Kajke bě to wjeselo, jako před lětami do Worklečanskeho hosćenca zaso žiwjenje zaćahny, po tym zo bě dom dołhi čas prózdny stał. Štóž je sej tam na přikład wječer za swójbny swjedźeń skazał, jón wulce chwaleše, a zarjadowanja na žurli běchu derje wopytane. Rěči-li so dźensa wo hosćencu, stawa so to zwjetša w zwisku z přesadźowanjom. Škoda, zo dyr­bješe tak daloko dóńć. Hosćenc wězo najprjedy raz dale dźěła, a zawěsće wón to tež z nowym wobsedźerjom čini. Přiwšěm so prašeš, kak móžeše so wšitko takle wuwić, zo jón nětko přesadźuja. Hdyž pak so na tajki přemysłowy projekt zwažiš, dyrbiš so w tymle kraju na wěste předpisy dźeržeć, hač so ći lubja abo nic. Njemóžeš wšu infrastrukturu wokoło sebje wužiwać, ale žane dawki płaćić, jenož dokelž jako „reichsbürger“ měniš, zo tónle kraj scyła njewobsteji. Takle to prosće njeńdźe. Marian Wjeńka

Kubłanska krajina města Wojerec so přichodne­ lěta bytostnje změni. Dwě dotalnej wyšej šuli matej so zawrěć­ a za to jedna centralna wutworić.­ Nadawk, tole planować, je měšćanska­ rada wčera rozdała.

Wojerecy (AK/SN). Na terenje wot lěta 2002 prózdneho a dźensa pod škitom pomnikow stejaceho Konrada Zusoweho gymnazija ma třičarowa wyša šula nastać. K tomu je so Wojerowska měšćanska rada na swojim wčerawšim posedźenju wuznała. Z jednym napřećiwnym a jednym wzdatym hłosom rozdachu nadawk, twarjenje a nutřkowne rumnosće planować.

Najprjedy maja so prěnje tři wukonowe fazy přewjesć, potajkim zakładne planowanje, předplanowanje a naćisk. Tole ma dohromady 319 000 eurow płaćić. „Dalše wukonowe fazy slěduja potom krok po kroku wotwisnosnje wot spěchowanskich srědkow“, rozłoži wyši měšćanosta Stefan Skora (CDU).

Inwestuja do noweho labora

Budyšin. Sakska inwestuje do Budyskeje powołanskeje akademije 5,9 milionow eurow za nowy labor. Tole zdźěli wčera statny managament za imobilije a twarstwo w Drježdźanach. Nowotwar z cyłkownje 1 000 kwadratnymi metrami wužitneje płoniny ma hač k zymskemu semestrej 2017/2018 nastać a studentam moderne techniske wuměnjenja skićić.

Wot lěta 2017 mjenje płaćić

Berlin/Budyšin. Na wodźerjow awtow w Budyskim wokrjesu čaka klětu lěpše zastopnjowanje jich rukowanskeho zawěsćenja. Tole zdźěli dźensa Němska zawěsćenska towaršnosć w Berlinje. Mjez druhim płaći­ wolóženje tež za Rudnohorinski wokrjes. We wšěch tamnych wo­krjesach Sakskeje wostanje­ wšitko při starym. Zakład zastopnjowanja twori škodowa bilanca po njezbožach.

Zatajany pralěs

Proces 20. nowembra 2015 rubjenych časnikow dla je na swojim druhim jednanskim dnju překwapjacy přewrót nazhonił. Swědk, kiž měješe wobskorženeho Wojciecha W. poprawom poćežować, je ze swojim wuprajenjom runje to nawopačne docpěł. Sćěh toho je, zo je W. nětko swobodny. Z Budyskeho sudnistwa njeje wón wróćo do Zhorjelskeho jastwa, ale domoj do Zgorzeleca jěł.

To bě sej Matthias T. hinak předstajił. Jeho wuprajenja mějachu wobskorženeho Wojciecha W. do jastwa přinjesć. Wšako bě wón jeho wony wječor, jako bu Budyski juwelěrowy a časnikarski wobchod na Serbskich hrjebjach nadpadnjeny, cyle jasnje widźał. T. bě z awta wobkedźbował, kak maskěrowanej wosobje z wobchoda spěchatej. Bjez wahanja Budyšan ze swojim VW-busom za nimaj jědźeše, najprjedy po dróze Před Šulerskimi wrotami a na to wusku a normalnje (ale nic tón wječor) ze zadźěwkom zawrjenu Tobołkowu horu horje hač k małemu parkowanišću.