Krótkopowěsće (25.08.16)
Tysac swobodnych městnow
Drježdźany. W Sakskej je k zahajenju noweho wukubłanskeho lěta přeco hišće tysac wukubłanskich městnow njewobsadźenych. Najwjace swobodnych městnow maja we wobłukach elektrotechnika, sanitarne, tepjenje, klimowa technika a pola frizerow, rjemjeslniska komora zdźěla. Tež na mulerja, pjekarja, metalotwarca a třěchikryjerja móža so zajimcy hišće wukubłać dać.
Wutwarja wjesny puć
Chrósćicy. Dróhu Michała Hórnika w Chrósćicach chce Budyski wokrjes wot 5. septembra hač do kónca oktobra wutwarić. W tym času budźe wotrězk wot Pomnikoweho puća hač k wotbóčce do Stareje Cyhelnicy dospołnje zawrjeny. Tam wotwoža plesternaki a pokryja jězdnju z asfaltowej worštu. Nimo toho ma so dešćikowa woda porjadnje wotwodźeć.
Wosebity knižny dar
Policija (25.08.16)
W hribach so zabłudźił
Póckowy. 89lětny muž je wutoru popołdnju pola Póckowow do hribow šoł a so tam najskerje zabłudźił. Jeho syn alarmowaše wčera rano policiju. Na to je wjace hač 20 policistow, 16 Póckowskich wohnjowych wobornikow za rentnarjom pytało. Zasadźenej běštej tohorunja helikopter a wosebje wukubłany pos, tak mjenowany mantrailer. Krótko do připołdnja 89lětneho namakachu. W tym zwisku policija na to skedźbnja, při hribypytanju radšo handy při sebi měć, jeli so woprawdźe zabłudźiš.
Čłonojo towarstwa na wuprawje
Předsydstwo towarstwa Němčanskeho wětrnika organizowaše za swojich čłonow a spěchowarjow wuprawu jako dźak za aktiwne dźěło.
46 čłonow zetka so minjenu njedźelu k jězbje po domiznje wokoło Bjerwałdskeho jězora, dale přez Klětno a Chrjebju do Rěčic. Za mnohich bě tamniši wjelči centrum nowosć. Na wodźenju po Erlichtec dworje zhonichu mnohe historiske fakty wo prjedawšich wsach a twarskich stilach. Po słódnym wobjedźe dźěše dale do Mužakowa. W Lěšćoch wopytachu šokolodowu fabriku „Felicitas“ a móžachu někotre z jeje słódkich wudźěłkow woptać. Na kóncu mějachu składnosć, z wulkeho wuběra nakupować. Wulětnikarjo so předsydźe wětrnikoweho towarstwa Martinej Crügerej za zajimawu a powučnu jězbu dźakowachu a slubichu, přichodnje w towarstwje dale aktiwnje sobu dźěłać. Achim Nowak
Ćežke wobchadne njezbožo je so dźensa dopołdnja na statnej dróze ...
Škody wulkeje wody wotstronja
Wulka woda je před třomi lětami tež w Njeswačanskej gmejnje wulke škody načiniła, štož je zdźěla hač do dźensnišeho widźeć. Nětko maja so wone krok po kroku wotstronić.
Njeswačidło (SN/MWj). Zarosćene haty, skóncowane spušćadło, z błótom zanjerodźene hrjebje – tole su hišće dźensa widźomne sćěhi wulkeje wody lěta 2013 w Njeswačidle, Małym Holešowje, Dobrošicach a druhdźe. Přichodne tydźenje a měsacy budu tam na wjacorych městnach dźěłać, zo bychu škody wotstronili. Nadawki za to je Njeswačanska gmejnska rada na swojim wčerawšim posedźenju rozdawała.
Hosćencarjo přilubjeja pomoc
Zo njebychu pućowarjo w Delanach hłódni a lačni byli
Róžant (JK/SN). Na swoje zetkanje k dalšemu postupowanju při zwoprawdźenju pućowanskich šćežkow na gmejnskim teritoriju běchu sej čłonojo dźěłoweje skupiny gmejny Ralbicy-Róžant njedawno tež hosćencarjow a poskićerjow posłužbow přeprosyli. Wot nich chcychu wědźeć, kak daloko abo hač su scyła zwólniwi sobu skutkować nastupajo wulke wužadanje, gmejnu turistam a hosćom atraktiwnišu sčinić. W prěnim rjedźe dźe wo to, podłu móžnych pućowanskich šćežkow poskićeć zastaranje z jědźu a napojemi kaž tež pućowacym zmóžnić, zo sej přestawku popřeja.
Hosćencarjo z Ralbic, Nowoslic, Šunowa a Róžanta su zwólniwi a zahorjeni wo wotmysle, być dźěl noweho koncepta. Hižo nětko někotři z nich po potrjebje zastaranje hosći poskićeja. Tak praji Ralbičanski korčmar Pawoł Šołta: „Pola nas njeje hišće nichtó hłódny wostał. Je-li nam znate, zo chcedźa hosćo tule pozastać, so wo to postaramy, zo so tež nasyća.“ Podobnje wuprajištaj so Nowosličan Ludwig Dinar a Šunowski hosćencar Tomaš Wowčerk.
