Krótkopowěsće (14.09.16)
Sezona najwuspěšniša była
Zły Komorow. Hrajna doba 2015/2016 bě za Złokomorowske Nowe jewišćo najwuspěšniša minjenych dźesać lět. Tak su pod intendantom Manuelom Soubeyrandom dohromady 73 030 přihladowarjow witali. Lětsa zhladuje Złokomorowske dźiwadło na 70lětne wobstaće. Nowu sezonu zahaja 24. septembra ze swjedźenjom „Wir sind 70! Das Fest“.
Zjawne ertne jednanje
Luxemburg. Europske sudnistwo w Luxemburgu chce prawnisku naležnosć iniciatiwy Minority SafePack přećiwo komisiji EU pjatk, 16. septembra, w zjawnym jednanju wobjednać. To zdźěli dźensa Federacija europskich narodnych mjeńšin (FUEN). Jeje prezident Loránt Vincze rěči wo „mězniku za FUEN a awtochtone mjeńšiny w Europje“. Komisija EU bě namjety federacije před třomi lětami bjez wobkrućenja wotpokazała.
W Sakskej wuběrne žně
Najstarša Budyšanka 107 lět
Klětu snano zaso ze swjedźenskim ćahom
Komorow (HN/SN). Hakle prěni kónc tydźenja w septembru běchu w Komorowje pola Klukša wulke zetkanje wosobowych awtow typa VW Käfer přewjedli. A hižo minjeny kónc tydźenja steješe w samsnej wsy 54. holanski swjedźeń na programje. Zakład dołheje tradicije bě w lěće 1956 Domowina połožiła. Pod jeje wjednistwom wuwiwaše so Komorowski swjedźeń k jednomu z najwjetšich tehdyšeho Budyskeho wokrjesa. Po přewróće dóńdźe k přestawce, kotruž pak 1999 ze załoženjom towarstwa Komorowske holanske zetkanje skónčichu a swjedźeń wožiwichu.
Prěni wjeršk bě minjeny pjatk smólnicowy ćah, kotremuž přizamknychu so reje hač do nocy. Sobota steješe cyle w znamjenju sporta, jako wuslědźichu dobyćerjow pokalow wjesnjanosty w třělenju, darće, kehelowanju a volleyballu. Njedźela bě swójbam wěnowana. Tak mějachu dźěći na swjedźenišću swoje zawjeselenja, liveband nA und postara so wo spodobnu hudźbu, a w tomboli sy móhł jako hłowne myto koleso dobyć. Překwapjenka bě popołdnju demonstracija moderneje žnjenskeje techniki.
Policija (14.09.16)
Drohi diagnozowy nastroj fuk
Mužakow. Wšelki grat kaž tež kompjuter su njeznaći w nocy na póndźelu z awtoweje zamkarnje w Mužakowje pokradnyli. Tež diagnozowy nastroj ležeše njezamknjeny w hali, a zadobywarjo njedachu sej dwójce kazać jón sobu wzać. Tele nastroje su paducham awtow wulce witane, dokelž móža z nimi motor jězdźidła tež bjez klučika startować. Rada policije, diagnozowe nastroje kaž pjenjezy po dźěle do trezora zamknyć, njebu w tymle padźe wobkedźbowana. Škoda wučinja 10 000 eurow.
Dobytk za kulturu regiona
Z jónkrótnej přiražku gmejna Łaz Mortkowsku twjerdźiznu podpěruje
Łaz (AK/SN). Za dźiwadłowe inscenacije na Jakubecec twjerdźiznje w Mortkowje přida Łazowska gmejna klětu jónkrótnje 2 100 eurow. Tole su wčera Łazowscy gmejnscy radźićeljo wobzamknyli a tak próstwje mějićela twjerdźizny dr. Andréja Jakubetza wotpowědowali.
Dr. Jakubetz bě so pola kulturneho ruma Hornja Łužica-Delnja Šleska wo spěchowanje moderneje swěcoweje a zwukoweje techniki prócował. Po płaćiwych směrnicach pak ma so wotpowědna gmejna – w tym padźe Łazowska – z pjeć procentami wobdźělić. „Jako priwatna wosoba po zakonju tele pjenjezy přidać njesměm“, rozłoži Jakubetz. Wón chce twjerdźiznu jako kulturne městno dale wutwarić. Hakle njedawno je tam Serbski ludowy ansambl hrodowej nocy wuhotował a chce to tež klětu. Sakske krajne jewišća so klětu tohorunja w Mortkowje znowa prezentuja. Předewšěm inscenacije za swójby chcedźa tule pokazać. Techniku sej stajnje wupožčować pak načinja wudawki. Tuž ma swójska technika wotpomhać.
