Spěchuja regionalne projekty
Wojerecy (SN). Załožba Łužiska jězorina spěchuje mjez druhim wulki Wojerowski chór. Klětu čini to we wobłuku projekta „The Armed Man – A Mass For Peace“. Gmejna Sprjewiny Doł móže so tohorunja při přewjedźenju stanowanskeho lěhwa na pjenježnu podpěru załožby wjeselić. Pozitiwnu wotmołwu na požadanje za spěchowanje dóstaštej dale gmejna Halštrowska Hola a Wojerowski sportowy klub. Tež přichodnje chce załožba wosebje towarstwa a gmejny podpěrać. Zajimcy móža hač do 23. septembra swoje próstwy za spěchowanje zapodać. Wuměnjenje je, zo su to projekty we wobłuku strowotnistwa, zo skića pomoc staršim ludźom kaž tež młodźinje.
Pruwuja wotewrjenske časy
Budyšin (SN). Budyski wobydlerski serwis ma wotnětka hinaše wotewrjenske časy. Přičina toho je změna organizatoriskeje struktury w zarjadnistwje. Zarjad je póndźelu a wutoru wot 8.30 do 12 hodź. a 13 do 16 hodź., srjedu wot 8.30 do 12 hodź., štwórtk wot 8.30 do 12 hodź. a 13 do 18 hodź. kaž tež pjatk wot 8.30 do 12 hodź. přistupny. Testowa faza skónči so kónc lěta. W času wot 1. do 12. awgusta wostanje wobydlerski serwis zawrjeny.
Chorownju wopytała
Historiski wobraz při čarje zachować
Zhorjelc (AK/SN). Mužakowska lěsna železnica hotuje so na přichod. Wona ma jako turistiska železnica wopytowarjam z Němskeje, Pólskeje, Čěskeje a dalšich krajow dale aktiwna wostać. „Ke klětušim jutram chcemy nowy wotrězk wot Běłowodźanskeho dwórnišća při Hatnej hač k wuhladnišću a informaciskemu srjedźišću Ćežka hora ze žiwjenjom napjelnić“, rozłožuje Heiko Lichnok, jednaćel lěsneje železnicy Mužakow tzwr.
Wot lońšeho oktobra hižo při čarje twarja. Štyri nowe železniske přechody, jedne zastanišćo a kónčna stacija Ćežka hora maja nastać. Kónc julija budu prěnje jězby na probu. To chcedźa zwěsćić, kak wěsta čara je a hač žadanjam wotpowěduje. Čara k Ćežkej horje naruna dotalnu z Běłeje Wody k hlinowej jamje w Miłorazu. Tu je so 2,5 kilometrow Wochožanskeje wuhloweje jamy dla zhubiło. Nowa čara wot dwórnišća Hatna hač k wuhladnišću a informaciskemu srjedźišću Ćežka hora je 3,3 kilometry dołha. „Zapołožene kolije nětko ze šoterom zasypuja a zhusćeja. „Historiski wobraz lěsneje železnicy Mužakow ma so na kónčnej staciji wotbłyšćować“, praji Heiko Lichnok.
Krótkopowěsće (21.07.16)
Vattenfall dale z minusom
Stockholm. Šwedski energijowy koncern Vattenfall je w 2. kwartalu lěta straty třoch miliardow eurow nadźěłał. Tež wobrot je dale woteběrał, kaž šef koncerna Magnus Hall dźensa ze Stockholma zdźěli. „Hospodarske połoženje wostanje niskich płaćinow miliny dla dale jara wobćežne“, wón rjekny. Hall chcył łužisku brunicowu wotnožku ručež móžno čěskemu koncernej EPH předać.
Spěchowanske srědki přepodała
Běła Woda. Sakska ministerka za socialne a škit přetrjebarjow Barbara Klepsch (CDU) je dźensa Běłowodźanskej wokrjesnej chorowni přizwolenje spěchowanskch srědkow nimale 1,5 milionow eurow za ponowjenje tamnišeje intensiwneje stacije přepodała. Twarske a techniske njedostatki wobstejaceje stacije maja so wotstronić.
Z truskalcami spokojom
Drježdźany. Sakscy ratarjo móža lětsa na dobre žně truskalcow zhladować. „Smy spokojom z kwalitu a mnóstwom“, měni předsyda krajneho ratarskeho zwjazka Sakski sad Gerd Kalbitz. Zliwki njejsu truskalcam tyli, přiwšěm bilanca spokojo. Kalbitz liči za Saksku z wunoškom něhdźe 3 000 tonow.
W Róžeńće tež klóšterskich duchownych serbšćinu wučili
Mamy drje w Róžeńće mnohim znatu staru a nowu šulu, hižo dawno pak šulske dźěći w nimaj wjac njewuknu. Znate je, zo wučeše hižo w 17. lětstotku tamniši wjesny krawc w Kašporkec chěžce wosrjedź wsy, dźensa na městnje Dittrichec a mjeztym Koklic statoka.
Po tym zo bě Róžeńčanska cyrkej ke klóštrej Marijinej hwězdźe přešła, staraše so tehdyši kěbětar Michał Glawš wo to, zo móhł klóšter 1777 napřećo cyrkwi šulu natwarić. Bě to na městnje dźensnišeho Wincarjec-Žurec statoka.
