenja Druheje swětoweje wójny Pólska skorži, zo měješe při wupłaćenju reparacijow jasne njelěpšiny. Pólski wonkowny minister Jacek Czaputowicz rjekny w rozmołwje z powěsćernju dpa, zo je při wotškódnjenju wot Němskeje nadpadnjenych krajow „pobrachowaceje zasadneje fairnosće“ było. Pólska bu w tym procesu diskriminowana.“

Byrnjež Pólska wosebje jara pod nadpadami a okupaciju nacijoweho režima ćerpjeć dyrbjała, bě jeje podźěl na wotškódnjenjach „minimalny“. „Su kraje, kotrež běchu wo wjele mjenje zhubili, su pak wo wjele wjace kompensacije dóstali. Je to w porjadku?“, so Czaputowicz praša. „Centralne prašenje je, hač su z Pólskej přirunujo z druhimi krajemi fairnje wobchadźeli.“ Wuraznje mjenowaše wón Francosku a Nižozemsku.

Kijew (ČŽ/K/SN). Ukrainski prezident Wolodimir Zelenskij postaji zjednorić pro­­ceduru, kotraž je trěbna spožčić ukrainske staćanstwo ruskim wobydlerjam, přesćěhanym doma politiskeho přeswědčenja dla. To z ukrainskeje stolicy zdźěla korespondent čěskeho dźenika Mladá fronta dnes. Knježerstwo ma nětko wotpowědny zakoń předpołožić. Postajenje prezidenta zdobom předwidźi, zo maja Rusojo, kotřiž ukrainske staćanstwo přiwozmu, ruskeho staćanstwa so wzdać.

Z TETOWĚROWANKU ruku, nohu abo někajki druhi dźěl ćěła „wupyšeny“ měć, přećiwo tomu wjetša połojca wobydlerjow Čěskeje ničo nima. Z nich sej jeničce pjećina mysli, zo móhli tetowěrowani problemy na dźěłowym městnje dóstać. Mjeztym wšak dobra třećina z nich wobžaruje, zo je so na tajke wašnje „wozdobić“ dała. Tak praja, zo su to z njezrałosće činili, mjenujcy krótko po docpěću połnolětnosće. Naprašowanje w tej naležnosći je w juliju agentura Behavio mjez 3 500 ludźimi přewjedła. „Časy su nimo, jako je tetowěrowanje towaršnostne stigma woznamjenjało a zadźěwk w karjerje było. Dźensniši dźeń maja to Češa za něšto dospołnje normalne, awtorojo studije zwěsćeja. Tetowěrowanje je w Čěskej w minjenych lětach wulke změny přešło. Předewšěm je so jeho kwalita zwyšiła. Kaž naprašowanje wujewja, sej ludźo najčasćišo na ćěło najwšelakoriše přirodne motiwy, tajke a hinaše ornamenty abo napisy „narysować“ dadźa. Njemało prašanych (50 procentow) při­wšěm měni, zo so k někotrym powołanjam widźomne tetowěrowanki njehodźa, na přikład lěkarjam abo prawiznikam.