Nowu legislaturnu dobu zahajiła
Łaz (AK/SN). Na swojim posedźenju wutoru je nowowolena gmejnska rada we Łazu swoje dźěło zahajiła. Thomas Leberecht (CDU) je radźićelow na konstituowacym posedźenju spřisahał.
Wjesnjanosta rozłožowaše ćežišća noweje legislaturneje periody. Wosebje spěšnje chce gmejna ze saněrowanjom hłowneho wjesneho puća pokročować. Nimo toho chce štyri pěstowarnje w gmejnje zdźeržeć a modernizować. Su to pěstowarnje „Raj bajkow“ we Łazu, „Łučlane palčiki“ w Šćeńcy, „Sprjewine myški“ w Běłym Chołmcu a „Kraj kubołćikow“ we Wulkich Zdźarach. „We woprašowanju wobydlerjow su starši a kubłarjo jasnje signalizowali, zo dyrbi gmejna hladajo na Łazowsku pěstowarnju nuznje jednać“, wuzběhny Thomas Leberecht.
Wón podšmórny dale, „zo wočakuje gmejna wot lěta 2027 wosebite wužadanje“. Za kóžde dźěćo zakładneje šule we Wulkich Zdźarach dyrbi gmejna cyłodnjowske městno zaručić. „To žada sej wobšěrne planowanja a financne srědki, kotrež gmejna tuchwilu nima“, Leberecht praji. W zańdźenosći je gmejna po jeho měnjenju přemało aktiwna była. Wón pak so nadźija, zo so to w legislaturnej dobje 2024 do 2029 polěpši.
Wajchtar po měsće wodźił
Budyšin (MaK/SN). Po cyłej Němskej wotmě so njedźelu Dźeń wotewrjeneho pomnika. Město Biskopicy je na tutym dnju zdobom Dźeń wotewrjenych zadnich dworow kaž tež nazymske wiki na torhošću přewjedło.
Jako měšćanski wajchtar je Gottfried Brückner tójšto hosćom na swojim něhdźe połhodźinskim wodźenju po Biskopicach někotružkuli zajimawostku wotkrył. Při tym njezaby tež wuznamne wosobiny města, jich městnosć naroda kaž tež jich skutkowanje na dobro města naspomnić. Brückner je čestnohamtski čłon Domizniskeho a stawizniskeho towarstwa Biskopicy. Swoje wodźenje zakónči při jednym z wotewrjenych twarskich pomnikow města. Běše to tak mjenowana twjerdźizna „Fronfeste“, kotraž je najstarše twarjenje w Biskopicach. Wone je dźensa z nowotwarom hospicneho domu „Siloah“ zwjazane.
Sylny team na dobro čłowjeka
Paliatiwna stacija Wojerowskeho klinikuma jubilej woswjećiła
Wojerecy (AK/SN). Klinikum Łužiska jězorina we Wojerecach ma lětsa hižo w dźesatym lěće swójsku paliatiwnu staciju z fachowje specializowanym teamom lěkarjow, chorobnych sotrow a hladarjow, fyzio- a ergoterapeutow kaž tež dušepastyrjow. Na staciji je šěsć łožow, tuchwilu su štyri wobsadźene. „Njejsmy wšak smjertna stacija. Fokus našeho dźěła leži na wolóženju bolosćow. Chcemy polěpšenje za pacienta docpěć“, podšmórnje Jana Bansner, chorobna sotra „prěnjeje hodźiny“ na staciji na małym zeńdźenju składnostnje jubileja. Šeflěkar dr. Josef Neesa nawjeduje tuchwilu team z dohromady dźesać medicinskimi sobudźěłaćerjemi.
Krótkopowěsće (13.09.24)
Nowa protyka wušła
Budyšin. W Ludowym nakładnistwje Domowina je dypkownje ze spočatkom nazymy najnowši lětnik Serbskeje protyki wušoł. Protyka wěnuje so w praktiskej rubrice warjenju a receptam serbskeho kucharja Tomaša Lukaša, we hłownym dźělu pak jubilejomaj w Kamjencu a Chrósćicach. Dalše zajimawostki wjedu čitarjow mjez druhim do Lahnskeho doła abo „Běłeho kołpja“ w Šěrej dźěrje.