Piknik na Horach w přirodźe
Čłonojo Wojerowskeho kulturneho zwjazka 250 lět staru bróžnju wopytali
Hory (HH/SN). Na dźěłowym planje Wojerowskeho kulturneho zwjazka steješe za měsac julij piknik zwonka města, w přirodźe. Tak zetka so něhdźe 25 čłonow při Patokec bróžni na Horach. Swoju jědź běchu sej sobu přinjesli, wot kofeja hač k tykancej a solotjam. Birgit Patokowa, kotraž bróžnju – swědk to stareje łužiskeje ćěsliskeje wušiknosće – wobhospodarja, hosći wutrobnje witaše. A powědaše jim tójšto zajimaweho wo 1768 natwarjenej kładźitej bróžni. Nimo toho je mały lutk hosći witał, poskićejo jim chlěb lutkow w swojej typiskej drasće. Horjanka tež přeradźi, zo běchu hač do lěta 1970 baćony na bróžni hnězdźili. We Łužicy dźě dźerži so přiwěrk: Hdyž baćon na třěše hnězdźi, błysk do domu njedyri. W bróžni samej dopomina mnoho na serbske burske tradicije. Tak prezentuje so tam pokazka najrjeńšich jutrownych jejkow. Tež Lotar Balko, znaty a husto počesćeny debjer jutrownych jejkow, je tam swoje slědy zawostajił. Pod typiskimi módroćišćemi steja wšelake wjetše a mjeńše kołwróty.
Policija (21.07.16)
Motorski do štoma zrazył
Šćeńca. Dźensa něhdźe w 10 hodź. je 25lětny ze swojim motorskim na wokrjesnej dróze mjez Šćeńcu a Stróžu po puću z dotal njeznateje přičiny z jězdnje zajěł. Na to zrazy do štoma a wobchadneho znamjenja. Ćežko zranjeneho dowjezechu z helikopterom do Budyskeje chorownje.
Pytany wuměnkar zaso doma
Chelno. Wutoru wječor je policija na Budyskim Augusta Bebelowym naměsće dementneho muža nadešła. 87lětny bě bydlenje w Chelnje wopušćił. Po zdaću je na to z busom do Budyšina jěł.
Serbscy młodostni, kotřiž wobdźěla so na swětowym zetkanju ...
Sydom króć wšitke dźewjeć
Jedyn z najwoblubowanišich podawkow w běhu lěta je za Smjerdźečanow kehelowanski swjedźeń, na kotrymž so wšitke starobne skupiny wobdźěleja.
Smjerdźaca (aha/SN). Hakle druhe lěto steji 21lětny Pětr Rječka na čole agilneho Smjerdźečanskeho młodźinskeho kluba, kotryž ma něhdźe 30 čłonow. Znowa su woni mjeztym 36. raz wot minjeneho pjatka do njedźele sportowe a zabawne wubědźowanje wuhotowali, za čož žnějachu wulke připóznaće.
Dohromady wubědźowało je so 49 muži, 23 žonow a 17 dźěći. Dorosćeni mějachu 15 kulow kuleć, dźěći dźesać na skrótšenej čarje. Za čas wubědźowanja bě to dohromady 1 250 kulow, a 3 716 kehelow je padnyło. 158 króć dźěše kula do wobhrody (Bande). Za to pak přihladowarjo wulce wyskachu, jako sydom króć wšitke dźewjeć kehelow padny. Sobotu popołdnju so to Smjerdźečanam samo šěsć razow poradźi.
Knihi z telefonoweje budki
Delni Wujězd (JoS/SN). Wot póndźele wječora su w Delnim Wujězdźe wo atrakciju bohatši. Wosrjedź wsy steji telefonowa budka, w kotrejž je móžno sej wodnjo a w nocy knihi wupožčeć. Ideju za tajki njewšědny projekt zrodźiło bě domizniske towarstwo. Krótko po politiskim přewróće mějachu w Delnim Wujězdźe hišće biblioteku. Tola tajku dale wjesć, za to pobrachowachu trěbne pjenjezy a personal. Na tamnej stronje su tamniši wobydlerjo znaći jako aktiwni čitarjo, štož so wosebje wotbłyšćuje we woblubowanej akciji „čitanska zyma“. Tak je domizniske towarstwo darowane knihi wobydlerjow zběrało, a ma jich nimale 3 000. Wone wopřijimaja wšitke žanry a časy. Wjetši dźěl z nich su dźěćace. Prašenje tuž rěkaše: Dokal z telko knihami?
Pytaja korčmarja za přibrjóh
Gmejna Hamor chce zastaranje ludźi při Bjerwałdskim jězoru polěpšić
Hamor (AK/SN). Gmejna Hamor wusměrja so na temu elektromobilita. Tole podšmórny wjesnjanosta Achim Junker (CDU) na zašłym posedźenju gmejnskeje rady w swojej rozprawje k aktualnej situaciji. Energijowy koncern Vattenfall připrawi za elektromobilitu w zhromadnym dźěle z Braniborskej techniskej uniwersitu Choćebuz-Zły Komorow wotpowědny stołp za nabiwanje miliny při turistiskim informaciskim centrumje Bjerwałdski jězor na Hamorskim přibrjohu. Spěchowali su jón ze srědkow Europskeho fondsa za regionalne wuwiće – inwesticije do přichoda.
Wopytowarjo jězora maja składnosć, swoje elektroawto we wotewrjenskich časach turistiskeho centruma wot srjedy do njedźele z milinu natankować. „Nabiwanje płaći pawšalnje pjeć eurow přidatnje k parkowanskej přiražce a ma so při parkowanskim awtomaće płaćić“, Achim Junker rozłoži.
