Za zrěčenje z LMBV hłosowali
Gmejna Hamor wuwiće Bjerwałdskeho jězora dale pohonja. Na wčerawšej gmejnskej radźe informowaše wjesnjanosta Achim Junker (CDU) radźićelow wo aktualnym twarskim stawje infrastruktury.
Hamor (AK/SN). „We wobłuku planowaneje twarskeje kónčiny Klětno-Jasua su w druhim dźělnym wotrězku infrastrukturne dźěła zahajene“, rozprawješe wčera Hamorski wjesnjanosta Achim Junker. „Po zemskich dźěłach a přihotowanju kanala za wodowody a wopłóčki móhli srjedź nowembra roły kłasć započeć.“
Dale přihotuje gmejna wuměnjenja za rozšěrjenje łódźnistwa na Bjerwałdskim jězoru. K tomu měł wjesnjanosta z Łužiskej a srjedźoněmskej towaršnosću hórnistwoweho zarjadnistwa (LMBV) wotpowědne zrěčenje wujednać. Tak płaći pasažěrska łódź, kajkuž chce gmejna na jězoru zasadźić, 876 000 eurow. 80 procentow toho chcedźa ze spěchowanskich srědkow Zwjazka financować. Zbytnych 20 procentow, štož wučinja něhdźe 180 000 eurow, ma Hamorska gmejna přewzać. Tole chcedźa do klětušeho etata zakótwić.
Adwentny čas so bliži
Šoferow za nós wjedli?
Petya Emiliyanova Eneva z Bołharskeje a předsyda Towarstwa swj. ...
Serbske wudaća w knihowni
Kamjenska biblioteka planuje klětu nowy wobstatk za dźěći
Kamjenc (SN/mwe). Kamjenska měšćanska biblioteka je sej předewzała, wosebje za dźěći ze serbskich gmejnow, kotrež přińdu sej tam knihi a dalše medije wupožčować, klětu mały wobstatk ze serbskimi dźěćacymi a młodźinskimi wudaćemi natwarić. „Móhła sej předstajić, zo so tónle poskitk derje wužije, wšako tójšto Serbow prawidłownje do našeho domu załoži. Bjez poskitka žane naprašowanje“, wjednica Lessingoweje knihownje Marion Kutter našemu wječornikej praji. Rady witani su w bibliotece starši a młódši awtorojo z města a Kamjenskeje wokoliny, kotřiž su njedawno k dwójnemu jubilejej knihownje krótke stawiznički a basnje do wosebiteje „bi-bo-knihi“ zapisali. Wotćišćane su we wudaću k 350. jubilejej Kamjenskeje knihownje a k 85lětnemu jubilejej jeje zaměstnjenja w Lessingowym domje tež němske hrónčka serbskeho awtora Jandytarja Hajnka ze Smječkec ze serbskej sadu: „Tež serbscy čitarjo wołaja: ,Sława knihowni Lessinga!‘“ Knižku dóstanjeće za mały pjenježny dar w bibliotece.Dworowe dźiwadło hosći putało
Ćišćanski „swjedźeń towarstwow“ je kóžde lěto jedyn z wjerškow wjesneho žiwjenja, organizowany přeco wot druheje skupiny na žurli hosćenca „Zeleny wěnc“.
Ćisk (KD/SN). Lětsa je prěni króć dwanaće čłonow Ćišćanskeho wjesneho dźiwadła, kotrež wjesnemu kulturnemu towarstwu přisłuša, před wulkej ličbu přihladowarjow minjenu sobotu 90minutowski „telewizijny wječor“ z někotrymi widejami a skečemi wuhotowało. Za sportowe wusyłanje su wubědźowanje Formula-1 na Ćišćanskich wjesnych dróhach filmowali. W přinošku we wobłuku wosebiteho Sakskeho špihela wěnowachu so lóštnje mejestajenju z Hanumarinej pólku na jewišću, a to jako minimalistisku wersiju nimale bjez młodostnych. Jenož jedyn młody muž so z holcu kolebaše, a to bě na kóncu w serbskej narodnej drasće woblečena gumijowa klanka.
Starši Ćišćanski porik z Hanu (Annet Zarodnikowa) a Matthesom (Tobias Hermann), přeješe sej, zo by přeco dosć młodostnych było, kotřiž serbske nałožki prawje haja. W lubosćiwje wuhotowanej bydlenskej kulisy z połstatych lět čłonaj dworoweho dźiwadła po programje wjedźeštaj.
Wo aspektach mjeńšin
Krótkopowěsće (15.11.16)
Pjerizna ma w chlěwach wostać
Drježdźany. Po najnowšim padźe ptačeje gripy w Sakskej dyrbi pjerizna nětko po wšěm zwjazkowym kraju w kurjencach a chlěwach wostać. Tole ministerstwo za socialne a škit přetrjebarjow wčera wječor wukaza. Tak chcedźa tomu zadźěwać, zo so strašny wirus H5N8 mjez pjeriznu dale rozpřestrje.
Hłowna dróha zawrjena
Pančicy-Kukow. Znajmjeńša hač do kónca tydźenja wostanje hłowna dróha z Budyšina přez Pančicy-Kukow na směr Kamjenc zawrjena. Přičina je, zo wutwarjeja tam hižo dlěši čas kolesowarsku šćežku hač ke klóšterskej muri, zo su zajězd do Lipja wo tójšto powjetšili a zo přińdźe nětko na dróhu nowa woršta bitumena. Po zdźělenju zamołwitych je wobjězd na taflach derje wupisany.
Z jastwa tuńšo telefonować
Policija (15.11.16)
Wopity z awtom jěł
Malešecy. Wčera w nocy je so wodźer Opela w Malešecach na Hućinskej dróze přećisnył. Po zdaću je 25lětny kontrolu nad jězdźidłom zhubił. Na kóncu so wukopa, zo měješe młody šofer 1,4 promile alkohola w kreji.
Wikowy dźenik a rallye planowanej
Najstarše němske hodowne wiki – Budyske Wjacławske wiki – wotewru pjatk, 25. nowembra swoje wrota. Naroki zamołwitych města hodowne wiki z pisanym programom pjelnić běchu tež lětsa zaso chětro wulke.
Budyšin (SN/BŠe). Něhdźe 70 zarjadowanjow je w běhu 24 dnjow na Budyskich hodownych wikach planowanych. Sobotu do prěnjeho adwenta wustupi na přikład serbska folklorna skupina Sprjewjan na hłownym jewišću. Na samsnym dnju budźe Wojerowske Dźěćatko ze swojimaj přewodźerkomaj małe dary rozdźěleć.
