Klětu nalěto započnu twarić
Zrěčenje za twar mosta nad Budyskej Zeppelinowej podpisane
Budyšin (SN/MkWj). Čas dyrkotanja je nimo: Twar noweho železniskeho mosta nad Budyskej Zeppelinowej móže so skónčnje zahajić. Minjeny kónc tydźenja stej Swobodny stat Sakska a Němska železnica twarske zrěčenje podpisałoj. Tole je widźomnje wolóženy zapósłanc CDU w Sakskim krajnym sejmje Marko Šiman dźensa medijam zdźělił.
Krótkopowěsće (02.08.16)
Při wohenju žiwjenje přisadźiła
Zhorjelc. Wohenja w Zhorjelskej starowni „Při měšćanskim parku“ dla je minjenu nóc 73lětna wobydlerka žiwjenje přisadźiła. Dwanaće wobydlerjow so zdźěla ćežko zrani, policija zdźěli. Jedyn wohnjowy wobornik poćerpje infarkt wutroby. Mjeztym pak njeje hižo w smjertnym straše. Woheń bě w stwě wobydlerki z dotal njeznateje přičiny wudyrił.
Powětr lěpje kontrolować
Drježdźany. Sakska chce lětsa 145 000 eurow inwestować, zo móhła kwalitu powětra lěpje kontrolować. Po informacijach wobswětoweho ministerstwa zatwarja w 29 měrjenskich stacijach nowu techniku, kotraž měri ocon, drobny proch a dusykowe oksidy. Najwjetše problemy ze zanjerodźenym powětrom maja w Drježdźanach a Lipsku.
Železnisku čaru zawru
Policija (02.08.16)
Njezboži z kolesom
Budyšin. Na Lubijskej dróze w Budyšinje wotboči wčera rano wodźer Audija dolěwa na Fichtowu a zrazy do 24lětneje kolesowarki, kotraž jědźeše we wopačnym směrje po kolesowarskej šćežce. Žona so při zražce lochce zrani a bu w chorowni zastarana. Nastata škoda wučinja 500 eurow. Tež kolesowarjo měli so po słowach policije po předpisach měć.
Hižo njedźelu popołdnju zrazy 37lětna šoferka Opela, kotraž bě na njedowolene wašnje z Budyskeje Hasy Clary Zetkin na Leibnizowu wotbočiła, z runjewon jěducej 47lětnej kolesowarku, kotraž so lochko zrani. Na awće nasta škoda 1 000 eurow, koleso so snadnje wobškodźi.
Chór brigady zwučuje
Budyšin (SN). Čłonojo chóra 1. serbskeje kulturneje brigady njech njeskomdźa proby štwórtk, 4., a pjatk, 5. awgusta, wot 9.15 hač do 14.50 hodź. w SLA. Zwučowanja su wažne za přihot prěnjeju wustupow w Drježdźanach (zapokazanje noweho biskopa) a w Budyšinje (nazymske chórowe spěwanje) kaž tež za adwentny koncert.
Namjety za myto zapodać
Budyšin (SN). Hišće hač do 12. awgusta móža komuny, zwjazki, towarstwa abo priwatnicy namjetować kandidatow za wuznamjenjenje z mytom Hornjołužiski předewzaćel lěta 2016. Wosebje předewzaćelam, kotřiž horja so za region a wuspěšne hospodarske wuwiće Hornjeje Łužicy, měło so tole myto spožčić.
Pišćele budu dróše
Budyšin (SN). Saněrowanje wobojich pišćelow w Budyskej tachantskej cyrkwi budźe dróše hač planowane. Dźěła na pišćelach firmy Eule na ewangelskej stronje płaća wjac hač 200 000 eurow. To je dwójce telko kaž planowane. Tež wobnowjenje katolskich pišćelow so wo někotre dźesaćitysacy eurow podróši. Hotowe budu wone najskerje w septembrje. Při darićelskej akciji Załožby Wuchodosakskeje lutowarnje Drježdźany nazběrachu dotal 31 000 eurow.
Nakładźene wobruče wina njebyli
Młodźina so na starej šuli derje čuje
W lěće 1758 bě serbski biskop Jakub Jan Józef z Baerenstamma Wóski šulsku wučbu we Wotrowje zawjedł. Šěsć lět wuwučowaše Měrćin Pjetaš dźěći pola Mrózkec, zo bychu po tym natwarili jednoposchodowu šulu. W njej bě nimo wuwučowanskeje rumnosće tež bydlenje wučerja. 1820 powjetšichu twar wo dalši poschod, štož płaćeše 105,50 tolerjow. 16 lět pozdźišo połožichu zakładny kamjeń za nowu šulu, kotruž je biskop 28. oktobra 1836 z dźesać duchownymi poswjećił. Nažel pak njebě fundament na wot gmejny darmotnje přewostajenej ležownosći kruty dosć a cyły twar so sypny. 1842 šulski dom znowa natwarichu. Wot 1836 skutkowaše z Radworja pochadźacy Michał Brojer 23 lět jako prěni wukubłany wučer we Wotrowje. Lětnje měješe 600 hriwnow mzdy. Jako zwóńk dósta wot wjesnych burow swjatki a kermušu tykanc, hdys a hdys tež pokrutu chlěba. 1838 wuwučowaše Brojer 96 dźěći w dwěmaj rjadownjomaj.
