Policija (15.07.16)
Z peletami do přirowa
Ketlicy. Z dotal nic dokładnje znateje přičiny je wčera popołdnju 24lětny wodźer nakładneho awta pola Ketlic blisko Lubija na statnej dróze S 112 z puća do přirowa zjěł. Na awće bě 30 tonow drjewjanych peletow k tepjenju. Te dyrbjachu najprjedy na hinaše jězdźidło překładować, prjedy hač móžachu znjezbožene awto zaso na puć stajić. Młodemu šoferej so na zbožo ničo njesta, wěcna škoda pak wučinja něhdźe 40 000 eurow.
Přeproša młodych ludźi
Budyšin. Zapósłanča zwjazkoweho sejma Marja Michałkowa (CDU) přeproša młodych ludźi w starobje 18 do 28 lět na zarjadowanje wo politice a wo hódnotach wot 21. do 23. septembra w Berlinje. W tym času wotměja so tam pod kmótřistwom prezidenta zwjazkoweho sejma Norberta Lammerta 24. dny zetkawanja. Ličba městnow je wobmjezowana. Zajimcy njech přizjewja so pod telefonowym čisłom 03591/ 351 205.
Puć móža twarić
Kamjenej. Prawniske rozestajenje wo kolesowanski pućik při zwjazkowej dróze B 96 je wotzamknjene. Šło je wo něhdźe tři kilometry dołhi wotrězk z Kamjeneje pola Rakec hač do Stróže. Wobsedźer ležownosće bě přećiwo krajnemu zarjadej za dróhotwar a wobchad skoržił, zo nochce swoju pódu předać. Zwjazkowe zarjadniske sudnistwo je skóržbu nětko wotpokazało. Pućik, kotryž hižo wot lěta 2009 planuja, móhli klětu w prěnim połlěće twarić započeć.
Šula w Dobrošicachjenož krótki čas wobstała
Tež bywša šula w Dobrošicach, hdźež pak wučachu dźěći jeničce 14 lět, je k šulskim stawiznam w našej kónčinje přinošowała. Zajimawe, zo njebu jako kubłanišćo twarjena, ale jako knježi hród. Ze zawjedźenjom šulskeje winowatosće 1835 w Sakskej mějachu dźěći z Koslowa, Hórkow a Dobrošic do Chrósćic abo do Róžanta, tehdy wězo pěši, jara daloki šulski puć. Starši z tychle wsow so 1897 z wjacorymi listami wyšnosći wo twar šule prócowachu. Dokelž pak njeběchu sej wo twarskim městnje přezjedni, dokelž njebě nabožina jako předmjet zaručena a dokelž njeběchu pjenjezy za twarske wudawki, šula w Dobrošicach njenasta. W 1930tych lětach starši znowa doraznje swoje žadanje zastupowachu, štož so wospjet njeporadźi.
Spěchuje twarske naprawy
Drježdźany (SN/JaW). Sakski krajny zarjad za dróhotwar a wobchad (LASuV) je spěchowanske srědki za wjacore twarske naprawy w Hornjej Łužicy přizwolił. Kaž ze zdźělenki zarjada wuchadźa, chcedźa w Husce hač do klětušeho nowe bjezbarjerne busowe dwórnišćo ze štyrjomi zastanišćemi a dalše zastanišćo we wsy natwarić. W Dobruši matej nowej busowej zastanišći nastać. Za to přewostaja statne ministerstwo za hospodarstwo, dźěło a wobchad we wobłuku spěchowanja k polěpšenju wuměnjenjow w regionalnym bliskowobchadźe gmejnje Dobruša-Huska 338 000 eurow spěchowanja, štož wučinja 75 procentow.
W Rachlowje pod Čornobohom wotstronja z pomocu spěchowanja LASuV škody wulkeje wody z lěta 2013. Tam natwarja fachowcy skłoninu při Splóšćanskej wodźe bjezposrědnje při statnej dróze S 110 a wuporjedźa jězdnju na křižowanišću. Wudawki we wobjimje 50 000 eurow zarunatej Zwjazk a Swobodny stat Sakska ze srědkow k sporjedźenju škodow wulkeje wody.
