Wulke přećahowanje w zwěrjencu
Dnjowy porjad změnić dyrbjeli
Wjesnjanosta gmejny Ralbicy-Róžant Hubertus Ryćer (CDU) njemóže chorosće dla tuchwilu swoje zastojnstwo wukonjeć. Wčerawše posedźenje gmejnskeje rady nawjedowaše tuž zastupowacy wjesnjanosta Tomaš Bjeńš (Delanske wolerske zjednoćenstwo). Tohodla su tež dnjowy porjad změnić dyrbjeli.
Róžant (JK/SN). Samo na sebi běchu radźićeljo wčera z wulkimi wočakowanjemi na posedźenje w Róžeńće přichwatali. Měješe dźě wo to hić, kak so gmejna dale prócuje twarić nowu pěstowarnju w Ralbicach. Jako zamołwity za twarstwo w zarjadniskim zwjazku Při Klóšterskej wodźe bě so Hubertus Ryćer tež wosebje na to přihotował. Dokelž pak je nahle schorjeł, njemóžachu nětko wo tym rěčeć. Wšako nimaja ani Tomaš Bjeńš ani radźićeljo dokładny přehlad wo naležnosći. Tohodla tónle dypk z dnjoweho porjada šmórnychu, runje tak tež ležownostne naležnosće gmejny.
Krótkopowěsće (19.08.16)
Předewzaćeljo zjednoćeni
Drježdźany. Wuchodna Sakska ma wot najnowšeho dźěłowe zjednoćenstwo SPD za samostatnych předewzaćelow. Zwjazk su srjedu w Drježdźanach załožili, kaž zamołwići zdźěleja. Za předsydu wuzwolichu předewzaćela Rona Eckhardta z Bannewitza pola Drježdźan. Zwjazk ma so za mostytwarca mjez hospodarstwom a towaršnosću.
Za myto namjetowanaj
Budyšin. Mjez wosobami, kotrež su za Němske myto angažementa 2016 nominowane, staj tež Tim Döke z Budyšina a Wolfgang Goldstein ze Slepoho. Tole rozprawja rozhłosowy sćelak MDR. Döku běchu hižo loni za dźěło na dobro ćěkancow počesćili. A Goldstein je lawreat wobydlerskeho myta, dokelž so na šuli za demokratiju a tolerancu zasadźa.
Žadnej znamce do Čěskeje
Praha. Dwójku listowych znamkow „módru a čerwjenu mauritius“, najžadnišej a najdrohotnišej filatelistiskej drohoćince swěta, je anonymny čěski inwestor kupił. Płaćiznu za wobě znamce, wudatej lěta 1847 na kupje Mauritius, trochuja na štyri miliony eurow. Kupc chce je na swětowej filatelistiskej wustajeńcy 2018 w Praze zjawnosći spřistupnić.
Policija (19.08.16)
Njesćerpnosć změje sćěhi
Słona Boršć. Twarske dźěła na awtodróze A 4 pola Budyšina tuchwilu wuskutkuja, zo so tam nimale wšědnje dołhe rynki čakacych awtow tworja. Zawčerawšim je to 23lětnemu wodźerjej BMWja najskerje předołho trało. Wón zajědźe na nabóčne pasmo a tamne awta přesćahny. Hłupe za njeho jenož bě, zo je jedne z tychle awtow ciwilne jězdźidło awtodróhoweje policije było. Njesćerpnosć 23lětnemu nětko wunjese, zo změje 100 eurow pokuty płaćić a zo nimo toho dypk w Flensburgu dóstanje.
Wulka hara, mało spara
Nuknica (SN). Hudźbny festiwal při Nukničanskej skale Nukstock je skónčnje „dorosćeny“. Hižo 18. raz wotewrje towarstwo barakka lětsa wrota swojeho swjedźenišća, a to kaž kóžde lěto posledni kónc tydźenja w žnjencu, potajkim 26. a 27. awgusta. Štóž pak sej mysli, zo tam nětko wšitko měrnišo a rozumnišo wotběži, so myli. Wšako njepřijědu hudźbnicy skupiny Dzieciuki z Běłoruskeje do Łužicy, zo bychu tu jeno sedźeli a bachtali. Ně, při jich měšeńcy punka a běłoruskeje folklory hłowy a nohi jenož tak zalětuja.