Saněruja dalše dźěle stareho města
Policija (01.08.16)
Wo pizzu njerodźili
Wojerecy. Pizzeria bě w nocy na njedźelu zaměr njeznatych zadobywarjow. Po tym zo běchu so namócnje do wobchoda zadobyli, spytachu cigaretowy awtomat wočinić, štož pak so jim njeporadźi. Z registrowanskeje kasy pak rubichu třicyfrowu sumu pjenjez a zawostajichu cyłkownu wěcnu škodu 3 00 eurow. Kriminalna policija so z padom nětko zaběra.
Zawinowar njezboža ćeknył
Połčnica. Na lěwej jězdni awtodróhi A4 do směra na Drježdźany jěducy šofer Škodowki dyrbješe so njejapcy před nim na samsnu čaru měnjacemu njeznatemu awtu wuwinyć. Při tym zhubi kontrolu nad swojim jězdźidłom, kotrež poča so wjerćeć, zjědźe z awtodróhi a so na bliskim polu zwróći. 42lětna sobujěduca so ćežko zrani a ju dowjezechu do chorownje. Šofera a sobu jěducej dźěsći su ke kontroli tohorunja do chorownje dowjezli. Awto njeda so wjac wužiwać. Nastata škoda wučinja 6 000 eurow. Zawinowar njezboža so wotsali, policija z pomocu swědkow za nim slědźi.
Z Mazdu kontra sornikej
Zajimawostki města zhonili
Budyšin (SN). Budyski muzej je wčera přewjedł wodźenje po měsće pod hesłom „Hospodarski rozkćěw a wulke twarske předewzaća – wuwiće města wot 1871 do 1914“. Diplomowy muzeologa Hagen Schulz předstaji wuchadźejo z hospodarskeho wuwića města a regiona wšelake dynamiske procesy a z nimi zwjazane wašnja twarjenja, z kotrymiž je so Budyšin wuwił na moderne srjedźne město.
Lěhwo wuspěšnje zakónčili
Budyšin (SN). 53 dźěći a młodostnych je so dźens popołdnju z rěčneho lěhwa SŠT we Wodowych Hendrichecach nawróćiło. Towarstwu bě so poradźiło, wšitke zarjadowanja a wobchadnu rěč w serbšćinje zaručić. Nimo kupanja a pućowanja zaběrachu so wobdźělnicy lěhwa z fotografowanjom, pospytachu so w tykanju sačkow, woni rejwachu a dźiwadźelichu. Na kemšach w Leutersdorfje zanjesechu tež serbske kěrluše. Zajim za lěhwo bě lětsa wosebje wulki, štož swědči wo prawym koncepće SŠT.
Swjedźeń hibićiwych ludźi
Mjeztym 16 lět nawjeduje Marija Latowa Koćinski wjesny klub z jeho 27 čłonami. Wčera po zakónčenju wjesneho swjedźenja wona hódnoćeše, zo je so rozsud, přewjesć swjedźeń druhi raz při kapałce wosrjedź wsy a nic na łuce za Koćinu, jako přewšo wunošny wopokazał.
Koćina (aha/SN). Nimo 19. raz pospochi do swjedźenja zapřijateho „kotoła pisaneho“ zabrachu sportowe wubědźowanja wažne městno. Tak wubědźowaše so sobotu pjeć mustwow w kopańcy, hdźež wuńdźechu Koćinjenjo před nowej Kulowskej wubranku jako dobyćer. Tež mjez třomi na trawniku za bulom honjacymi dźěćacymi mustwami bě domjace najlěpše. Na woběmaj dnjomaj su tohorunja kehelowali. Dźěći w dwěmaj starobnymaj skupinomaj so runje tak prócowachu kaž žony, z třomi kulemi maksimalnu ličbu drjewow powalić. Terez Reineltec je z 23 kehelemi snadnje před Jenny Markec (21) a Margit Korchowej (20) dobyła. Mjez třiceći mužemi docpěchu hnydom štyrjo 24 kehelow. Mjez nimi přesadźi so Pětr Reinelt před Tobiasom Čórlichom a Joachimom Kostoržom.