Zhromadnosć trěbna
Nětko móža třěchu ponowić
Towarstwo Margarećineje hěty spěchowanske srědki dóstało
Wulka Dubrawa (HN/SN). Wulke wjeselo knježeše wčera we Wulkodubrawskej Margarećinej hěće. Tam móža nětko skónčnje třěchu 120 lět stareho fabrikskeho twarjenja ponowić, hdźež je spěchowanske towarstwo muzej zaměstniło. Móžno je to z 30 000 eurami spěchowanskich srědkow, kotrež je šef sakskeje statneje kenclije dr. Fritz Jäckel (CDU) zastupjerjam spěchowanskeho towarstwa wčera přepodał. Přitomna bě zapósłanča zwjazkoweho sejma Marja Michałkowa (CDU), kotraž je do přewróta w Margarećinej hěće dźěłała.
Z lanym wolijom a narodnej drastu
Krótkopowěsće (14.07.16)
Žane zapławjenja njebyli
Budyšin. Za dźensa připowědźene móžne zapławjenja sylneho dešća dla su w Hornjej Łužicy wuwostali. Byrnjež so cyły dźeń dešćowało, rěki mnóstwa wody přiwzachu a njejsu přeběželi. Pegele, mjez druhim Klóšterskeje wody a Čornicy, drje postupichu hač do popołdnja wo něhdźe 30 centimetrow a dalše zdźěla wjace, wostachu pak pod alarmowym schodźenkom.
WWF přilubja myto
Berlin. Po najnowšim morjenju wjelka w Sakskej přilubja wobswětoškitna organizacija WWF 25 000 eurow za rozsudny pokiw na skućićela. Nimo toho žada sej WWF intensiwniše přesćěhanje skućićelow. Minjene tři lěta su w Němskej 18 wjelkow ilegalnje morili. Pola Biehaina w Zhorjelskim wokrjesu nańdźechu minjenu sobotu zatřělenu wjelčicu.
Kritizuja nowy zakoń
Policija (14.07.16)
Alkohol a cigarety kradnyli
Budyšin. Wobchod na Budyskej Kotołskej bě zawčerawšim w rańšich hodźinach cil dotal njeznatych paduchow. Po tym zo běchu so tam namócnje zadobyli, pokradnychu z wobchoda wjacore bleše likera, někotre kartonki cigaretow a kašćik piwa. Škodu rubizny trochuje mějićel na něhdźe tysac eurow.
Awtomat rozbuchnyli
Lejno. Na chětro spektakularne wašnje su sej dźensa w nocy njeznaći cigarety přiswojili. W Lejnom pola Wojerec rozbuchnychu woni cigaretowy awtomat. Detonacija bě najskerje poměrnje sylna, přetož blachowe dźěle běchu we wotstawku wjacorych metrow rozbrojene. Skućićeljo wurumowachu z awtomata cigarety w hódnoće 400 eurow, wěcna škoda je dźesać króć wjetša.
Přewjedu prózdninsku zaběru
Budyšin. W poslednim tydźenju lětnich prózdnin wot 3. do 5. awgusta přewjedźe Rěčny centrum WITAJ zaběru w domje Jurja Brězana w Hornim Hajnku. Wšědnje wot 8.30 hač do 11.30 hodź. smědźa so na njej šulerjo 3. do 6. lětnika wobdźělić. Dźěći budu tam mjez druhim paslić, hry hrać, čitać, wotpinać a so wjele hibać móc. Zajimcy móža so tež za jednotliwe dny přizjewić, a to pod telefonowym čisłom 03591/ 550 400 abo e-mailnje pod adresu .
Film z Berlinskej dróhu
Drježdźany. We wobłuku krótkofilmoweje nocy pokazaja jutře, pjatk, w Drježdźanach na wjacorych městnach a w běhu dnja stajnje wospjetujo film „friedenkriegen“. Je to rysowana animacija wo wójnje a měrje. Widźeć budźe film mjez druhim w nimale 90 tramwajkach, na hłownym dwórnišću a na lětanišću. Wječor předstaja pask w filmowej nocy při Łobju. Tam potom hudźba skupiny Berlinska dróha tež live zaklinči.
