Čěscy hosćo ze seniorami swjećili
Je z rjanej tradiciju, zo přewjeduje Budyski njewotwisny zwjazk seniorow kóžde lěto nalětni swjedźeń na ležownosći swojeho kluba na Löhrowej, lětsa mjeztym 25. raz. Předsydka Judith Mühldorfer z Hodźija wopytowarjow powita, mjez druhim 26čłonsku delegaciju z partnerskeho města Jabloneca nad Nisou.
Z Budyšina a wsow něhdyšeho Budyskeho wokrjesa bě 110 ludźi přišło, bywši předsyda zwjazka Ernst Brunner samo ze Sakskeje Šwicy. Swjedźeń wobrubichu Wulkodubrawscy muzikanća z přewažnje čěskej dujerskej hudźbu. Po wobjedźe, kotryž běchu na grilu spřihotowali, dachu so Češa do rejki. Jako jenički z němskeje/serbskeje strony zmužich so z nimi rejwać. Nadobo teptachu koło wokoło mnje. Jako chcych so do njeho sobu zarjadować, mje dalša žona do rejki přimny. Snano chcychu so mi na te wašnje dźakować, zo sym so jako jenički za jich blido sydnył a z nimi čěsce bjesadował.
Towarstwo přeproša
Kamjenc. W dźěćacym domje na Fichtowej 17 w Kamjencu přeproša Černobylske towarstwo póndźelu, 19. junija, w 19 hodź. na sobustawsku zhromadźiznu. Zo bychu tež dalšich zajimcow, bywšich hóstnych staršich a podpěrarjow za swoje aktiwity zajimowali, přewjedu zhromadźiznu jako zjawne zarjadowanje.
Wo přewróće rěčeć
Wulka Dubrawa (SN). Spěchowanske towarstwo Margarećineje hěty we Wulkej Dubrawje přeproša zajimcow zajutřišim, njedźelu, w 10 hodź. na diskusiju ze sakskej ministerku za integraciju Petru Köpping do muzeja. Zarjadowanje wotměje so składnostnje 26. róčnicy wobsadźenja zawoda. Dźěłaćerjo běchu so 18. junija 1991 hrožacej demontaži mašinow wobarali, po tym zo bě rukowaćelnja zawod předała a 800 ludźom wupowědźiła.
Frank Richter porěči
Budyšin. We wobłuku Budyskich rozmołwow porěči póndźelu, 19. junija, w 19.30 hodź. bywši nawoda Drježdźanskeje krajneje centrale za politiske kubłanje Frank Richter w Muzeju Budyšin wo přičinach tuchwilneje njespokojnosće w kraju a njedowěry do politiki.
Wěru zjawnje wuznawali
Na swjedźenju Božeho ćěła wjele družkow w procesionach kročiło
Chrósćicy (SN/MWj). Wysoki swjedźeń Božeho ćěła je za katolskich křesćanow nimo jutrow, swjatkow a hód sobu najwažniši cyrkwinski podawk lěta. Na tymle dnju woni wuznawaja, zo wěrja do Jězusa Chrystusa jako přitomneho w přežohnowanym woblatku. Dokelž je to jedyn ze stołpow křesćanskeje wěry, tole katolscy wěriwi we wulkich a dostojnych procesionach zjawnje wuznawaja. Tak kročachu dźensa po dopołdnišich kemšach syły ludźi w přewažnje ćmowej drasće k wonkownym wołtarkam. Tych maja na přikład na dworje klóštra Marijineje hwězdy hnydom štyri, w Chrósćicach je wón při wjesnej kapałce natwarjeny. Wosadni dujerjo kěrluše wěriwych na mnohich městnach přewodźachu.
We wšěch procesionach je dźensa znowa wulka ličba družkow sobu kročiła. Holcy w swojej wosebitej drasće spožčeja tomule dnjej přidatny swjedźenski raz. Za to dyrbjachu wone zdźěla hižo wosrjedź nocy stawać, zo bychu hotowarniče wšitke sčasom zdrasćili. Nimo družkow je so wjele dalšich holcow a žonow katolsku swjedźensku drastu woblekło.
Wo jubileju rozmyslować započeć
Njeswačanscy gmejnscy radźićeljo mějachu na swojim wutornym posedźenju tójšto wobzamknjenjow na blidźe, z kotrychž so wjetšina z twarskimi naležnosćemi zaběraše.
Njeswačidło (JK/SN). Na swojim poslednim posedźenju do lětnjeje přestawki mějachu Njeswačanscy radźićeljo zawčerawšim wobšěrny dnjowy porjad zmištrować. Wulki dźěl posedźenja zabra předstajenje naćiska k lětušemu hospodarskemu planej. Tuchwilu wšak hišće wšitke financy ze stron Sakskeje a Zwjazka dóšli njejsu, ale zo je dóstanu, je wěste, wjesnjanosta Gerd Schuster (CDU) podšmórny. Najebać to je wažne, zo w napjatym času wuwaženy plan nastaja, štož z widom na trěbne naprawy w gmejnje runje jednore njeje. Wot 19. julija naćisk plana w Njeswačanskej radnicy wupołoža. Na posedźenju w awgusće chcedźa jón wobzamknyć.
