Krótkopowěsće (14.10.16)
Sakske wobydlerske myto
Drježdźany. Rownjan Manfred Hermaš w kategoriji towaršnostnje-socialnje a Wojerowske wuměłstwowe towarstwo w kategoriji kulturnje-duchownje staj mjez 89 nominowanjemi za lětuše Sakske wobydlerske myto. Lawreatow počesća na swjatočnosći 17. oktobra w spódnej cyrkwi Drježdźanskeje cyrkwje našeje knjenje.
E-booki z LND w direktnej předani
Budyšin. Běše dotal jenož móžno, serbske digitalne knihi přez wulke internetowe předawanišća kupować, je nětko tež direktny puć k požadanemu medijej móžny. Wotnětka móže sej kupc w internetowym wobchodźe www.domowina-verlag.de 18 e-bookow wšelakich žanrow w serbskej a němskej rěči 24 hodźin wob dźeń jako download wobstarać.
Grütters w Złym Komorowje
Policija (14.10.16)
Štyri kolesa pokradnyli
Njedźichow. W Njedźichowje su so nje- znaći wčera na Otto Buchwitzowej do wjaceswójbneho domu zadobyli. Přez zachodne durje, kotrež nałamachu, podachu so skućićeljo do pincy, zwotkel znajmjeńša štyri kolesa pokradnychu. Wysokosć škody wučinja po prěnim trochowanju policije něhdźe 750 eurow.
Awto zamknjene njebyło
Wojerecy. Lochko mějachu so paduši srjedu popołdnju we Wojerecach na Thomasa Müntzerowej. Dokelž njebě tam wotstajene awto zamknjene, štož njeznaći wuskušichu, móžachu z njeho bjez wulkich napinanjow tošku z dokumentami a móšnju sobu wzać. Wěcna škoda wučinja něhdźe 150 eurow. Wjetša škoda za škodowaneho pak je, zo dyrbi nowe swójske dokumety wobstarać.
Pakćikowa akcija SLA
Budyšin (SN). W Budyskim Serbskim ludowym ansamblu móža so lětsa pakćiki za akciju „Hody w črijowym kartonu“ wotedać. Hač do 15. nowembra přijimuja tam při kasy – při Młynskich wrotach – a w zarjadnistwje na Lawskej luboznje zapakowane dary.
Biblioteka swjeći jubilej
Kamjenc (SN). Kamjenska Lessingowa biblioteka woswjeći lětsa we wobłuku dnja bibliotekow, kotryž so 24. oktobra po cyłej Němskej wotměwa, dwaj jubilejej. Sprěnja je to załoženje wupožčowanskeje knihownje w lěće 1666 a zdruha zaćehnjenje měšćanskeje biblioteki do Lessingoweho domu w lěće 1931. K tejle składnosći wuhotuja tam swjedźenjej.
Hižo lěto twarja we Wojerecach 36 metrow dołhi móst na B 96 nad ...
Trening w halach bórze dróši
Budyska měšćanska rada nowe wustawki wobzamknyła
Budyšin (CK/SN). Za jednu hodźinu treninga budu sej w najwjace sportowych halach města Budyšin přichodnje popłatki we wysokosći 14,04 eurow žadać. Tole předwidźa nowe wustawki sportowych městnosćow. W dwěmaj etapomaj maja so popłatki přiměrić: Klětu hač do 7,50 eurow na hodźinu a wo dźesać eurow wjace na kónčnu sumu w lěće 2018. Tole je jedyn z kompromisow, kotryž nasta na ćišć měšćanskich radźićelow. Dlěje hač lěto su wo detajlach wustawkow zdźěla wótrje diskutowali.
Lětsa matej so dwě rozprawje podać
Budyšin (SN/at). W Budyskim krajnoradnym zarjedźe chcedźa nastupajo serbsku rozprawu nowe puće kročić. Po wustawkach wo zachowanju, spěchowanju a wuwiću serbskeje rěče a kultury w Budyskim wokrjesu z lěta 2008 ma krajny rada lětnje wokrjesnemu sejmikej wo tym rozprawjeć. Zdobom wotliči so z tym zwoprawdźenje tychle wustawkow.
