Policija (13.09.16)
Awto po njezbožu so wupaliło
Grodk. Hrózbne wobchadne njezbožo sta so dźensa w nocy na zwjazkowej dróze B 156 pola Grodka. Poł hodźiny po połnocy wołachu tam wohnjowych wobornikow k hašenju. Na městnje woni widźachu, zo so awto pali, kotrež bě do toho do štoma zrazyło. Wodźer/ka so w awće spali. Hač jedna so wo muža abo žonu, njeje hišće zwěsćene.
Dekanatna młodźina do Sakskeje Šwicy sej wulećała
Wjace hač 120 młodostnych je so zawčerawšim na wulěće serbskeje dekanatneje młodźiny do Sakskeje Šwicy wobdźěliło. Po tym zo běchu na njedźelnej Božej mši w serbskich wosadach šulerjow 9. lětnika do kruha wosadneje młodźiny přiwzali, zetkachu so wšitcy wobdźělnicy po wobjedźe w Chrósćicach. Busaj a transporteraj dowjezechu jich do Bad Schandauwa. Tam rozdźěli so syła do dweju skupin. Jedna padlowaše z gumijowymi čołmami za dźesaćoch do Wehlena. Tamni začuwachu spěšnosć tak mjenowaneho speed-čołma na połhodźinskej jězbje po Łobju. Někotři z čołmikowarjow horceho słónčneho wjedra dla do Łobja skočichu a so wochłódnichu. Po dwěmaj hodźinomaj wšitke čołmiki cil we Wehlenje docpěchu.
Wuprajić so a słuchać
Wjele ludźi je wčerawši dźeń wotewrjeneho pomnika w Budyšinje ...
Spřećelenej chóraj koncertowałoj
Chórowa pěseń Eugena Suchonja „Aká si mi krásna“ steješe sobotu jako symbol zhromadnosće mjez starosławnym Radworskim chórom Meja a lubymi hosćimi z morawskeje wsy Baška, ležaceje blisko Ostravy njedaloko čěsko-pólskeje mjezy.
Radwor (CRM/SN). Štóž chcyše pruwować, hač móže přećelstwo mjez słowjanskimaj ludomaj na sprawne wašnje tež dźensniši dźeń dale fungować, je to sobotu wječoru čile nazhonił. Wutrobne přećelstwo přez lětdźesatki mjez čěskim a serbskim chórom traje dale, byrnjež jej 500 kilometrow puća dźěliło. Wotměnjawje běše program na žurli hosćenca Meja zestajeny. Zhromadna proba najebać mało časa bě so wudaniła. K tomu přinošowaštaj agilna dirigentka Janina Ptaková kaž tež fleksibelny a mjeztym nazhonity hudźbny nawoda Radworskeho spěwneho cyłka Pětr Cyž. Zwjazowacu moderaciju je wospjet Beno Bělk přewzał.
Ze starej techniku žito młóćili
Nazymske wiki přirody tysacy wopytowarjow přiwabili
Stróža (JK/SN). Nimo přewšo rjaneho lětnjeho wjedra su tež dobre nazhonjenja minjenych lět syły wopytowarjow na mjeztym 19. nazymske wiki přirody sobotu na dworje zarjadnistwa biosferoweho rezerwata Hornjołužiska hola a haty w Stróži přiwabili.
Lětuše hesło „Kłóski z pola – wčera a dźensa“ postajowaše poskitki wikowarjow kaž tež pokazki towarstwow a rjemjeslnikow. Tak poručachu pjekarjo chlěb ze starych abo pozabytych žitnych družin a informowachu k jich pozadkam a lěpšinam. Čłonojo Stróžanskeho do- mizniskeho towarstwa Radiška demonstrowachu, kak běchu něhdy ze słomy banty pletli. Za to wužiwachu słomu starych žitnych družin. Zajim staršich kaž tež młodych wopytowarjow zbudźi pokazka, kak so kosa klepa a z njej prawje syče. Wosebita atrakcija bě předstajenje, kak su něhdy žito z pomocu młóćawy a traktora młóćili.
Babylěćo w Delanach hišće ženje tak horce njebyło
Ralbicy (aha/SN). Štyrnaty raz su kónc tydźenja w Ralbicach swój swjedźeń Babylěćo přewjedli. Ženje pak njebě dotal na wšěch třoch dnjach tak horco kaž tónraz, praji wjesna předstejićerka Hana Krawcowa. Přiwšěm bě wona z wotběhom a wopytom zaso jara spokojom.