Bywše ratarske žiwjenje na holanskej wsy dožiwili
Židźino (UH/SN). Mnozy wopytowarjo ze susodnych wsow a z Wojerec su minjenu njedźelu w Židźinom lětušu swačinu na pólnej mjezy dožiwili. Po słowach předsydy Židźinskeho drastoweho towarstwa Uwe Schustera bě to 22. swjedźeń tajkeho razu. Wo dobru naladu postarachu so Rakečanscy muzikanća kaž tež wjesny chór, kotryž nawjeduje Kerstin Liederowa. Mjeztym zo zaklinčachu dujerska hudźba a hłosy chóra w swjedźenskim stanje, dyrbjachu so tam přebywacy hosćo po tym wo 180 stopnjow zwjertnyć. To předstaji so z dwanaće porami dźěćaca rejwanska skupina towarstwa, kotraž měješe za swójski program šěroku přestrjeń wonkowneho jewišća towarstwoweho domu k dispoziciji. W swojej serbskej wjesnej dźěłanskej drasće běchu dźěći dopokaz za to, zo serbske nałožki we wsy hač do dźensnišeho wobchowuja a hižo najmłódšej generaciji dale dawaja, na čimž matej Katrin Schuster a Heike Gutsche hłownu zasłužbu. W dalšim programowym dźělu wotwjedźechu dorosćeni přihladowarjow „na pućowanje do dobrych starych časow“.
Awto do Klóšterskeje wody zajěło
Přihotuja idejowu konferencu
Budyšin (SN/at). Planowana idejowa konferenca Budyskeje měšćanskeje rady wo němsko-serbskej zhromadnosći nabywa wobsahowych konturow. Wo tym je dr. Susanne Hozyna, předsydka dźěłoweho kruha za serbske naležnosće města Budyšina, wčera na druhim lětušim posedźenju gremija informowała.
Zarjadowanje w prěnim kwartalu 2018 wopřijima impulsowy referat a na njón zepěracu so idejowu konferencu. Za to je dr. Hozyna na mjeńšinowym polu dosć nazhoniteho referenta zdobyła: Thede Boysena, nawodu projektoweje skupiny zapadny přibrjóh w ministerstwje za hospodarstwo, dźěło, wobchad a technologiju Schleswigsko-Holsteinskeje. Boysen je w Serbach znaty jako prěni nawoda mjeńšinoweho sekretariata w zwjazkowym ministerstwje nutřkowneho a takrjec předchadnik Judith Wałdźic.
Krótkopowěsće (15.06.17)
Minority SafePack online
Flensburg. Iniciatiwa Federalistiskeje unije europskich narodnych mjeńšin (FUEN) Minority SafePack zběra wotnětka tež online podpisma. Pod www.minority-safepack.eu su lisćiny za 40 krajow podate. Informacije dyrbja we wulkich pismikach a w žadanej rěči zapisane być. FUEN trjeba milion podpismow, zo by iniciatiwa wo škit mjeńšin před EU wuspěšna była.
Čestne čłonstwo spožčene
Budyšin. Serbski ludowy ansambl ma třoch nowych čestnych čłonow. Su to wjelelětna spěwarka a moderatorka SLA Lenka Winarjec-Šołćina, bywša baletna mišterka ansambla Isolde Weiden kaž tež wjelelětny a znaty bywši spěwar ćělesa Pawoł Šołta. Jim su dźensa na zarjadowanju bywšich ansamblowcow na žurli SLA čestne wopismo přepodali.
Mjeno za jězor wobzamknjene
Policija (15.06.17)
Hižo rano wopita była
Budyšin. Njemało dźiwachu so policisća zawčerawšim rano na Drježdźanskej dróze w Budyšinje, jako kontrolowachu wodźerku Opela. Dokelž napadny jim „chorhojčka“ žony, přewjedźechu alkoholowy test a naměrichu pola 45lětneje 2,82 promilow, a to w 7.45 hodź. Dalšu jězbu žonje wězo zakazachu a přewodźachu ju ke kontroli kreje. Tež klučik jeje awta sej zastojnicy wobchowachu.
Awto pokradnyli
Budyšin. Njeznaći su w nocy na srjedu Při Špitałskich łukach w Budyšinje ćmowy Audi A 4 pokradnyli. Nimo wosobinskich wěcow běchu w jězdźidle nastroje za inženjerski zawod, kamera a laptop. Škodu trochuje wobsedźer na nimale 30 000 eurow.
