Krótkopowěsće (11.07.16)
Bamž změje noweho rěčnika
Rom. Bamž Franciskus dóstanje noweho medijoweho rěčnika. Wjelelětny nawoda nowinarskeho běrowa Federico Lombardi přewostaji zastojnstwo ameriskemu žurnalistej Gregej Burkej, kaž Vatikan dźensa zdźěli. 56lětny Burke ma spočatk awgusta dźěłać započeć. 73lětny Lombardi bě so za čas bamža Benedikta XVI. z nowinskim šefom stał.
Gorbačow kritizuje wjeršk NATO
Moskwa. Wojerske naprawy, wobzamknjene zašły pjatk wot Waršawskeho wjerška NATO, je něhdyši prezident Sowjetskeho zwjazka Michail Gorbačow mjenował přihot na přechod ze zymneje na horcu wójnu. Wón kritizowaše sewjeroatlantiski zwjazk za to, zo nosy do poćahow z Ruskej spochi wjetšu napjatosć. „NATO drje rěči wo zakitowanju, we woprawdźitosći pak přihotuje so na nadpadowe operacije“ (hlej 2. stronu).
Kniha Nowaka nětko digitalnje
Policija (11.07.16)
Dźěćo do awta zamknjene było
Wojerecy. Napjata situacija nasta sobotu na pózdnim popołdnju na Starej Berlinskej dróze we Wojerecach. Tam bě něhdźe w 17.45 hodź. dwulětne dźěćo do wosoboweho awta typa VW zamknjene. Při wšěm njezbožu bě tež hišće awtowy klučik w zamknjenym jězdźidle. Tuž ničo druhe njezwosta, hač wohnjowu woboru alarmować. Kameradojo hólčka z awta wuswobodźichu, bjez toho zo by so wón zranił. Hač bě sej z klučikom hrajkał abo so na hinaše wašnje zamknył, z policajskeje rozprawy njewuchadźa.
Wusud pokradnjeneho handyja dla
Budyšin/Droby. Nadpad na młodźinski klub w Drobach w Radworskej gmejnje Nowe lěto 2012 wostanje w dalokej měrje bjez pokuty. 26lětneho Wjazońčana drje je Budyske krajne sudnistwo zawčerawšim w zwisku z wonymi podawkami k pjenježnej pokuće zasudźiło. Wobskóržba pak wobmjezowaše so na to, zo bě sej wón w rumnosćach młodźinskeho kluba pozdatnje nikomu njesłušacy mobilny telefon přiswojił.
Wróćozhladowanje: Party do Noweho lěta 2012 wotmě so za mnohich wopytowarjow Drobjanskeho młodźinskeho kluba hinak, hač běchu wočakowali. Něhdźe w 1.30 hodź. so skupina něhdźe 20 wosobow – tehdy zwjetša młodostni – namócnje do kluba zadoby. Štyrjoch wopytowarjow tam zranichu a wulki dźěl meblow a wuhotowanja zničichu. Přičina nadpada bě, zo běchu domjacy do toho někotrym z wobdźělenych přistup do kluba zapowědźili.
Anne a Rainer Mittelstedt so nad swojim plahowanskim wuspěchom ...
Z koordinaciju njespokojom
List zarjadniskeho zwjazka zasadźenja wobornikow njewjedrow dla
Pančicy-Kukow (SN/MWj). Po wulkimaj njewjedromaj 23. meje a w nocy na 26. junij su wohnjowi wobornicy w gmejnach zarjadniskeho zwjazka Při Klóšterskej wodźe přiběrajcy njespokojom z dźěłom Wojerowskeje integrowaneje wuchowanskeje centrale. Wjacorych njedostatkow dla při alarmowanju wobornikow su wjesnjanosća pjeć gmejnow nětko list zestajeli a jón wotrjadnikej za porjad a wěstotu Budyskeho wokrjesa Renéjej Burkej, zastupowacemu wokrjesnemu wohnjowobornemu hašenskemu mištrej Volkerej Lutterbergej kaž tež šefej Wojerowskeje powołanskeje wohnjoweje wobory Dieterej Kowarkej pósłali.
Póndźelu započnu halu ponowjeć
Pomolowane kany posudźować
Miłoćicy (SN). Kreatiwni hobbyjowi molerjo, molowanske kružki a dalši lajkojo a skupiny ze Swobodneho stata Sakskeje su minjeny čas 15 mlokowych kanow pod hesłom „Žiwidła su drohotne“ wuměłsce wozdebili. Wot spočatka měsaca su pomolowane kany na internetnymaj stronomaj www.csb-miltitz.de a www.slk-miltitz.de widźeć. Tam móža je zajimcy tež posudźować, zdźěla Miłočanski Křesćansko-socialny kubłanski skutk (CSB). Wuhotowarjow třoch dobyćerskich kanow chce sakski ratarski minister Thomas Schmidt (CDU) na 19. krajnym žnjowym dźaknym swjedźenju wot 16. do 18. septembra w Torgauwje mytować. Hač do 31. awgusta su zajimcy namołwjeni swój posudk wotedać.
Po krajnym žnjowym dźaknym swjedźenju maja mlokowe kany w socialnych zarjadnišćach Sakskeje ludźi zawjeseleć. Zarjadnišća móža so pod wo jednu z nich požadać.
„Kany, wuměłstwo a kreatiwita“ je akcija we wobłuku projekta „Žiwidła su drohotne“, kotryž Miłočanski Křesćansko-socialny kubłanski skutk hromadźe ze Sakskim krajnym kuratorijom za wjesny rum wot lěta 2012 přewjeduje.
Riziko radźićelam přewulke
Lejno (SN/MWj). Hač pjeć gmejnow zarjadniskeho zwjazka Při Klóšterskej wodźe zhromadnu přemysłowu přestrjeń wutwori, je wjace hač dwělomne. Po tym zo je hižo gmejnska rada Ralbicy-Róžant wobzamknyła so na tymle projekće njewobdźělić, su wčera tež gmejnscy radźićeljo Pančic-Kukowa na swojim posedźenju w Lejnje tajku přestrjeń wotpokazali.
Nowy na čole zwěrjenca
Krótkopowěsće (08.07.16)
Wjace wobchadnych njezbožow
Budyšin. W Budyskim wokrjesu je so loni 7 880 wobchadnych njezbožow stało, 122 wjace hač lěto do toho. Přiwšěm je w přirunanju minjenych pjeć lět trend spóznajomny, zo ličba njezbožow woteběra. W lěće 2010 bě jich hišće 9 554. Loni je so 1 298 ludźi zraniło, z nich 333 ćežko. 16 wosobow je žiwjenje přisadźiło, zdźěli wokrjesna komisija wobchadnych njezbožow. Jich hłowne přičiny běchu njewobkedźbowanje předjězby, přewulka spěšnosć a přemały wotstawk.
Wuknu w prózdninach
Drježdźany. Něhdźe 225 sakskich šulerjow wot 7. lětnika wobdźěla so we wulkich prózdninach na dohromady wosom wuknjenskich lěhwach. Na te wašnje chcedźa njedostatki nachwatać, kaž ze sakskeho kultusoweho ministerstwa w Drježdźanach rěka. Lěhwa spěchuje Sakska ze 422 000 eurami.
Sudnistwa nětko wěsćiše
