Wobydlerjo k sobudźěłu namołwjeni
Wojerecy (MFü/SN). Wuwićowy koncept města Wojerec bě hłowna tema wčerawšeje wobydlerskeje hodźiny frakcije Swobodnych wolerjow měšćanskeho parlamenta. Hłowny nastork bě wažny termin: Přichodny tydźeń chce měšćanska rada wobzamknyć, koncept měšćanskeho wuwića zjawnosći předpołožić. Tak maja wobydlerjo hišće raz składnosć, so intesiwnje z tym zaběrać. Dotal su w měsće wo wjacorych tajkich konceptach debatowali. Mjeztym knježi mjez wobydlerjemi wulka njejasnosć, hladajo na wulki spektrum namjetow.
Runje dwaj wobydlerjej běštaj wčerawše přeprošenje frakcije do jeje Wojerowskeho běrowa sćěhowałoj. Detlef Degner, kiž bě na minjenym forumje wo wuwiću města hižo naležnje sobu diskutował, pokaza wčera hišće raz na to, zo wusměrjeja so dotalne koncepty jenož na powšitkowne negatiwne wuwiće. „Čitam jenož wo dalšim wottorhanju bydlenjow“, wón rjekny. Tamny zajimc, Heinz Schmidt, bě zadźiwany, zo je wobdźělenje wobydlerjow faktisce zakónčene. Wón by sej dalše rozmołwy z ludźimi wo wuwiću města přał. Koncept, kiž nětko předleži, chcył wón „zasadnje wotpokazać“.
Krótkopowěsće (20.10.16)
Šuli wuznamjenjenej
Drježdźany. Kulowska Krabatowa zakładna šula kaž tež Budyska Montessori-šula stej we wubědźowanju „hrać wučinja šulu“ myto dobyłoj. Wonej stej mjez dalšimi 34 wuznamjenjenymi za indiwidualny a kreatiwny koncept hrow. Sakske ministerstwo za kultus přewostaji kubłanišćam wobsahowje šěroke wuhotowanje z wšelakimi hrami.
Kitesurfowanje dale zakazane
Lejno. Sakska krajna direkcija je próstwu gmejny Halštrowska hola wotpokazała, při Lejnjanskim jězoru kitesurfowanje wuwzaćnje dowolić. Tam płaća rjadowanja Sakskeho łódźnistwa, zarjad argumentuje. Próstwa měrješe so na juho- wuchodny dźěl jězora. Zarjad wopodstatnja zakaz mjez druhim z móžnymi konfliktami při wužiwanju jězora.
Twarja nowu škodowku
Policija (20.10.16)
Do bagra a kontejnera
Hodźij. Wjele prócy nałožowali su njeznaći, jako so w nocy na wutoru při statnej dróze S 111 mjez Hodźijom a Třomi Hwězdami do kontejnera zadobychu, kotryž twarska firma jako skład wužiwa. Paduši wotamknychu najprjedy durje bagra, kiž běchu twarscy dźěłaćerjo jako zadźěwk před kontejner wotstajili. Po tym zo běchu z ćežkej mašinu nabok jěli, łamachu so do kontejnera. Z njeho wzachu dlěši milinowód a wšelki grat. Hódnotu rubizny njemóžeše Zhorjelska policajska direkcija hišće podać. Wěcna škoda na bagru a na kontejneru pak wučinja něhdźe 2 500 eurow. Kriminalna policija nětko tónle pad přepytuje a spyta paduchow wuslědźić.
Hromadźe ze zastojnikami Budyskeho policajskeho rewěra su holcy a ...
Dobrowólnje w Lipju dźěłać
Zo by so Lipjo w Pančicach-Kukowje zaso z woprawdźitym parkom stało, za to su na přikład Drježdźanscy studenća lětsa hižo pilnje dźěłali. Přichodnu sobotu su nětko wobydlerjo namołwjeni, so dobrowólnje gratu přimać.
Pančicy-Kukow (SN/MWj). Hižo lětsa w aprylu na nalětnim wuchodźowanju je Clemens Bejmak nazymsku dźěłowu akciju w Lipju w Pančicach-Kukowje připowědźił. „Nětko je prawy čas, ju přewjesć, dokelž smědźa so štomy a kerki zaso rězać“, rozłoži Miłočanski krajinowy architekt, kiž je so w swojim diplomowym dźěle z tym zaběrał, kak móhł z Lipja zaso woprawdźity park nastać. Sobotu, 22. oktobra, wón wot 9 do 14 hodź. wšitkich wobydlerjow – nic jeno z Pančic-Kukowa – namołwja, so za tónle zaměr sobu gratu přimać.