„Na zakładźe wustawkow ma krajny rada rozprawjeć. Porno dotalnemu postupowanju pak smy so rozsudźili, zo budźetej to lětsa dwě rozprawje“, wuswětla Franziska Snelinski, nawodnica běrowa krajneho rady. Po jeje słowach poda społnomócnjena za serbske naležnosće Regina Krawcowa přehlad wo swojej dźěławosći a hódnoći skutkowanje wokrjesneho dźěłoweho kruha za serbske naležnosće. „Krajny rada Michael Harig (CDU) wo tym porěči, kak we wokrjesnym zarjadnistwje serbske wustawki zeskutkownja“, nawodnica jeho běrowa doda.
Na swójske dźěło zhladowali
Dešno (SN/at). Wuběrk za serbske naležnosće wokrjesneho sejmika Sprjewja-Nysa je so wčera w Dešnje njezjawnje schadźował. Kaž rjekny jeho předsyda, wokrjesny radźićel Fred Kaiser na naprašowanje SN, su so wuběrkownicy přihotam přichodneho rjadneho posedźenja 26. oktobra w Goznej wěnowali a so tež z analyzu swójskeho skutkowanja zaběrali.
To potrjechi w braniborskim ministerstwje za wědomosć, slědźenje a kulturu předležace próstwy gmejnow a Rady za naležnosće Serbow wo zwěsćenje přisłušnosće gmejnow, wsow abo wjesnych dźělow k zdźědźenemu serbskemu sydlenskemu rumej. „Smy sej płaćiwe zakonske zakłady dokładnje wobhladali, zo bychmy na přichodne posedźenje přihotowani byli“, rjekny Fred Kaiser. Mjez druhim steji tam słyšenje wokrjesa Sprjewja-Nysa k tymle próstwam na dnjowym porjedźe.
Zhladujo na tuchwilnu dźěławosć rozmyslowachu wuběrkownicy wo tym, kak hodźało so wěcywustojnym wobydlerjam w gremiju hišće lěpše sobupostajowanje zmóžnić. Woni hłosakmani njejsu. Najebać to chce wuběrk přichodnje dokumentować, kak bychu woni hłosowali.
Tójšto přizjewjenjow hižo předleži
Po tym, zo je sej tójšto ludźi njedawno něhdyšu Njeswačansku šulu na „Dnju twarnišća“ wobhladało, hdźež ma přebywanišćo z wobstajnym hladanjom starych ludźi nastać, tam zaměrnje z twarskimi dźěłami pokročuja.
Krótkopowěsće (13.10.16)
Dźesać měsacow jastwa
Budyšin. Zarjadniske sudnistwo sprjewineho města je srjedu 31lětneho k dźesać měsacam jastwa zasudźiło. W Budyšinje bydlacy Awstričan bě loni w januaru policistomaj wjacore razy z woknom hitlerski postrow pokazał. Kaž sudnistwo zdźěla, postara so jeho zakitowar na jednanju wo njezrozumjenje, twjerdźo, zo njebě to hitlerski postrow.
Amplowy mužik 55
Berlin. NDRski amplowy mužik swjeći runje dźensa swoje 55. narodniny. 13. oktobra 1961 je Karl Peglau we wuchodnym dźělu Berlina zamołwitym prěnje naćiski mužikow předstajił. Wosom lět po tym rjadowachu prěnje z nich wobchad w NDRskej stolicy a bórze po cyłym kraju. Po změnje sta so NDRski amplowy mužik z kultom a bu zdźěla tež w zapadnych zwjazkowych krajach zasadźeny a samo wudospołnjeny z amplowej žónku.
Tamme Hanken njeboh
Policija (13.10.16)
Awto murju spotorhnyło
Kamjenc. Wutoru popołdnju wołachu policiju a wohnjowu woboru k njewšědnemu njezbožu na Beethovenowu w Kamjencu. Nakładne awto je při ranžěrowanju dźěl masiwneje murje sportorhnyło. Dźěle murje, kotrež na chódniku a dróze ležachu, dyrbjachu Kamjenscy wobornicy rumować. Pozdźišo pak dyrbješe tež měšćanska komunalna słužba z kolesnym nakładnikom wupomhać. Hač je njekedźbnosć šofera k njezbožu wjedła, to je nětko slědźenska naležnosć policije.
Awće do so zrazyłoj
Hamor. Wčera wječor stej w Hamoru njedaloko zajězda k Bjerwałdskemu jězorej Audijej do so zrazyłoj. Dokelž jedne z awtow na třěše ležeše, su tež Hamorsku a Krynhelečansku wohnjowu woboru zaalarmowali. Jedna wosoba so při nje- zbožu tak ćežko zrani, zo dyrbješe nuzowy lěkar z helikopterom přilećeć.
