Katastrofa a jeje konsekwency
Běła Woda (AK/SN). Lěsny woheń w meji 1992 pola Běłeje Wody bě jedna z najzahubnišich katastrofow zašłych lětdźesatkow we Łužicy. Tole podšmórny lěsnik a žurnalist Torsten Richter-Zippack z Wjelceje na njedawnym předstajenju swojeje 48stronskeje brošurki „Lěsny woheń – Katastrofa – Běła Woda 1992“. „Płomjenja zničichu tehdy dohromady 920 hektarow lěsa. Sčasami bě murja wohenja hač do wosom kilometrow dołha“, wón rozłoži. Dokładnje 1 034 wohnjowych wobornikow ze 198 jězdźidłami z cyłeje Němskeje je přećiwo płomjenjam wojowało. Jedyn wobornik při tym žiwjenje přisadźi.
Bjez nahłownika na mejemjetanje
Krótkopowěsće (30.05.17)
Erwin Sellering wotstupił
Schwerin. Ministerski prezident Mecklenburgsko-Předpomorskeje Erwin Sellering (SPD) je strowotniskich přičin dla wšitke zastojnstwa złožił. Tole zdźěla statna kenclija w Schwerinje. Přičina je dospołnje njejapcy zwěsćeny rak lymfowych žałzow. Za swoju naslědnicu je Sellering zwjazkowu swójbnu ministerku Manuelu Schwesig namjetował.
Dešć woheń zhašał
Choćebuz. Ćežke njewjedro je dźensa wulki woheń w Luboraskej holi sewjernje Choćebuza zhašało. To zdźěla braniborske nutřkowne ministerstwo. Sylne zliwki běchu płomjenja zhašeli. Woheń bě wčera na něhdyšim wojerskim zwučowanišću wudyrił a so spěšnje rozšěrił. Wobornicy pak njesmědźachu stareje municije dla na teren.
Thomas Tuchel woteńdźe
Dortmund. Borussia Dortmund je swojeho trenarja Thomasa Tuchela pušćiła. Jeničce tři dny po dobyću pokala DFB informowaše Tuchel dźensa přez Twitter wo kóncu zhromadneho dźěła z koparskim ligistom. „Sym dźakowny za dwě rjanej lěće połnej dožiwjenjow a rjanych podawkow. Škoda, zo to dale njeńdźe. Přeju klubej wšo dobre.“
Policija (30.05.17)
Bjez dowolnosće jězdźił
Budyšin. Na Drježdźanskej dróze w Budyšinje je policija njedźelu rano wosobowe awto typa Ford zadźeržała a jeho šofera kontrolowała. Zastojnikam 28lětny muž rjekny, zo žanu jězbnu dowolnosć nima. Při nadrobnišim přepytowanju so wukopa, zo njebě muž prěni raz bjez jězbneje dowolnosće z awtom po puću. Tak změje so nětko statne rěčnistwo z tymle padom zaběrać. Policisća sćazachu awtowy klučik a přepodachu jón wobsedźerce Forda. Hač je wona „čornojězdźenje“ dowoliła, ma so hišće přepytować.
Spominaja na zemrětych
Kamjenc. W kapałce Kamjenskeje chorownje maltezow swj. Jana wotměje so jutře, srjedu, w 16.30 hodź. wopomnjenska nutrnosć za wšitkich, kotřiž su wot februara hač do srjedź meje 2017 w chorowni zemrěli. Jich mjena chcedźa na nutrnosći mjenować a za nich swěčku při jutrownej swěčce zaswěćić. Wšitcy přiwuzni a znaći, njewotwisnje wot nabožneje přisłušnosće, su přeprošeni.
Socialne poradźowanje
Budyšin. Prawiznik a zapósłanc Sakskeho krajneho sejma Hajko Kozel (Lěwica) přeproša jutře, srjedu, wot 13.30 do 15.30 hodź. na socialne poradźowanje do swojeho Budyskeho běrowa na Šulerskej 10. Zhromadnje z prawiznikom Gregorom Janikom, kiž je w socialnym prawje wosebje wobhonjeny, pomha wón w socialnych prašenjach často jewjace so problemy rozrisać. Termin dojednać móža sej zajimcy pod telefonowym čisłom 03591/ 31 89 904.
Při wulkotnych wjedrowych wuměnjenjach je kónc tydźenja něhdźe ...
Tež maćerje w narodnej drasće byli
Dlěši čas njeběchu w Sernjanach nałožk stajenja a mjetanja meje hajili, doniž njejsu so před lětomaj někotre tamniše młode serbske swójby wo wozrodźenje starali.
Sernjany (aha/SN). Termin mejemjetanja wučinichu sej na sobotu po Božim spěću. Minjenu sobotu mjeztym třeći raz su wjacore młode maćerje swoje dźěći narodnu drastu zhotowali. Krasny bě to Sernjančanam napohlad, hdyž poda so dźesać porow zaso pod hudźbnym přewodom Měrćina Weclicha na nawjes před hosćencom. Najmłódša w narodnej drasće bě hakle dwulětna Pia Hebestreitec ze swojim wo lěto staršim přewodnikom Lucom Haufu.
Prjedy hač meja padny, předstajichu wšitke pory zhromadnje – tež někotre maćerje běchu so narodnu drastu woblekli – spodobny program z tradicionalnymi rejemi a žnějachu mjez wjesnymi připosłucharjemi wulke připóznaće, jako předstajichu mjez druhim Šewca, Katyržinku a Stup dale. Po tym zo bě 22 metrow wysoki mejski štom padnył, docpě sydomlětny Matej Kober jako prěni jeho wjeršk ze serbskej chorhoju. Za mejsku kralownu wuzwoli sej wón šěsćlětnu Saruh Obstec.
Dobru zhromadnosć hajili
Skupina Serbska murja zabawny spěwny wječor organizowała
Jaseńca (BW/SN). Młódne hłosy serbskich holcow a hólcow běchu sobotu wječor z Jasčanskeho kulturneho domu „Bjesada“ słyšeć. Tam bě skupina Serbska murja na zabawny spěwny wječor přeprosyła. Něhdźe połsta młodostnych z Pančic-Kukowa, Chrósćic, Noweje Wjeski a mnohich druhich kónčin bě přišło, tak zo je so tele wočakowanje spjelniło, rjekny jedyn z hłownych organizatorow Pětr Dźisławk z Chasowa.
Lěsna kupjel nětko zaso přistupna
Po mejemjetanju zhromadnje wjele spěwali
Hórki (KJu/SN). Štóž je sobotu popołdnju přez Hórki jěł, měješe zaćišć, zo bě cyła wjes na nohach. Tójšto ludźi bě přichwatało na mejemjetanje, kotrež zahajichu popołdnju w swjedźenskim stanje z kofejom a tykancom a pisanym programom wjesnych dźěći. Wone běchu do toho mały program nazwučowali, w kotrymž móžeše kóždy na instrumenće abo na hinaše wašnje swoje talenty pokazać. Nowosć bě, zo steješe stan lětsa prěni raz při wohnjowobornej gratowni. Wottam ćehnjechu wšitcy zhromadnje k meji wosrjedź wsy.
Při napřemoběhu dźěći wo wjeršk bě Pascal Wehnert najspěšniši a wuzwoli sej Sophie Matješkec za swoju kralownu. Mejski kral młodźiny bě Chrystof Sćapan, jeho kralowna Rebecca Wjenkec. Po tym ćehnjechu pory młodostnych – dohromady bě jich sydom a holcy běchu narodnu drastu woblečene – kaž tež dźěći k stanej, hdźež sej zarejowachu.
