Budyšin (SN/MWj). Za 68 100 bydlenjow a domow w Budyskim wokrjesu nje­trjeba so žana podruž płaćić, dokelž je wobsedźerjo sami wužiwaja. Kwota swójskich bydlenjow wučinja 47 procentow, w Budyšinje samym 20 procentow. Tole wuchadźa z aktualneho regionalneho přepytowanja Hannoverskeho instituta Pestel. Byrnjež kwota swójskich bydlenjow w cyłoněmskim přerězku nimale 45 procentow była, leži Němska w europskim přirunowanju na třećim městnje wot­zady.

W přepytowanju instituta Pestel rěči so wo nowej „generaciji přěhračkow“. „Wosebje ći w starobje 25 do 40 lět móža sej dźeń a mjenje swójski dom abo swójske bydlenje twarić abo kupić a su tuž nuzowani podruž płaćić. Ale runje tale starobna skupina ludźi, kotřiž steja na spočatku powołanskeho žiwjenja abo sej swójbu załožeja, je poprawom ta, kotraž sej bydlenje kupi abo dom twari“, wuswětla nawoda instituta Matthias Gün­ther. Mjenowanej starobnej skupinje přisłuša w Budyskim wokrjesu 55 500 ludźi. 7 600 z nich bydli w sprjewinym měsće. Jich šansa na swójske bydlenje je sylnje woteběrała.

Gmejnska rada Łaz hospodarski plan schwaliła

Łaz (AK/SN). Něhdźe 5,6 milionow eurow chce Łazowska gmejna lětsa inwestować. „Ličimy ze štyrjomi milionami eurow spěchowanja, naš podźěl wučinja 1,6 milionow eurow“, rozłoži komornica Mandy Liepert na wčerawšim posedźenju gmejnskeje rady. Z jednym napřećiwnym hłosom a štyrjomi wzdatymi radźićeljo hospodarski plan 2017 schwalichu. Ćežišći stej ponowjenje Wulkoždźarowskeje zakładneje šule a twar wopłóčkoweje syće we Wulkich Ždźarach a Koblicach.

W zakładnej šuli chce gmejna awlu wutwarić a před woknami škit před słóncom připrawić. Za to ma dohromady 444 000 eurow k dispoziciji. Za energetiske saněrowanje fasady Wulkoždźarowskeje sportownje chcedźa 262 000 eurow wudać. Wopłóčkowa syć we Wulkich Ždźarach ma 1,18 milionow eurow płaćić, ta w Koblicach 268 000 eurow. We wjesnymaj towarstwowymaj domomaj w Šćeńcy a Bjedrichecach matej nowej zachodaj bjez zadźěwkow nastać, štož płaći cyłkownje 3 000 eurow.

Biskopicy (SN). Elektroawta drje na hornjołužiskich pućach lědma wuhladaš, štóž pak tajke wobsedźi, móže je nětko mjez druhim w Biskopicach „natankować“. Na staroměšćanskim torhošću steji direktnje při busće Friedricha Augusta sprawneho nabiwanska připrawa. Wona je dźěl syće „StromTicket“, kotraž ma tajke stacije tež w Lipsku a Drježdźanach.

Baterije elektroawta z milinu nabiwać móžeš tam bjez pjenjez, darmotne to přiwšěm njeje. Wužiwana milina so internetnje wotliča. Za to so zajimc pod www.stromticket.de jónu přizjewi a trjeba po puću potom jenož hišće swój smartphone a přizjewjenske daty, rozłoži wčera Gunnar Schneider z předewzaća ENSO. Wosebitosć nabiwanskich staci­jow ENSO je, zo wužiwaja za nje jeničce milinu z wobnowjomnych energijowych žórłow, mjez druhim z wodomi­linarnjow.