Zelenu swěcu za kupnicu a jězor
Choćebuz (HA/SN). W Choćebuzu budu přichodne lěta tři wulke twarnišća. Hač do lěta 2020 matej so hłowne dwórnišćo a wokolny areal za něhdźe 50 milionow eurow dospołnje modernizować. Nastać ma moderny wobchadny centrum za železnicu, busy a tramwajku. Wulke twarnišćo budźe dalša kupnica wosrjedź města blisko Blechenoweho kareja, w kotrejž měli měšćenjo kónc lěta 2018 prěni raz nakupować móc. Inwestor nałoži tam 18 milionow eurow.
Třeće wulkopředewzaće delnjołužiskeje metropole je Choćebuski wuchodny jězor, kotryž nastawa z bywšeje brunicoweje jamy Choćebuz-sewjer. Planowane je, wot lěta 2018 do 2027 jězor z wodu pjelnić. Potom ma tež infrastruktura kołowokoło přichodneho najwjetšeho kumštneho jězora Braniborskeje dotwarjena być.
Za projektaj kupnicy a jězora su měšćanscy zapósłancy srjedu skónčnje zelenu swěcu dali. Wosebje jězor nastupajo běchu minjene lěta horco diskutowali. Nětko je masterski plan hotowy.
Do čestneje knihi so zapisali
Krótkopowěsće (30.09.16)
Pomhać słabym na Ukrainje
Budyšin/Lwow. Čłonojo Budyskeho Rotary-kluba přebywaja tuchwilu w ukrainskej stolicy Lwowje. Pod nawodom swojeho prezidenta Petera-Paula Strauby chcedźa tam zwoprawdźić pomocny projekt na dobro socialnje słabych nutřkokrajnych ćěkancow. Mjez sobujěducymi staj něhdyša prezidentka kluba Ludmila Budarjowa a Beno Budar.
Mjezynarodne kulturne dny
Choćebuz. Pod hesłom „Wšelakorosć“ wotměwaja so tuchwilu w Choćebuzu 2. mjezynarodne kulturne dny. Hišće hač do 9. oktobra prócuja so towarstwa, zjednoćenstwa, cyrkwinske kruhi a dalše cyłki wo zarjadowanja na temu integracija. Kaž Domowina informuje, wuhotowa jeje Choćebuska skupina w tym rjedźe wčera literarny wječor z Jurjom Kochom pod hesłom „Čitanje pod lampu“.
Sportowy swjedźeń přewjedli
Policija (30.09.16)
Starše žony wobkradnyli
Budyšin/Wojerecy. Hnydom tři starše žony stachu so zawčerawšim z woporom paduchow. W Budyšinje je njeznaty w parku Při měšćanskim nasypje 81lětnej tobołku wutorhnył. Žona hišće spyta ju kruće dźeržeć, štož pak so jej njeporadźi. Wona padny a so zrani. We Wojerecach bě 70lětna pola frizera a powěsny tobołku na garderobu. Jako chcyše woteńć, wona pytny, zo bě něchtó móšnju z ec-kartku a pjenjezami z njeje wzał. A popołdnju pokradnychu 91lětnej tobołku, jako bě wona nakupować. Škoda wučinja w tymle padźe 600 eurow.
Swójske wobrazy zapodać
Budyšin. Prěni raz wěnuje Budyski Serbski muzej wot 9. oktobra hač do 1. měrca 2017 wosebitu wustajeńcu wo stawi- znach fotografije we Łužicy a zaběra so z prašenjom, wot hdy jewjachu so w fotach serbske elementy jako wotmolowanjahódny motiw. Tak su we łužiskich archiwach a muzejach kaž tež pola priwatnych wosobow njesměrnje wjele originalnych fotografijow přehladali. Přiwšěm pytaja dalše zajimawe historiske wobrazy z časoweje doby 1850 hač do 1930. Štóž tajke doma ma, njech poskići je Serbskemu muzejej za čas wustajeńcy abo jenož na wobmjezowanu chwilu. Za to stej dwě wosebitej sćěnje rezerwowanej. Zajimcy njech so w muzeju přizjewja, zo móhli motiwy wupytać. Na te wašnje móža k tomu přinošować, zo so wustajeńca stajnje znowa měnja.
Rědki jubilej
Kamjenc. Na 175lětne wobstaće zhladuje tele dny w Kamjencu wobchod Paul Lehmann. Mějićel Claus Lehmann poskića w nim hrajki, škleńčane twory, dary a małe elektriske nastroje. Serbscy kupcy móža so w předawanišću na torhošću tohorunja w swojej maćeršćinje poradźować dać. Jutře, 1. oktobra, změje wobchod wotewrjene.
Wulke twarnišćo je tuchwilu Hórnikowa w Chrósćicach. Po tym zo su ...
Dale mjenje bjezdźěłnych
Dźěłowe wiki wuchodneje Sakskeje wot dobreho hospodarskeho wuwića w našim kraju profituja. Hišće ženje njebě tu ličba bjezdźěłnych tak mała kaž tuchwilu. Wuwiće w jednotliwych wotnožkach Budyskeje agentury za dźěło pak je jara rozdźělne.
Budyšin (CK/SN). Časy čerwjeneje latarnje za dźěłowe wiki Hornjeje Łužicy su nimo. „Z kwotu bjezdźěłnosće 4,4 procentow w Radebergu a 4,7 procentow w Kamjencu mamy pola nas hižo nimale poměry kaž w Mnichowje“, rjekny dźensa dopołdnja Thomas Berndt, jako předstaji aktualne ličby z regionalnych dźěłowych wikow.
Wjele pomocnikow cyrkej rjedźiło
Krótkopowěsće (29.09.16)
Zhromadny swójbny dźeń
Choćebuz. Wjace hač sto zajimcow je so wčera na serbskim swójbnym dnju w Choćebuskej Froebelowej zakładnej šuli wobdźěliło. Na zarjadowanju, kotrež běštej tamniši Rěčny centrum WITAJ a kubłanišćo zhromadnje organizowałoj, posrědkowachu informacije wo Witaj a bilingualnym kubłanju w Delnjej Łužicy. Wobdźělene běchu mjez druhim swójby z Borkowow, Strjažowa a Choćebuza.
Wustajeńca informuje
Kamjenc. Kooperaciski program k spěchowanju mjezy překročaceho zhromadneho dźěła mjez Swobodnym statom Sakskej a Čěskej republiku w lětach 2014 do 2020 pokazuje tuchwilna wustajeńca w Kamjenskim stejnišću Budyskeho krajnoradneho zarjada. Hač do 20. oktobra móžeš so tam wo zaměrach a wuměnjenjach spěchowanja tež małych projektow informować.
Koch w Awstriskej čitał
Policija (29.09.16)
Z jastwa won a hnydom zaso nutř
Budyšin. Ani 24 hodźin po tym zo bu wutoru z Budyskeho jastwa pušćeny, je 39lětny muž w nocy na srjedu w sprjewinym měsće padustwo skućił. Ze zahrodoweho domčka na Mužakowskej je wón telewizor, radijo a žiwidła pokradnył a chcyše je z tohorunja pokradnjenym kolesom wotwjezć. Policisća pak pakostnika lepichu. W pospěšnym jednanju zasudźi jeho Budyske zarjadniske sudnistwo wčera k dźesać měsacam jastwa, kotrež smě 39lětny nětko nastupić.
