Len w mnohich wariantach
Přirodne wudźěłki tysacy ludźi k baroknemu hrodej přiwabili
Ramnow (BW/SN). Cyle w znamjenju lena a najwšelakorišich wudźěłkow z tejele rostliny steješe kónc tydźenja Ramnowski barokny hród. Tam přewjedźechu mjeztym hižo 21. raz mjezynarodne lenowe dny. Štož bě so 1995 z małej horstku wikowarjow a něšto stami wopytowarjow započało, je dźensa hotowy magnet z něhdźe 200 wikowarjemi. Po tysacach přijědźechu ludźo do Ramnowa, a kaž awtowe znački přeradźeja nic jeno z Łužicy, ale tež z Berlina, Drježdźan, Riesy, Durinskeje, Saksko-Anhaltskeje a wot druhdźe. Publikum pak je stajnje móhłrjec trochu wuběrany, přetož hdyž dorosćeny najprjedy dźesać eurow zastupa płaći, žno dyrbi so wón chětro za lenowe wudźěłki zajimować.
Štož pak na wopytowarjow čaka, móžeše so sobotu a njedźelu widźeć dać. Hudźbna zabawa na dwěmaj jewišćomaj z bigband a dalšej kapału za rejwansku hudźbu, dudlowar, dźěćaca zaběra, klankodźiwadło a wjele dalšeho skićachu w parku a před hrodom samym dosć wotměny. K tomu bě dosć móžnosćow sej něšto słódneho popřeć, a to nic jenož kołbasku a piwo.
Žnjenski nałožk na swjedźenju
Najebać horce wjedro je 5. dworowy swjedźeń Dubrjenskeho hosćenca wčera přewšo dobry wothłós žnjał. Prěni raz přewjedźechu tam wubědźowanje konjacych zapřahow.
Dubrjenk (HH/SN). Wopytowarjow z cyłeje blišeje wokoliny je wčera 5. dworowy swjedźeń Dubrjenskeho hosćenca přiwabił. Jeho šef Michał Krječmar měješe tuž ruce połnej dźěła. „Na tajkim dnju sej přeješ, zo maš tři abo štyri ruki“, hosćencar rjekny. Wjace hač 500 ludźi mějachu wón, jeho swójbni a dalši pomocnicy zastarać. Kaž kóžde lěto poskićachu k wobjedu serbsku kwasnu poliwku a chrěn z howjazym mjasom. Hižo dopołdnja móžachu so zajimcy na jězbu z konjacym zapřahom po Dubrjenskim bahnje podać abo słuchachu na zahrodźe hosćenca na dujersku hudźbu.
Policija (26.08.16)
Při dźěle znjezbožił
Budyšin. Ćežke dźěłowe njezbožo je so zawčerawšim na twarnišću noweje bydlenskeje štwórće při Budyskich Špitałskich łukach stało. Tam nastawa 23 jednoswójbnych domow. W jednym z nich je 51lětny dźěłaćer tak njezbožownje stupił, zo padny wón z wysokosće połdra metra na špundowanje. Při tym zrazy muž na stejacu železnu žerdź, kotraž so jemu do hornjeho sćehna zakłó. Ćežko zranjeneho dowjezechu jeho do Budyskeje chorownje. Dokładnu přičinu njezboža policija přepytuje.
Wopytowarjow bóle informować
Přirada za serbske naležnosće města Wojerec je na swojim wčerawšim posedźenju namjetowała, kak móhli wopytowarjow města wobšěrnišo wo Serbach wobhonić.
Wojerecy (AK/SN). We wobydlerskim centrumje Piwarska 1 měli so wopytowarjo přichodnje hłubšo a dokładnišo wo Serbach informować móc. Za to zasadźa so přirada za serbske naležnosće města Wojerec. „Chcemy kulturnu fabriku jako wobhospodarjerja a Domowinsku župu „Handrij Zejler“ pohnuć, zo so w tym nastupanju angažujetej. Wonej měłoj za kmanymi wobsahami a za spěchowanskimi móžnosćemi pytać“, podšmórny Dirk Nasdala, předsyda serbskeje přirady, po wčerawšim posedźenju. „Dźensa smy najprjedy raz wo prěnich myslach rěčeli.“
Krótkopowěsće (26.08.16)
Kral Nižozemskeje přijědźe
Drježdźany. Nižozemski kral Willem-Alexander přijědźe spočatk lěta 2017 do wuchodneje Němskeje. Tole zdźěli prezident Zwjazkoweje rady, sakski premier Stanisław Tilich (CDU), dźensa po zetkanju z monarchom w Den Haagu. Po dotalnym planowanju wopyta Willem-Alexander w februaru Saksku, Saksko-Anhaltsku a Durinsku.
Strach lěsnych wohenjow
Pirna. Horcota a suchota tomu polěkujetej, zo je strach lěsnych wohenjow jara wulki. Na sewjeru Sakskeje a podłu pólskeje mjezy su dźensa najwyši warnowanski schodźenk wukazali, kaž statny lěsniski zawod zdźěla. Tež w Budyskej kónčinje hroža wohenje. Kurić w lěsach je zakazane. Ludźo njesměli awta na suchej trawje wotstajić.
