Wosebite wužadanje wjesnjanam
Lutobč (HN/SN). Na staw Lutobčanskeho wjesneho puća wosebje wokoło lodoweje pincy su so wobydlerjo w zašłosći hižo časćišo hněwali. Rozdźělnych geologiskich wuměnjenjow pod dnom dla bě dróha z dźěrami runjewon posyta. K tomu přińdźechu wulke problemy, hdyž so raz sylnišo dešćowaše a woda po puću ćečeše, dokelž běchu betonowe roły z 1950tych lět poćežowanja přez wobchad dla skóncowane.
Nětko da Radworska gmejna komunalnu dróhu wobšěrnje ponowić, wo čož stara so Wósporska hłubokotwarska firma. Prjedy pak hač připrawja nowu asfaltowu worštu, kładu nowe dešćowe roły do zemje, zo bychu tež tónle problem do horšće dóstali. Kaž twarski nawoda Ringo Linke wobkrući, njeje Lutobčanske twarnišćo hladajo na zemske wobstejnosće žane jednore. Přiwšěm tuchwilu derje w planje postupuja a chcedźa projekt k dobremu kóncej wjesć.
Dokelž jedna so w Lutobču wo komunalnu dróhu, ma gmejna projekt na starosći. Po wuprajenju nawody Radworskeho twarskeho zarjada Volkmara Kocha su za to 129 000 eurow w lětušim etaće zaplanowali. Hač do kónca junija chcedźa twarske dźěła zakónčić.
Pjenjezy koparskemu towarstwu
Ze 70 000 eurami ma město Budyšin regionalnemu koparskemu ligistej Budissy Budyšin pod pažu přimnyć. W měšćanskej radźe, kotraž wo tychle pjenjezach rozsudźi, pak nimaja to wšitcy jeje čłonojo za woprawnjene.
Budyšin (CK/SN). Z wuwzaćnej financnej pomocu 70 000 eurow spěchuje město sportowe towarstwo FSV Budissa Budyšin. To je wjetšina měšćanskeje rady na jeje zašłym posedźenju schwaliła. Pjenjezy su myslene jako přiražka za kóšty wobhospodarjenja dorostoweho wukonoweho centruma w Humboldtowym haju, kotryž je towarstwo same modernizowało. Kaž wyši měšćanosta Alexander Ahrens (njestronjan) měšćansku radu informowaše, su nimo toho strukturne změny trěbne, zo by towarstwo – wothladajo wot sportoweho wukona – w regionalnej koparskej lize wostać móhło. Hewak by tež dalše dorostowe dźěło wohrožene było.
Krótkopowěsće (19.05.16)
Wo Smolerju přednošował
Pančicy-Kukow. Dr. Fabian Kaulfürst je wčera čłonam Domowinskeje skupiny Pančicy-Kukow zajimawje a powučnje wo Janu Arnošće Smolerju přednošował. W formje puzzla znazorni wón wažne stacije Smolerjoweho žiwjenja a jeho woporliweho skutkowanja. Připosłucharjo měnjachu, zo by so přednošk tež za dalše serbske cyłki hodźał.
Přichod fondsa zawěsćeny
Praha. Kaž je čěski premier Bohuslav Sobotka informował, chce tamniše knježerstwo schwalić, zo ma so dźěławosć lěta 1997 nastateho Čěsko-němskeho fondsa přichoda dale wjesć. W lětach 2018 do 2027 chce čěska strona za fonds nałožić dźesać milionow eurow; Němska měła k njemu po dorěčenju 25 mio. eurow přinošować. Ze srědkow fondsa běchu minjeny čas tež wjacore Serbow nastupace projekty spěchowali.
Wučerjo SGB najlěpši
Budyšin. Wučerske volleyballowe mustwo Serbskeho gymnazija Budyšin je dźesaty króć wokrjesny mišter. We wčerawšej poslednjej hrě sezony 2015/2016 porazy wone pedagogow Pestalozzijoweje wyšeje šule Lubij z 2:0 (25:15, 25:22). Wobdźěliło je so na mišterstwach šěsć wučerskich mustwow.
Policija (19.05.16)
Dźěćom wjeselo skazyli
Wojerecy. Po wšěm zdaću su samo rostliny do zahrodki někotrym sobučłowjekam předrohe, zo je radšo něhdźe kradnu. Na Roberta Schumannowej we Wojerecach su sej za to šulsku zahrodku wupytali. Tam dyrbjachu zawčerawšim zwěsćić, zo bě něchtó kerčki holanskich a janskich jahodkow kaž tež kosmačkow pokradnył, nimo toho wjace hač 20 stabow za tomatowe rostliny. Paduši njejsu tak jeno 160 eurow wěcneje škody načinili, ale holcam a hólcam zawěsće tež wjeselo na šulskej zahrodźe skazyli.
Swjatki njedźelu su Worklečenjo swoju meju powalili. Program ...