Wubědźowanje dale w gmejnje
Triatlon z wysokej kwalitu a sylnje zwjazany z regionom
Łaz (AK/SN). Po wšej Němskej wuznamny triatlon „KnappenMan“ ma so dale při Třižonjanskim jězoru we Łazowskej gmejnje wotměwać. „Chcemy wysoku kwalitu wobchować, lokalne předewzaća zapřijeć a dale partner Łazowskeje gmejny być. Móžemy region z tym skrućić, zo wo nim rěčimy a jón zwičnjamy“, podšmórny prezident sportoweho zwjazka Łužiska jězorina Torsten Kilz na wčerawšim posedźenju Łazowskeje gmejnskeje rady. Jeje čłonojo přiwzachu dźak sportoweho zwjazka za wjelelětne a wobstajne zhromadne dźěło. Wuraznje dźakowaše so Kilz wjace hač sto pomocnikam, kotřiž triatlon při organizowanju a přewjedźenju podpěruja.
Naležnje wo nowych dawkach debatowali
Radwor (SN/MkWj). Hladajo na konsolidowanje swojeho etata je Radworska gmejna tuchwilu na dosć dobrym puću. Tole móžeše wjesnjanosta Wincenc Baberška (CDU) na wčerawšim posedźenju gmejnskeje rady při předstajenju połlětneje rozprawy zwěsćić. Tomu tež polěkuje, zo móže gmejna w zwisku ze swojim zadołženjom swój kredit přerjadować, wotpłaćejo jón nětko z nišej danju.
Biokarpy so lětsa wosebje derje radźili
Złyčin (JoS/SN). Tysacy wopytowarjow je minjeny kónc tydźenja rybarski swjedźeń při Balakec haće w Złyčinje přiwabił. Tam woni sobu dožiwichu, kak rybarjo wjacore razy wulki sak přez wodu ćahachu, zo bychu dohromady něhdźe dźesać tonow karpow, šćukow a dalšich družin rybow zwućahali. Cyłkownje 20 pomocnikow bě cyły dźeń na nohach, woni stejachu hač k brjuchej w zymnej wodźe a za blidami ryby po wulkosći rjadowachu.
Uwe Ringpfeil, senioršef Stróžanskeho hatarstwa, kotryž tohorunja Balakec hat w Złyčinje wobhospodarja, je z rybjacym lětom spokojom. „Smy wšak hišće wosrjedź wułójenja hatow. Dotal pak je wuslědk dosć porjadny.“ Po jeho słowach ryby lětsa trochu mjenje waža hač zwučene. To pak zwisuje z wusadźenymi rybičkami, kotrež běchu tak a tak hižo trochu mjeńše, rozłoži Uwe Ringpfeil. Wulke mnóstwo rybow pak snadnišu wahu naruna.
Dalša nowosć při spjatym jězoru
Krótkopowěsće (19.10.16)
„Reja na deponiji“
Wolfen. Na 5. filmowych dnjach we Wolfenje, kotrež so wot 19. do 23. oktobra wotměwaja, pokaza so mjez druhim film DEFA „Tanz auf der Kippe“ z lěta 1991 po noweli „Augenoperation“ („Wšitko, štož ja widźu“) Jurja Kocha. Je to tragiska stawizna młodźenca, kotryž chce w kóždym nastupanju sprawnje jednać a kiž pod towaršnostnymi strukturami a normami časa zwrěšći.
Fachowa konferenca
Oelsnitz/V. Přechody zhromadnje zrjadować je wulki zaměr pomjeznych regionow. Z tutej temu zaběraja so fachowcy na konferency dźensa we vogtlandskim Oelsnitzu. Mjez nimi stej tež nawodnica Budyskeho Rěčneho centruma WITAJ dr. Beata Brězanowa a wědomostna sobudźěłaćerka za rěčny marketing a wědomostne dźěło Jadwiga Kaulfürstowa.
Biskopja w Betlehemje