Kolesowarjo a alkohol
Praha. Senat, hornja komora čěskeho parlamenta, je změnu zakonja wo nadróžnym wobchadźe schwaliła. Tak měło kolesowarjam na pućach nišich kategorijow hač do 0,8 promilow alkohola dowolene być. Za wšě tamne jězdźidła płaći dale „nulowa toleranca“. Změnu, za kotruž so tež winicarjo zasadźeja, dyrbi delnja komora hišće schwalić.
Dalše elektroawto za wokrjes
Čěski dźěćacy chór Campanella přijědźe do Łužicy
Njeswačidło (LR/SN). Na lětuši třeći hrodowy koncert přeproša Njeswačanske towarstwo přećelow kultury a domizny sobotu, 3. septembra, do tamnišeho hrodoweho parka. To budźe zdobom posledni w rjedźe lětušich hrodowych koncertow. Wjeselić smědźa so wopytowarjo na znaty dźěćacy chór Campanella z čěskeho Olomouca. W lěće 1967 běštaj jón Karel Klimeš a jeho syn Jiří załožiłoj. Wot toho časa je chór něhdźe 1 200 króć w 45 krajach Europy, Azije, Afriki a Ameriki koncertował. Před dwanaće lětami bě spěwne ćěleso hižo raz hósć w Njeswačidle, štož bě tehdy wulke dožiwjenje.
W lěće 2013 wotmě so w chórje generaciska a strukturna změna. Při tym nasta Wuměłska zakładna šula Campanella Olomouc. Solistaj chóra Michaela Dvořáková a Jan Vaculík staj pedagogaj tuteje šule a zdobom čłonaj Morawskeho dźiwadła Olomouc.
Koncert wotměje so pod hołym njebjom před Njeswačanskim hrodom. Započatk budźe we 18.30 hodź. Zastupne lisćiki w předpředani poskića přichodnu njedźelu na hrodźe, wšědnje w Njeswačanskim časnikowym wobchodźe na Budyskej a w turistiskej informaciji w parku, wězo tež při wječornej kasy.
Policija (25.08.16)
W hribach so zabłudźił
Póckowy. 89lětny muž je wutoru popołdnju pola Póckowow do hribow šoł a so tam najskerje zabłudźił. Jeho syn alarmowaše wčera rano policiju. Na to je wjace hač 20 policistow, 16 Póckowskich wohnjowych wobornikow za rentnarjom pytało. Zasadźenej běštej tohorunja helikopter a wosebje wukubłany pos, tak mjenowany mantrailer. Krótko do připołdnja 89lětneho namakachu. W tym zwisku policija na to skedźbnja, při hribypytanju radšo handy při sebi měć, jeli so woprawdźe zabłudźiš.
Čłonojo towarstwa na wuprawje
Předsydstwo towarstwa Němčanskeho wětrnika organizowaše za swojich čłonow a spěchowarjow wuprawu jako dźak za aktiwne dźěło.
46 čłonow zetka so minjenu njedźelu k jězbje po domiznje wokoło Bjerwałdskeho jězora, dale přez Klětno a Chrjebju do Rěčic. Za mnohich bě tamniši wjelči centrum nowosć. Na wodźenju po Erlichtec dworje zhonichu mnohe historiske fakty wo prjedawšich wsach a twarskich stilach. Po słódnym wobjedźe dźěše dale do Mužakowa. W Lěšćoch wopytachu šokolodowu fabriku „Felicitas“ a móžachu někotre z jeje słódkich wudźěłkow woptać. Na kóncu mějachu składnosć, z wulkeho wuběra nakupować. Wulětnikarjo so předsydźe wětrnikoweho towarstwa Martinej Crügerej za zajimawu a powučnu jězbu dźakowachu a slubichu, přichodnje w towarstwje dale aktiwnje sobu dźěłać. Achim Nowak
Nawjes chcedźa dosaněrować
Ze spěchowanskimi srědkami a z wotpowědnym swójskim podźělom chce město Kulow lětsa wjacore dróhotwarske projekty zmištrować. Z nimi je so nětko měšćanska rada zaběrała.
Mučow (AK/SN). Wot Sakskeho zarjada za dróhotwar a wobchad (LASuV) dóstanje město Kulow lětsa po wšěm zdaću 94 000 eurow. Tele srědki wotpowěduja 90procentowskemu spěchowanju. Dźesać procentow přida Kulow jako swójski podźěl. „Tak móžemy naprawy za trochu wjace hač 100 000 eurow zwoprawdźić a na wjacorych městnach dróhi zwuporjedźeć“, rozłoži Jurij Brösan z twarskeho wotrjada měšćanskeho zarjadnistwa na zašłym posedźenju měšćanskeje rady w Mučowje. Tam chcedźa mjez druhim zbytny dźěl nawsy z asfaltowej worštu pokryć. Nimo toho matej so nadróžnej lampje přestajić.
