Wulke přećahowanje w zwěrjencu
Krótkopowěsće (19.08.16)
Předewzaćeljo zjednoćeni
Drježdźany. Wuchodna Sakska ma wot najnowšeho dźěłowe zjednoćenstwo SPD za samostatnych předewzaćelow. Zwjazk su srjedu w Drježdźanach załožili, kaž zamołwići zdźěleja. Za předsydu wuzwolichu předewzaćela Rona Eckhardta z Bannewitza pola Drježdźan. Zwjazk ma so za mostytwarca mjez hospodarstwom a towaršnosću.
Za myto namjetowanaj
Budyšin. Mjez wosobami, kotrež su za Němske myto angažementa 2016 nominowane, staj tež Tim Döke z Budyšina a Wolfgang Goldstein ze Slepoho. Tole rozprawja rozhłosowy sćelak MDR. Döku běchu hižo loni za dźěło na dobro ćěkancow počesćili. A Goldstein je lawreat wobydlerskeho myta, dokelž so na šuli za demokratiju a tolerancu zasadźa.
Žadnej znamce do Čěskeje
Praha. Dwójku listowych znamkow „módru a čerwjenu mauritius“, najžadnišej a najdrohotnišej filatelistiskej drohoćince swěta, je anonymny čěski inwestor kupił. Płaćiznu za wobě znamce, wudatej lěta 1847 na kupje Mauritius, trochuja na štyri miliony eurow. Kupc chce je na swětowej filatelistiskej wustajeńcy 2018 w Praze zjawnosći spřistupnić.
Policija (19.08.16)
Njesćerpnosć změje sćěhi
Słona Boršć. Twarske dźěła na awtodróze A 4 pola Budyšina tuchwilu wuskutkuja, zo so tam nimale wšědnje dołhe rynki čakacych awtow tworja. Zawčerawšim je to 23lětnemu wodźerjej BMWja najskerje předołho trało. Wón zajědźe na nabóčne pasmo a tamne awta přesćahny. Hłupe za njeho jenož bě, zo je jedne z tychle awtow ciwilne jězdźidło awtodróhoweje policije było. Njesćerpnosć 23lětnemu nětko wunjese, zo změje 100 eurow pokuty płaćić a zo nimo toho dypk w Flensburgu dóstanje.
Šula spočatnje wohrožena była
Na mnohich wsach steja dźensa twarjenja, kotrež su něme swědki šulskich stawiznow. Po wjacorych městnach smy so minjene tydźenje na tutej stronje rozhladowali, započinajo kónc junija w Běłym Chołmcu. Zakónčimy stawizniski ekskurs dźensa w Čornym Chołmcu.
Wjace wobchadneje wěstoty trěbne
Wšědne žiwjenje w Mučowje je wšo druhe hač měrne, přetož zwjazkowa dróha B 96 ludźi chětro poćežuje. Nimo toho pobrachuja tam chódniki. Z naležnosću je so Kulowska měšćanska rada wčera na posedźenju zaběrała.
Z wjacorych městnow tele dny rozprawjeja, zo je so sezona hribow ...
W Róžeńće je kaolin z blida
Kamjenjanski zawod wčera nowu ležownosć za wudobywanje předstajił
Rakecy/Kamjenej (JK/SN). Kaolinownja w Kamjenej pola Rakec ma nowu móžnu płoninu, na kotrejž hodźi so kaolin wudobywać. Dotalna jama w bjezposrědnjej bliskosći zawoda budźe za něhdźe dźesać lět prózdna. Zo by produkcija zawěsćena była, je so zawod hižo sčasom za nowymi składami hospodarsce nuznje trěbneje surowizny rozhladował. Cyłkownje sydom wšelakich městnow zawod měješe, na kotrychž by so hodźało za njej pytać a wotpowědnje wulkosći składa móhli ju tež wudobywać.
Krótkopowěsće (18.08.16)
Dalši stawk pola Amazon
Lipsk. Přistajeni internetneho wikowarja Amazon w Lipsku su dźensa znowa warnowanski stawk přewjedli. Na akciji je so w běhu dnja hač do 450 sobudźěłaćerjow wobdźěliło, kaž dźěłarnistwo ver.di zdźěli. Lipšćanska wotnožka wobsteji mjeztym dźesać lět. Hač do dźensnišeho pak nimaja přistajeni tarifowe zrěčenje, dźěłarnistwo kritizuje.
Braniborska předposlednja
Podstupim. Kubłanski system Braniborskeje zaběra po wšej Němskej předposlednje městno, před Berlinom. To je wuslědk přepytowanja „Kubłanski monitor 2016“, kotryž je Kölnski Institut němskeho hospodarstwa přewjedł. Fachowcy mjez druhim šwikaja, zo so socialny pochad dźěći wosebje sylnje na jich šulske wukony wuskutkuje.
Prócuja so wo Dźeń Saksow
Policija (18.08.16)
Walčki njezawěsćene byli
Jitro. Ratarske zawody maja tuchwilu dosć dźěła, zo bychu po žnjach žita walčki słomy do składow zwozyli. Pola Wóslinka a w Jitrom staj traktoristaj tele dźěło trochu na lochke ramjo brałoj. Mužej w starobje 18 a 45 lět měještaj swojemu traktorej stajnje dwaj připowěšakaj připowěsnjenej. Na kóždym z nich bě šěsć hoberskich słomjanych walčkow. Wone pak njeběchu ani z pasami ani z nabóčnymi sćěnami zawěsćene. Kóždy z traktoristow dyrbi nětko 60 eurow pokuty płaćić a dóstanje nimo toho dypk w Flensburgu.