Prócuja so wo dalše wužiwanje bywšeje šule
Běły Chołmc (AK/SN). Za wot lěta 2011 prózdnu bywšu Běłochołmčansku zakładnu šulu „Fritz Kube“ chcedźa po móžnosći prawje bórze nowe wužiwanje namakać. „Dyrbimy spěšnje jednać, dokelž njemóžemy zamołwić, zo tónle komunalny objekt w běhu pjeć lět takle rozpaduje“, rjekny Běłochołmčanski wjesny předstejićer Thomas Rösler na njedawnym posedźenju Łazowskeje gmejnskeje rady. Dźěłowej skupinje, kotraž ma so nětko wo zwičnjenje twarjenja starać, přisłušeja Thomas Rösler, radźićel Ronald Woschik a nawoda twarskeho wotrjada Łazowskeho gmejnskeho zarjadnistwa Wolfgang Tietze. Hač do kónca awgusta poskićeja bywšu šulu internetnje pod www.imobilien.de. Dotal je so tam něhdźe 200 zajimcow wobhoniło, zdźěli Thomas Rösler. „Zajim njeje runjewon přemóžacy“, wón měni. Lěta 1953 natwarjenu šulu z 21 rumnosćemi, z nimale 20 000 kwadratnymi metrami ležownosće a z 85 kwadratnych metrow wulkim bydlenjom poskića gmejna Łaz za 220 000 eurow.
Krótkopowěsće (24.08.16)
Michałkowa hižo njekandiduje
Budyšin. Zapósłanča zwjazkoweho sejma Marja Michałkowa (CDU) njebudźe swójbnych přičin dla za klětuše wólby zwjazkoweho sejma hižo kandidować, kaž wčera zdźěli. Wot lěta 2002 wona za Budyski wólbny wokrjes w zwjazkowym sejmje skutkuje. Jako Serbowka so předewšěm za naležnosće narodnych mjeńšin zasadźa.
Krajiny Brankačkoweje wustajene
Drježdźany. Pod hesłom „pjećkróć KRAJINA“ su tuchwilu w Drježdźanskej galeriji „Himmel“ mólby pjeć wuměłcow widźeć. Nimo Iris Brankačkoweje, kotraž wustaja sydom twórbow, su to Ulrich Eisenfeld, Konrad Henker, Anne Kern a Uwe Peschel. Hač do 1. oktobra je přehladka přistupna.
Serbski podźěl na zapokazanju
Drježdźany. Na sobotnym zapokazanju noweho biskopa Drježdźansko-Mišnjanskeje diecezy Heinricha Timmereversa budźe tež serbski podźěl. Tak wobdźěla so družki na Božej mši, tež jedna próstwa budźe serbska. Chór 1. serbskeje kulturneje brigady swjatočnosć wobrubi. Dale wočakuja 32 biskopow z tu- a wukraja a tysacy wěriwych. Sćelak MDR zapokazanje live wusyła.
Olympisku chorhoj přijeli
Policija (24.08.16)
Tružki kradnyć chcyli
Kamjenc. Na mosazowe tružki, potajkim na barbity metal, měrjachu so njeznaći minjene dny na zawodowym terenje na Kamjenskej Nakładodwórnišćowej hasy. Tam namakachu zawčerawšim wjacore stabilne nakupowanske tity, napjelnjene z metalowymi třěskami w hódnoće něhdźe 1 000 eurow. Po wšěm zdaću bě sej něchtó tity přihotował, zo by je pozdźišo wotnjesł. Při dokładnišej kontroli policisća zwěsćichu, zo bu tam hižo do toho zamk pokradnjeny a zo běštaj znajmjeńša dwaj skućićelej na městnje.
Kupjel zaso wotewru
Budyšin. Po lětnjej přestawce budźe Budyska Röhrscheidtowa kupjel w Strowotnej studni wot póndźele, 29. awgusta, zaso přistupna. Minjene tydźenje su tam wšelake roły wuměnjeli, zdźěla nowe kachlicy kładli a wšu techniku překontrolowali. Kupjel budźe wutoru a pjatk hižo wot 6.30 hodź. wočinjena, hewak wot 10 hodź.
Dobytk z lěsa
Kulow (AK/SN). Z wobhospodarjenja swojeho 162 hektarow wulkeho komunalneho lěsa wočakuje město Kulow w lěće 2017 něhdźe 3 500 eurow dobytka. Kaž w hospodarskim planje za komunalny lěs steji, chcedźa za nimale 20 000 eurow drjewo předać a nadźijeja so nimale 10 000 eurow přiražkow Sakskeje. Na tamnym boku změja 8 500 eurow wudawki za žně drjewa, za 14 500 eurow chcedźa płoniny zalěsnić a je hladać, k tomu přińdźe nimale 3 500 eurow zarjadniskich wudawkow.
Pjekarnja swjeći jubilej Kubšicy. Na swój 125lětny jubilej zhladuje tele dny Kubšiska Richterec pjekarnja. Pjatk, 26. awgusta, móža tam dźěći popołdnju pjec, wječor budźe swjedźeń w stanje a zajimcy móža sej pjekarnju wobhladać. Sobotu, 27. awgusta, přeprošeja wot 9 hodź. na rańšu zabawu z dujerskej hudźbu a snědanju.
