Hydrawliski boran wosebita techniska žadnostka
Kamjenc (JK/SN). Nimale 80 čłonow wopřijace Kamjenske stawizniske towarstwo je so minjeny čas ze stawiznami zastaranja Lessingoweho města z wodu zaběrało. Lětsa je tomu 550 lět, zo bu město prěni raz přez wodowód zastarane. K tomu su sej čłonojo towarstwa pod nawodom Marion Kutter zaměr stajili, wosebje techniske naprawy a studnje kaž tež wodowody a ze zastaranjom města zwisowace připrawy zachować. W přihotach na jubilej je zapósłanc Sakskeho krajneho sejma Alojs Mikławšk přeprosył prezidenta sejma dr. Matthiasa Rößlera (wobaj CDU), zo by so na městnje wo aktiwitach towarstwa wobhonił.
Policija (21.09.16)
Z třěchi sej njezwěrił
Budyšin. Komisar připad je policiji zawčerawšim popołdnju w Budyšinje na runjewon kuriozne wašnje pomhał dosahnyć skućićela, kiž bě w nocy do toho při zadobywanju do předawanišća zakuskow na Hošic hasy wobdźěleny (SN rozprawjachu). Wobydlerjo mjenujcy něhdźe w 14 hodź. na policiju zazwonichu, zo na třěše přitwara na zadnim dworje předawanišća młody muž sedźi. Kaž so pozdźišo wukopa, bě sej wón tam přez schodźišćo domu wućeknył, zo by so před zastojnikami schował, jako woni při zadobywanju zapřimnychu a w předawanišću dweju paduchow lepichu. Jako komplica po tym na třěše sedźeše, so wón najskerje dopomni, zo so wysokosće boji, a njeje sej hižo dele zwěrił. Wobsadka policajskeho awta Budyskeho rewěra tuž rěbl přistaji, 19lětnemu dele kazaše a jeho nachwilnje zaja.
Korčmy swjeća domchowanku
Žnjowy dźak hosćencow prěni raz hromadźe z wikami a dołhej taflu
Budyšin (CK/SN). Mjeztym wosmy raz chcedźa Budyscy korčmarjo 2. oktobra swoju korčmarsku domchowanku swjećić. Je to takrjec wudospołnjenje ke korčmowemu swjedźenjej nalěto, kaž rěčnik Budyskeho towarstwa Staroměšćanska tejka Frank Haase rozłožuje. Wobdźěleni hosćencarjo chcedźa so na te wašnje swojim wopytowarjam dźakować. Tohodla sej tón dźeń tež žadyn zastup njekazaja. Wudawki za hudźbu, popłatki za GEMA a dalše kóšty hosćencarjo sami přewozmu. Hinak hač korčmowy swjedźeń w meji pak njebudźe tónle žnjowy dźakny swjedźeń jenož hudźbnje wusměrjeny, kaž podtitul „Wokřewjenje za hubu a wuši“ přeradźa. 13 barow a hosćencow so tónraz wobdźěli. „Bě jich hižo wjace“, praji Frank Haase. Ale w Budyšinje je po jeho słowach nětko mjenje hosćencow a w někotrych su swójbne swjedźenje skazane.
Něhdźe 50 lubowarjow pišćeloweje hudźby je minjenu sobotu w ...
W Rownom kěrchow rjedźili
Zo bychu staru tradiciju wobchowali, zetkachu so minjenu sobotu w Rownom po mnohich lětach zaso prěni raz kameradojo dobrowólneje wohnjoweje wobory, čłonojo wjesneho kluba a towarstwa Njepilic dwór a druzy, zo bychu kěrchow rjedźili. Wjesna rada bě k tomu namołwiła. Na čerstej pódźe su trawu wusyli, puće ze šćerkom posypali a njerodź plěli. Po dźěle sydachu, kaž je to z wašnjom, pomazki z jatrowej a hejdušnej kołbasu. Foto: Joachim Rjela
Krótkopowěsće (20.09.16)
Koncert wustajeńcu zakónčił
Budyšin. Wustajeńcu „Pruhi kruhi, třiróžki“ w Budyskim Serbskim muzeju, kotruž bě sej cyłkownje 9 000 ludźi wobhladało, su zawčerawšim, njedźelu, zakónčili. Turnovski smyčkowy orchester je finisažu wobrubił. Hranicy překročacy hudźbny projekt čěsko-němskeho fondsa přichoda nětko w Zhorjelcu, Niederoderwitzu a Turnovje dale powjedu.