Warnuja před njewjedrom
Budyšin. Němska wjedrowa słužba warnuje ludźi w Budyskim a Zhorjelskim wokrjesu před sylnymi zliwkami. Wotpowědne warnowanje před njewjedrami płaći wot dźensa 9 hodź. hač do jutřišeho připołdnju w 12 hodź. Na dróhach, pod mostami a blisko wody móhła situacija strašna być. W Budyšinje je so zasadźenski stab zarjadował.
Stanisław Nawka nominowany
Policija (12.09.24)
Znateho z nožom nadběhował
Běła Woda. Njedźelu popołdnju zetka 34lětny muž na Měrowej w Běłej Wodźe 29lětneho znateho, kotryž běše ze swojej dwulětnej dźowku po puću. W rozmołwje so mužej na so roznjemdrištaj, rozeńdźeštej pak so, bjez wukonjenja namocy. Něšto časa po tym so 34lětny z nožom w ruce wróći a z nim do nana dźowki kałaše. Při tym jeho wjace króć zwjeršnje zrani. Nanej pak poradźi so, z njezranjenej holčku nadběhowarjej wućeknyć a policiju informować. Zastojnicy policije skućićela bórze po tym zajachu a to bjeze spjećowanja. W tesće kreje zwěsćichu mnóstwo alkohola z 1,48 promilow kaž tež dopokaz konopje. Muž je druheho njeskutka dla hižo předchłostany.
Knižna premjera w Radworju
Radwor. Serbski Institut přeprošuje na knižnu premjeru do Radworskeho Dwórnišća inkluzije, 13. septembra, we 18 hodź. Zastup je darmotny. Awtorka Karoline Brützel předstaji swoju knihu „Kulturelle Sicherheit in zweisprachigen Gemeinden“, w kotrejž je so z podawkami kołowokoło hrožaceho zawrjenja Serbskeje srjedźneje šule w Radworju w lěće 2005 zaběrała a tute wuhódnoćiła. Wona je absolwentka studija za socialnu naslědnosć a demografisku změnu na Fachowej wyšej šuli w Dortmundźe a dźěła tuchwilu w socialnym wobłuku.
Gmejnska rada we Worklecach
Worklecy. Wjesnjanosta Worklečanskeje gmejny Clemens Poldrack přeprošuje wutrobnje wšitkich zajimcow na zjawne posedźenje gmejnskeje rady, kotrež wotměje so srjedu, dnja 18. septembra we 18.30 hodź. w rjadowni čo. 10 na tamnišej šuli.
Wjesny a žnjenski swjedźeń
Kuriozny pućnik wotkrył
Ćežke njezbožo ze zranjenymi
Wupytaj sej swojeho faworita!
Budyšin (SN/lmc). Lětuša Europeada je nimo. Dohromady 24 muskich a 9 žónskich mustwow běše so na koparskim turněrje europskich narodnych mjeńšin wobdźěliło a sej do Flensburga a wokoliny blisko němsko-danskeje hranicy dojěło. Tež wulka ličba fanow serbskeju wubrankow běše tam po puću, zo bychu koparki a koparjow z „połnej paru“ podpěrali.
Radźićelej mandat cofnyłoj
Njebjelčanska gmejna ma tójšto nadawkow rjadować a při tym chutnje lutować
Njebjelčicy (JK/SN). Njeje znate, kotreho dypka dnjoweho porjada dla běše telko wobydlerjow na wčerawše posedźenje Njebjelčanskeje gmejnskeje rady přišło, ale chutny bě jedyn kaž druhi. Tež hdyž wola radźićelow jara sylna była, wjele naležnosćow w dobrym zmysle rjadować, je napjata situacija gmejny přiwšěm postajowacy element při rozsudach.
