Měšćanosta suspendowany

Gubin. Předchłostany a znowa wuzwoleny měšćanosta Gubina Klaus-Dieter Hübner bu ze zastojnstwa suspendowany prjedy hač móžeše słužbu scyła nastupić. 64lětnemu běchu dźensa w tamnišej radnicy wotpowědnu zdźělenku předpołožili, jako chcyše wón runje dźěłać započeć. Pozadk rozkory je, zo bu Hübner w procesu korupcije dla z pruwowanskim časom pochłostany.

Wojerecy a Kamjenc pódla

Drježdźany. Z programom „aktiwne centrumy městow a wjesnych dźělow“ přewostaji Sakska lětsa 12,4 miliony eurow. Tež Wojerecy za centralny wobłuk stareho města a Kamjenc za torhošćo a Budysku hasu su wobstatk spěchowanja, z kotrymž móža města swoje srjedźišća porjeńšić. Suma wostawa něhdźe samsna kaž minjene lěta, zdźěli sakske nutřkowne ministerstwo.

Inwestuja dale

Drježdźany. Sakska je po wulkej wodźe lěta 2002 něhdźe 2,4 miliardy eurow za škitne­ naprawy a wotstronjenje škodow nałožiła. W naćisku etata za lěće 2017/2018 planuje swobodny stat dalše 205 milionow eurow. Tole zdźěli wobswětowe ministerstwo. Dotal je wone 12 400 projektow we wobjimje 1,5 miliardow eurow dowoliło.

Wo pizzu njerodźili

Wojerecy. Pizzeria bě w nocy na njedźelu zaměr njeznatych zadobywarjow. Po tym zo běchu so namócnje do wobchoda zadobyli, spytachu cigaretowy awtomat wočinić, štož pak so jim njeporadźi. Z registrowanskeje kasy pak rubichu třicyfrowu sumu pjenjez a zawostajichu cyłkownu wěcnu škodu 3 00 eurow. Kriminalna policija so z padom nětko zaběra.

Zawinowar njezboža ćeknył

Połčnica. Na lěwej jězdni awtodróhi A4 do směra na Drježdźany jěducy šofer Škodowki dyrbješe so njejapcy před nim na samsnu čaru měnjacemu njeznatemu awtu wuwinyć. Při tym zhubi kontrolu nad swojim jězdźidłom, kotrež poča so wjerćeć, zjědźe z awtodróhi a so na bliskim polu zwróći. 42lětna sobujěduca so ćežko zrani a ju dowjezechu do chorownje. Šofera a sobu jěducej dźěsći su ke kontroli tohorunja do chorownje dowjezli. Awto njeda so wjac wužiwać. Nastata škoda wučinja 6 000 eurow. Zawinowar njezboža so wotsali, policija z pomocu swědkow za nim slědźi.

Z Mazdu kontra sornikej

Budyšin (SN). Budyski muzej je wčera přewjedł wodźenje po měsće pod hesłom „Hospodarski rozkćěw a wulke twarske předewzaća – wuwiće města wot 1871 do 1914“. Diplomowy muzeologa Hagen Schulz předstaji wuchadźejo z hospodarskeho wuwića města a regiona wšelake dynamiske procesy a z nimi zwjazane wašnja twarjenja, z kotrymiž je so Budyšin wuwił na moderne srjedźne město.

Lěhwo wuspěšnje zakónčili

Budyšin (SN). 53 dźěći a młodostnych je so dźens popołdnju z rěčneho lěhwa SŠT we Wodowych Hendrichecach nawróćiło. Towarstwu bě so poradźiło, wšitke zarjadowanja a wobchadnu rěč w serbšćinje zaručić. Nimo kupanja a pućowanja zaběrachu so wobdźělnicy lěhwa z fotografowanjom, pospytachu so w tykanju sačkow, woni rejwachu a dźiwadźelichu. Na kemšach w Leutersdorfje zanjesechu tež serbske kěrluše. Zajim za lěhwo bě lětsa wosebje wulki, štož swědči wo prawym koncepće SŠT.

Móžnosće wuchowanja w nuzowych padach dale wudospołnjene

Budyšin (UM/SN). Na Lětońskim lětanišću pola Budyšina zasadźeny helikopter ADAC hodźi so přichodnje za wuchowanske akcije z powětra hišće efektiwnišo zasadźeć­. Město dotalneho kruteho po­wjaza ma nětko wuchowansku powjazowu wijawu (Seilwinde). „Tale připrawa ma wjacore lěpšiny“, wujasnja pilot Olaf Iltzsche­. „Wuchowanske mustwo móže so tak wěsćišo a dokładnje wotsadźić.“ Wobsadka helikoptera a z njej wusko hromadźe dźěłaca Sakska hórska słužba liča wosebje za dźěło w Žitawskich horach a w Sakskej Šwicy z lěpšej a spěšnišej pomocu w nuzowych padach. „Z wijawu móžemy tež wosoby z wody, z njepřistupnych kónčin abo samo z wěžow abo milinowych wětrnikow wuchować“, Olaf Iltzsche rozłožuje, „dalša lěpšina je: Pacient hodźi so nětko direktnje do helikoptera zaměstnić, potajkim bjez dotalneho mjezypřizemjenja.“