Dobry wothłós žnjał je zawčerawšim prózdninski poskitk we ...
S 100 budźe dołhi čas zawrjena
Tuchwilne twarnišćo na statnej dróze S 100 na kromje Pančic-Kukowa zda so někotremužkuli šoferej wulke poćežowanje być. Porno tomu pak, štož ma so we wsy klětu stać, je to maličkosć.
Pančicy-Kukow (SN/MWj). Nowotwara mosta nad Klóšterskej wodu w Pančicach-Kukowje dla budźe statna dróha S 100 klětu wosom měsacow dospołnje zawrjena. Tole zdźěli wjesnjanosta Markus Kreuz (CDU) na wčerawšim posedźenju gmejnskeje rady we Wotrowje. Runje tak kaž dalši nošerjo zjawnych zajimow ma tež gmejna swoje stejišćo k twarskemu projektej přednjesć. Radźićeljo su je wčera rozjimali.
Předwidźane je, zo budźe hłowna dróha přez wjes mjez hłownym zachodom do klóštra Marijineje hwězdy a hosćencom „Carstenowa piwowa stwička“ trochu šěrša, tak zo móža předewšěm nakładne awta městno lěpje přejěć. Nimo toho nastanje tam kupa za pěškow. Wšitke dalše nadrobnosće chcedźa bjezposrědnje potrjechenym na wobydlerskej zhromadźiznje rozłožić.
Nimale sto lět stary traktor hišće swěrnje jězdźi
Budyšin (SN/MWj). By-li Karlheinz Domaschk minjenu njedźelu na prezentaciji starych traktorow na Bóščanskim rybarskim swjedźenju wobdźěleny był, bychu wopytowarjo jeho traktor najskerje wosebje wobdźiwali. Budyšan wobsedźi traktor typa Lanz z lěta 1923. Jězdźidła z toho časa dźensa lědma hišće něhdźe wuhladaš, tak zo smě so Domaschk hordźić, zo drje ma prawdźepodobnje jedyn z najstaršich traktorow tohole typa cyłeje Hornjeje Łužicy.
Wjelk w Delanach zachadźał
Šćěpjenska sezona zahajena
Budyšin (SN/mwe). W strowotniskim zarjedźe wokrjesa Budyšin šćěpja w běhu lěta něhdźe 1 300 ludźi přećiwo gripje. Kaž nowinski rěčnik wokrjesa Gernot Schweitzer na naprašowanje Serbskich Nowin zdźěli, bě tendenca w zašłych lětach poměrnje konstantna. Najwjace ludźi da so direktnje pola swojeho domjaceho lěkarja šćěpić. Kelko to je, nam w nowinskim běrowje Budyskeho krajnoradneho zarjada rjec njemóžachu, dokelž k tomu žana statistika njeeksistuje. W strowotniskim zarjedźe šćěpja ludźi přećiwo influency we wobłuku poradźowanja a rěčnych hodźin abo hdyž přihotuja so pućowanja do dalokeho wukraja kaž tež we wobłuku šćěpjenskich akciskich dnjow. „Šćěpjenskeho srědka maja wšudźe nadosć k dispoziciji“, Gernot Schweitzer doda.
Krótkopowěsće (07.10.16)
Institut nowačkow witał
Lipsk. 17 nowačkow zahaji přichodnu póndźelu studij na Instituće za sorabistiku Lipšćanskeje uniwersity. Třo młodostni z Hornjeje a štyrjo z Delnjeje Łužicy chcedźa wučerstwo studować, jedyn je so za bachelorski studij sorabistiki přizjewił a šesćo za europske mjeńšinowe rěče. Třo zajimcy ze słowjanskeho wukraja su stipendiaća Załožby za serbski lud.
Wothłosuja klětuše festiwale
Fiuggi. Wothłosowanje klětušeje swětoweje festiwalneje protyki je jedne z ćežišćow tuchwilu wotměwaceho so 46. swětoweho kongresa mjezynarodneje organizacije za folklorne festiwale CIOFF w italskim měsće Fiuggi. Serbow zastupuje tam referent Domowiny Marko Kowar. Wón chce na kongresu zdobom dalše skupiny za klětuši festiwal „Łužica“ namakać.
Stejišćo Ahrensa k demonstracijam
Policija (07.10.16)
Wo zranjenu so njestarał
Pančicy-Kukow. Jako wodźer swětłomódreho wosoboweho awta zawčerawšim w 15.15 hodź. z parkowanišća při kupnicy Netto w Pančicach-Kukowje na statnu dróhu S 100 wujědźe, njewobkedźbowaše wón předjězbu mopedistki. 17lětna dyrbješe nahle spinać, padny a so snadnje zrani. Zawinowar pak so z městna njezboža zminy. Swědcy, kotřiž su něšto wobkedźbowali, njech přizjewja so pod telefonowym čisłom 03578/ 35 20.
Přećiwo stresej
Smochćicy. Nowy rjad seminarow zahaja klětu w Smochčanskim Domje biskopa Bena. Tam chcedźa zajimcam zbližić, kak móžeš na přirodne a strowe wašnje stresowe situacije na dźěle abo druhdźe zmištrować. Zarjadowar a nawoda seminarow budźe Volker Bertleff, terapeut w fachowej klinice Badenweiler. Hižo lětsa kónc oktobra/kónc nowembra wón dźěłowe wašnje a metody seminara na třoch kóncach tydźenja předstaji.
Lisćiki za bal
Budyšin. 29. a 30. oktobra wotměje so w Němsko-Serbskim ludowym dźiwadle lětuši Budyski jewišćowy bal. Sobuwuhotowar je Serbski ludowy ansambl ze swojim orchestrom a baletom. Wobdźělene budu dale Baba Jaga a dalše wjery, tak zo smědźa so wopytowarjo na wosebity program wjeselić. Lisćiki poskića dźiwadłowa kasa pod tel. 03591/ 584 225.
Při kitesurfowanju so zranił