Wo haru postara so dale trashmetalowa band Mörkhimmel z Prahi. To móža so hižo wšitcy na cyłoćěłowu 100decibelowu masažu wjeselić. Trochu dalši puć tež hudźbnicy Lötfett z delnjołužiskeho Lubina na so bjeru, zo bychu na punk-typiske wašnje rozkładli, čehodla Łužica smjerdźi. A zo njebychu jenož na to poskali, što so w dalokim swěće stawa, ale tež zhonili, što je doma noweho, su sej skupinje Leika z Budyšina, Cat’s eye nebula z Wotrowa a dalše přeprosyli.
Puć přizamknu
W septembru započnu wopłóčkowy kanal twarić
Njebjelčicy (HS/SN). Twarscy dźěłaćerjo budu přichodne tydźenje wobraz na Njebjelčanskim Lipowym puću postajeć. Je to posledni puć we wsy, kotryž njeje hišće wopłóčkowej syći přizamknjeny. To ma so nětko změnić. Thomas Mager z Połčničanskeho inženjerskeho běrowa je w nadawku zaměroweho zwjazka za wopłóčki horni Čorny Halštrow Njebjelčanskim gmejnskim radźićelam na wčerawšim posedźenju projekt rozłožił.
Swěrnym kupcam dźakowna
Róžant (JK/SN). Po wšěch Serbach znaty a wosebje mjez nošerkami narodneje drasty woblubowany wobchod je tón Marje Hrjehorjoweje w Róžeńće. Nimale štwórć lětstotka poskića Worklečanka potrjebu wšědneho dnja kaž tež drastu za wšitke generacije, wosebje pak dźěle katolskeje narodneje drasty abo nadobu za křesćanske swjedźenje a sakramenty.
Pomału, ale wěsće hotuje so Marja Hrjehorjowa na wuměnk. Klětu spočatk julija tak daloko budźe. Do toho woswjeći wona 6. měrca hišće slěborny wobchodny jubilej. Róžeńčanski wobchod je był a ma po woli Marje Hrjehorjoweje wostać dale synonym za poskitk pomocy w naležnosćach serbskeje drasty a katolskich swjedźenjow.
Drjewo transportowace nakładne awto je dźensa dopołdnja w lěsu ...
Policija (18.08.16)
Walčki njezawěsćene byli
Jitro. Ratarske zawody maja tuchwilu dosć dźěła, zo bychu po žnjach žita walčki słomy do składow zwozyli. Pola Wóslinka a w Jitrom staj traktoristaj tele dźěło trochu na lochke ramjo brałoj. Mužej w starobje 18 a 45 lět měještaj swojemu traktorej stajnje dwaj připowěšakaj připowěsnjenej. Na kóždym z nich bě šěsć hoberskich słomjanych walčkow. Wone pak njeběchu ani z pasami ani z nabóčnymi sćěnami zawěsćene. Kóždy z traktoristow dyrbi nětko 60 eurow pokuty płaćić a dóstanje nimo toho dypk w Flensburgu.
W Róžeńće je kaolin z blida
Kamjenjanski zawod wčera nowu ležownosć za wudobywanje předstajił
Rakecy/Kamjenej (JK/SN). Kaolinownja w Kamjenej pola Rakec ma nowu móžnu płoninu, na kotrejž hodźi so kaolin wudobywać. Dotalna jama w bjezposrědnjej bliskosći zawoda budźe za něhdźe dźesać lět prózdna. Zo by produkcija zawěsćena była, je so zawod hižo sčasom za nowymi składami hospodarsce nuznje trěbneje surowizny rozhladował. Cyłkownje sydom wšelakich městnow zawod měješe, na kotrychž by so hodźało za njej pytać a wotpowědnje wulkosći składa móhli ju tež wudobywać.