Twarja najzašo za dwě lěće
Planowany kružny wobchad w Zejicach wobydlerjam rozłožili
Zejicy/ Lejno (Žu/SN). Horstka ludźi sćěhowaše wčera wječor w Lejnje wuwjedźenja wo planowanym twarje kružneho wobchada w Zejicach. Najzašo za dwě lěće maja so tam twarske dźěła zahajić. Daniel Köhler z krajneho zarjada za dróhotwar a wobchad (LASuV) je tuchwilny staw projekta rozłožił. Wo nim rozmyslować započeli běchu lěta 2012. Přiběraca ličba njezbožow bě hłowna přičina, na městnje křižowanišća dróhow S100/S101 kružny wobchad zarjadować. Prěnjotny naćisk zwrěšći na falowacej kolesowanskej šćežce. Njedawno hakle bu nowy naćisk schwaleny, wopřijacy kružny wobchad z integrowanej kolesowanskej šćežku kaž tež separatny kolesowanski pućik mjez Zejicami a Lejnom. Nětko póńdźe wo nakup za to trěbnych ležownosćow.
Wužadani do přichoda myslić
Wjacore wažne temy stejachu na dnjowym porjedźe wčerawšeho posedźenja Chróšćanskeje gmejnskeje rady. Spočatnje wobhonichu so w nowej pěstowarni wo tuchwilnym stawje dźěłow.
Chrósćicy (JK/SN). Po słowach wjesnjanosty Marka Klimana (CDU) wotpowěduje tuchwilny staw planej, molerske dźěła postupuja a dłóžbarjo pilnje dźěłaja. Přiwšěm wujewja so nowy problem. Zo móhli pěstowarnju z meblemi wuhotować, běchu spěchowansku próstwu stajili. Ta pak bu wotpokazana a gmejna ma nětko cyłu sumu 38 000 eurow sama zwjesć. Mobiliar wšak měješe so po połojcy spěchować. Na přichodnym posedźenju gmejnskeje rady chcedźa wobzamknyć, srědki ze spěchowanja po zakonju wo zesylnjenju inwesticiskeje mocy, kotrež běchu zwoprědka za ponowje- nje dróhi z Chrósćic do Hórkow zaplanowali, za mobiliar pěstowarnje wužić.
Krótkopowěsće (18.05.16)
Protestny camp rozpušćeny
Miłoraz. Policija je dźensa rano protestne lěhwo we Łužicy wobstupiła a camp LAUtonomia rozpušćiła. Demonstrantam, kotřiž su wot spočatka měrca na štomach w bjezposrědnim susodstwje Wochožanskeje wuhloweje jamy žiworili, wumjetuja ranjenje domjaceho měra, kaž medije rozprawjeja. Dźensa bě w lěhwje něhdźe 20 ludźi, kotrychž policija wšitkich sobu wza.
Skóržby přećiwo VW zapodali
Braunschweig. W zwisku ze skandalom manipulowaneho wotpłuna dla je na Braunschweigskim krajnym sudnistwje dotal 46 skóržbow wobsedźerjow awta VW dóšło. Dźěl ludźi sej žada, zo směli swoje manipulowane wozy awtotwarcej wróćić. Tamni žadaja sej wot Volkswagena wotškódnjenje, sudnistwo zdźěli.
Nanowski dowol schwaleny
Praha. Čěske knježerstwo je naćisk zakonja schwaliło, po kotrymž móhli po narodźe dźěsća tež nanojo tydźeń doma wostać. W tym času změja woni prawo na 70 procentow mzdy. Čěska chce so tak do 23 z cyłkownje 28 krajow EU zarjadować, kotrež formu płaćeneho „nanowskeho dowola“ praktikuja. Nowelu dyrbi hišće parlament schwalić.
Policija (18.05.16)
Za wopitym hižo pytali
Pěskecy. 24lětneho wodźerja Audija su zawčerawšim w Pěskecach kontrolowali a pola njeho 1,8 promilow alkohola w kreji zwěsćili. Při přepruwowanju personalijow zwěsćichu, zo za młodym mužom hižo pytaja. Wón bu přeńdźenja přećiwo zakonjej wo winowatostnym zawěsćenju dla k 1 500 euram pokuty zasudźeny, kotrež hišće zapłaćił njebě. To wón na městnje nachwata a wuńdźe tak zajeću.
W Hejničanskej cyrkwi do rownišća pohladali
Předsydstwo Katolskeho zjednoćenstwa kubłarjow Sakskeje (KEG) je swojich čłonow njedawno na kóždolětnu kubłansku jězbu přeprosyło. Lětuša wuprawa wjedźeše 39 wosobow, mjez kotrymiž běše połojca serbskich kubłarkow a kubłarjow, do sewjeročěskeje hraničneje kónčiny w Jizerskich horinach. Hłownje organizował bě ekskursiju městopředsyda zjednoćenstwa Franz Josef Fischer, wučer na Drježdźanskim gymnaziju swjateho Bena.
Prěni cil dnja bě městačko Frýdlant nad rěku Smědá ze swojim jónkrótnym hrodowym arealom na bazaltowej skale. Młoda čěska historikarka wodźeše nas we wuběrnej němčinje po tymle mócnym, jara derje restawrowanym hrodźe a jeho jednotliwych, wotpowědnje wuhotowanych rumnosćach z časa žiwjenja zemjanskeje towaršnosće wosebje 18. a 19. lětstotka.