K zazběhej wubědźowaše so pjatk 13 wohnjowobornych mustwow, mjez nimi tři dorostowe, w hašenju. Jako najlěpši wopokazachu so kameradojo ze Sernjan/Róžanta. Mjez młodymi wobornikami bě to skupina Ralbicy/Róžant. Sobotu popołdnju, jako bě žiwe slěbro 30 stopnjow překročiło, wubědźowachu so štyri mustwa w ludobulu, při čimž Ralbičanske Rapaki dobychu. Wječorny dwuhodźinski program, kotryž Hana Krawcowa ryzy serbsce moderěrowaše, wuhotowa něhdźe 50 sobuskutkowacych wšěch generacijow. Jednotliwe skupiny předstajichu wjesne žiwjenje, ale tež modowa přehladka bě zapřijata.
Njesłuchać je wulki problem
Pod hesłom „Politika na statoku“ su wobydlerjo a politikarjo wčera w stejnišću Budyskeho powołanskokubłanskeho centruma na Židowskej 1 čiły dialog hajili. Zarjadowanje bě poskitk angažowanych Židowčanow k 1. Budyskim tydźenjam demokratije.
Budyšin (SN/at). Cyłu chwilu je Marko Šiman (CDU), zapósłanc Sakskeho krajneho sejma, słuchał, na to pak jima so słowa. „Wobdźělenje wobydlerjow je daloko preč wot wopřijeća demokratije“, wón rjekny a doda, zo poćahuje so wuprajenje na jeho wobkedźbowanja minjeneju dweju lět wot komunalneje hač do krajneje runiny. Wón ma za problematiske, zo zastupjerjo zarjadnistwow na wobydlerjow njesłuchaja. Přechětře je při namjetach rěč wo tym, zo „so to njehodźi“, byrnjež wotpokazanje njewobkrućene wostało. Mjez wobydlerjemi nasta zaćišć, zo njejsu zarjadnistwa scyła zwólniwe, so z jich myslemi bliže zaběrać.
Krótkopowěsće (12.09.16)
Ochranowske hesła 2017 wušli
Budyšin. Sydomnaty raz su w Ludowym nakładnistwje Domowina „Wšědne hesła“ Ochranowskeje bratrowskeje jednoty jako serbska kniha wušli. Znowa bě je Hinc Šołta zestajał. Bibliske słowo za kóždy dźeń zwjazuje wěriwych po wšěm swěće. Serbske wudaće nasta w zhromadnym dźěle ze Serbskim ewangelskim towarstwom a LND.
Raduš wuhotuje klětu swjedźeń
Podstupim. Hosćićelka klětušeho braniborskeho wjesneho a žnjoweho swjedźenja budźe městu Wětošowej přisłušaca wjes Raduš. Rozsud jury je agrarny minister kraja Jörg Vogelsänger (SPD) na lětušim swjedźenju w Beerfelde wozjewił. Raduš bu w 13. lětstotku prěni raz naspomnjeny a ma dźensa daloko znate hrodźišćo. Wulku rólu hraje tam turizm.
Dale a mjenje předewzaćow
Drježdźany. W Sakskej je dale a mjenje rjemjeslniskich předewzaćow. W prěnim połlěće je so ličba wo 642 na cyłkownje 57 657 firmow pomjeńšiła. Tole zdźělichu dźensa na sakskim rjemjeslniskim dnju. Po słowach jeho rěčnika wuchadźeja z toho, zo so ličba předewzaćow hišće dale pomjeńši. Jedna z přičin su pobrachowacy naslědnicy.
Policija (12.09.16)
Kolesowar so zranił
Chrósćicy. Při wšěch zranjenjach hišće zbožo měł je 34lětny muž sobotu rano w Chrósćicach. Kolesowar bě krótko do 9 hodź. ze swojim psom na Hórnikowej po puću, jako z dotal njeznateje přičiny balansu zhubi a padny. Runje w tym wokomiku jědźeše tam wosobowe awto typa Seat nimo. Do njeho muž z hłowu dyri, tak zo dyrbjachu jeho do chorownje dowjezć. By-li awto muža přejěło, by njezbožo zawěsće hórje wušło.