Jara porjadne dźěło smě so štyrjom přistajenym dźěłaćerjam ...
Jednohłósnje so za wohroženu čaru wuprajili
Wosobowy železniski bliskowobchad mjez Zhorjelcom a Wojerecami je wohroženy. Po Zhorjelskim wokrjesnym sejmiku wupraji so wčera tež Budyski sejmik za to, čaru zachować.
Budyšin (SN/at). Budyskemu wokrjesnemu sejmikej přisłuša dalši Serb. Dr. Pětš Milan Jahn-Brězan z Debsec je nowy wokrjesny radźićel frakcije SPD/Zelenych. Wón naslěduje Katju Altmann, kotraž bě do Drježdźan přećahnyła. Dokelž nětko hižo w Budyskim wokrjesu njebydli, je wona mandat wróćiła. Krajny rada Michael Harig (CDU) je noweho radźićela na spočatku wčerawšeho posedźenja wokrjesneho sejmika spřisahał, při čimž skónči Jahn-Brězan swój slub ze serbskimi słowami „Dalokož mi Bóh pomha“. Hač naslědnik tež městno předchadnicy w kulturnym a kubłanskim wuběrku přewozmje, abo w hinašim wuběrku skutkuje, wo tym ma wokrjesny sejmik hišće rozsudźić. Nowa zestawa wuběrkow bu hakle w juniju wobzamknjena.
Krótkopowěsće (13.09.16)
Rozestajeja so ze stawiznami
Drježdźany/Budyšin. Šulerjo ze Sakskeje a dalšich dźesać zwjazkowych krajow rozestajeja so we wobłuku stawizniskeho campa sakskeho kultusoweho ministerstwa z temu přesćěhanje w NDRskim času. Za to chcedźa mjez druhim tež Budyske wopomnišćo stasijastwa wopytać a so z časowymi swědkami rozmołwjeć. Camp wotměwa so wot dźensnišeho hač do 17. septembra.
Płaćizny stabilne wostali
Wiesbaden. Inflacija w Němskej je dale na niskim niwowje. Po třoch měsacach z přiběracej inflaciskej ratu wostachu płaćizny za přetrjebarjow w awgusće stabilne, zdźěli dźensa Zwjazkowy statistiski zarjad we Wiesbadenje. Tak ležachu wone 0,4 procenty nad měsacom junijom a wostachu njezměnjene.
Knihownja pčołki plahuje
Most. Měšćanska biblioteka w sewjeročěskim Mosće móže so ze swójskim mjedom pyšić. Dźakowano dźesatkam lipow blisko domu móžachu přistajeni na třěše twarjenja kołćej zaměstnić a njedawno prěni měd „žnjeć“. Z nim chcedźa wuměłcow a druhich hosći, kotřiž so přichodnje na kulturnym programje knihownje wobdźěla, wobdarić.
Šulerjo z wučerjemi škotowali
Dekanatna młodźina do Sakskeje Šwicy sej wulećała
Wjace hač 120 młodostnych je so zawčerawšim na wulěće serbskeje dekanatneje młodźiny do Sakskeje Šwicy wobdźěliło. Po tym zo běchu na njedźelnej Božej mši w serbskich wosadach šulerjow 9. lětnika do kruha wosadneje młodźiny přiwzali, zetkachu so wšitcy wobdźělnicy po wobjedźe w Chrósćicach. Busaj a transporteraj dowjezechu jich do Bad Schandauwa. Tam rozdźěli so syła do dweju skupin. Jedna padlowaše z gumijowymi čołmami za dźesaćoch do Wehlena. Tamni začuwachu spěšnosć tak mjenowaneho speed-čołma na połhodźinskej jězbje po Łobju. Někotři z čołmikowarjow horceho słónčneho wjedra dla do Łobja skočichu a so wochłódnichu. Po dwěmaj hodźinomaj wšitke čołmiki cil we Wehlenje docpěchu.