Pušća sta dźěłaćerjow
Freiberg. Twarc solarnych modulow Solarworld chce hač do kónca lěta w swojich sakskich a durinskich twornjach něhdźe 500 požčenych dźěłaćerjow pušćić. Tole zdźěli dźensa rěčnik předewzaća. Tak dyrbi w Freibergu 300 ludźi hić. Hłowna přičina je nadprodukcija chinskich twarcow, kotřiž z tunimi wudźěłkami mjezynarodne wiki „zapławjeja“.
Chmjel lětsa derje radźeny
Querfurt. W Sakskej, Durinskej a Saksko-Anhaltskej tuchwilu chmjel žněja, kotryž je so lětsa po wšěm zdaću derje radźił. Dešć minjenych dnjow je tomu polěkował, zdźěli zwjazk plahowarjow chmjela podłu Łobja a Solawy. W třoch krajach plahuja chmjel mjeztym na 1 450 hektarach. Tak wočakuja wunošk 59 000 centnarjow, 10 000 wjace hač loni.
Policija (20.09.16)
Zadobywarjow lepili
Budyšin. Młodostnaj w starobje 17 a 19 lět běštaj so w nocy na póndźelu do hosćenca na Budyskej Hošic hasy zadobyłoj. Po tym zo staj sej žiwidła do nachribjetnikow spakowałoj, chcyštaj tež kasu wočinić. Policija pak bě spěšniša a jeju nachwilnje zaja. Před durjemi čakacaj komplicaj so zminyštaj.
Parlička za trening dorosta
Z wjesneho hrajnišća a swjedźenišća nahladne sportnišćo nastało
Serbske Pazlicy (JK/SN). Gmejna Njebjelčicy a wosebje Serbske Pazlicy su wo rjanu městnosć bohatše. Minjeny pjatk přepodachu zastupjerjo gmejny a Njebjelčanskeje sportoweje jednotki ponowjene sportnišćo w Serbskich Pazlicach jeho nowemu a za sportowe žiwjenje gmejny njeparujomnemu zaměrej. Wjesnjanosta Tomaš Čornak (CDU) kaž tež předsyda Njebjelčanskeje SJ Bjarnat Deleńk hódnoćeštaj na swjatočnym zarjadowanju wosebje přinošk wobydlerjow za derje poradźenu sportowu městnosć. Njeličomne hodźiny dobrowólneho dźěła su čłonojo sportoweje jednotki kaž tež wjesnjenjo nałožowali, zo bychu dotalne hrajnišćo wjesneje dźěćiny a swjedźenišćo na woprawdźe nahladne sportnišćo přeměnili. Wone hodźi so samo po potrjebje awtomatisce krjepić. Tomaš Čornak wuzběhny wosebje přinošk Serbskopazličanskich žonow, kotrež su pilnych pomocnikow přez cyły čas na wustojne wašnje zastarowali. Sportnišćo budźe předewšěm dorostej Njebjelčanskeje SJ jako treningowa městnosć słužić.
Čěscy wučerjo na wopyće byli
Składnostnje šulskeho jubileja, kotryž tele šulske lěto na Budyskej Serbskej zakładnej a wyšej šuli woswjeća, zetkachu so wučerjo wobeju kubłanišćow k wosebitemu pedagogiskemu dnjej. Za to běchu sej kolegow a koleginy partnerskeje šule z čěskeho Jabloneca přeprosyli. Rano chór zakładneje šule hosći w Serbskim šulskim a zetkawanskim centrumje z pěsnjemi wutrobnje witaše a sej z nimi tež zhromadnje zaspěwa.
Nawodnica wyšeje šule Borbora Krječmarjowa, jeje zastupjerka Bernadet Kralowa kaž tež zastupowaca nawodnica zakładneje šule Andrea Recowa hosći tohorunja witachu a přeprosychu jich na wuchodźowanje po kubłanišćomaj. Tak zeznajomichu so čěscy kolegojo z twarjenjom horta, ze sportowej halu, internatom, někotrymi rumnosćemi zakładneje šule, z awlu, jědźernju a poschodom wyšeje šule.
