Čerwjena korčma nětko zawrjena
Splósk (UM/SN). Štóž je w poslednich dnjach stareho lěta 2024 Čerwjenu korčmu w Kubšiskim wjesnym dźělu Splósk (Pielitz) wopytał, je to takrjec hnydom na městnje zhonił. A tež na internetnej stronje móžeš to čitać: Spočatk lěta je woblubowany hosćenc dźěłać přestał. „Ze starobnych přičin doskónčnje začinimy“, wobsedźerka Monika Zieschank rozłoži. „Mój mandźelski je 75 lět, sama sym 70 lět. W tej starobje je raz kónc“, wona doda. Zo hosćenc w blišim času zaso wočini, je lědma wočakować. Kaž na internetnej stronje rěka pak je dale móžno, w Čerwjenej korčmje přenocować.
Po informacijach na internetnej stronje wjedu mějićeljo Čerwjenu korčmu wot lěta 1919 mjeztym w štwórtej generaciji jako zawod swójby. Stawizny lokala pak wjele dale wróćo sahaja. Hižo w lěće 1809 drje je na tehdy wjele wužiwanym puću mjez Budyšinom a Žitawu korčma z mjenom „Schafschänke“ stała. Mjeno Čerwjena korčma je so po wšelakich žórłach wot lěta 1859 přesadźiło. Hižo w 1980tych lětach su stare twarjenje rozšěrili. W lětomaj 2000/2001 nasta nowotwar za hotel.
Policija (17.01.25)
Nohu sej zatłusnył
Budyšin. Dźěłowe njezbožo je so wčera připołdnju na terenje bywšeje Budyskeje betonownje stało. W zawodźe Hentschke je sej muž při nakładowanju betonowych platow nohu zatłusnył. Na zbožo móžachu jeho ze situacije spěšnje wuswobodźić. Wuchowanske mocy na městnje pomhachu, tež helikopter bě přilećał.
Telewizor pokradnył
Habrachćicy. Nic na palenc, šokoladu abo parfim je so paduch srjedu w Habrachćicach (Neugersdorf) měrił, ale na wjetši techniski nastroj. We wobchodźe hrabny sej wón dopołdnja telewizor w hódnoće něhdźe 900 eurow a z nim z předawanišća ćekny. Sobudźěłaćerka hišće za nim spěchaše, ale jeho na puću z wočow zhubi. Po wšěm zdaću bě paduch do awta zalězł a z nim wotjěł.
Prěni raz zaso wojerska hara
Wot 20. januara zwučuja parašutisća na wojerskim zwučowanišću
Wuskidź (CK/SN). Wot 20. januara přewjedźe 26. połk parašutistow zwjazkoweje wobory na wojerskim zwučowanišću Hornja Łužica dwaj tydźenjej trajace zwučowanje „Zymny wichor“. Wobdźělenych je něhdźe 1 200 muži a žonow w uniformje kaž tež lětadła typa Tornado a Eurofighter. Z tym budźe po 15 lětach zaso wojerska hara nad regionom słyšeć.
Nadawk regimenta je trenować, kak ludźi z krizowych kónčin wuswobodźa. Jako přikład mjenuje połkownik Oliver Henkel wuswobodźenje 430 wosobow ze Sudana w lěće 2023. Jako jednotka, kotraž hodźi so spěšnje zasadźić, dyrbja po 48 hodźinach efektiwnje jednać móc. Za to je wobstajne zwučowanje trěbne.
Połkej přisłuša 1 800 wojakow w dźesać kompanijach, k tomu zastaranske jednotki kaž tež sanitetarjo a lěkarjo, kotřiž móža tohorunja z parašutom skakać. Na zwučowanišću pola Wuskidźe chcedźa hłownje třěleć zwučować, za čož skića připrawa wuběrne wuměnjenja, kaž Oliver Henkel wě.
Problem muchow njerozrisany
Inwazija muchow, kiž so njewočakowano a w syłach nawala, wobydlerjow na sewjeru Radworskeje gmejny hižo dołho zaběra. Problem pak wostanje najprjedy raz njerozrisany.
Radwor (SN/MkWj). Njewšědnje wjele njeznatych mjezwočow w sydarni gmejnskeho zarjada předwčerawšim, srjedu, běchu pokazka, zo steji něšto na dnjowym porjedźe, štož mnohich zaběra. Přijěli běchu wobydlerjo Drobow pola Minakała. Tam bědźa so hižo wjele lět z problemom muchow, kotrež so stajnje zaso we wulkich syłach nawala, zo bychu so runje tak spěšnje zaso zminyli. Za piwowymi blidami běchu sej spěšnje přezjedni, zo je zawod za recyclowanje plastowych wotpadkow w Drobach za to zamołwity. Tež hródź z młodymi howjadami steješe na lisćinje móžnych winikow. Rozmołwy ze zamołwitymi a naprawy přećiwo mucham pak njejsu dotal ničo wunjesli.
We Wojerowskim zwěrjencu maja tuchwilu 1 127 zwěrjatow 116 družin. ...
Krótkopowěsće (17.01.25)
Zakroča přećiwo prawicarstwu
Budyšin. Serbske młodźinske towarstwo Pawk chce so přećiwo přiběracemu prawicarstwu a antiserbskim hibanjam angažować. Zhromadnje z Domowinu chcedźa nowy format zarjadować a sej k młodźinskim cyłkam dojěć, zo bychu tam wo prawicarskich strukturach, jich ideologiji kaž tež schowanych symbolach a typiskej drasće informowali.
Horni Sulšečan ma hłownu rólu
Budyšin. Musku hłownu rólu Mateja w ptačokwasnym předstajenju Serbskeho ludoweho ansambla (SLA) „Lubosć na žołmach“ ma lětsa prěni raz mějićel pochowanskeho instituta w Halštrowje Marko Bulank-Paška. 36lětny Horni Sulšečan je wjacore lěta jako elewa w SLA kaž tež w Němsko-Serbskim ludowym dźiwadle nazhonjenja na jewišću zběrał. Prěnje ptačokwasne předstajenje je jutře w Choćebuzu.
Wučbu jendźelšćiny rozšěrja
Policija (16.01.25)
Awto so pěškow šmórnyło
Hodźij. Wobchadne njezbožo je so wutoru wječor na statnej dróze S 107 mjez Hodźijom a Žičenjom (Seitschen) stało. Tam běštaj 18lětny muž a 19lětna žona pěši po puću. Do samsneho směra bě 47lětna wodźerka Nissana po puću. Při přesćehnjenju wona z prawym špihelom do lěwje ruki muža dyri a jeho zrani. Tež jeho přewodnica so zrani, jako ju dźěle awta trjechichu. Wobaj dyrbještaj k lěkarjej.
Camprowarjo zaso po puću
Přetwar šule bórze zahaja
Psyče dawki mjez radźićelemi wobšěrnu diskusiju wubudźili
Worklecy (JK/SN). Koło lětušich wuradźowanjow su Worklečanscy gmejnscy radźićeljo wčera najprjedy raz posledni raz w rumnosći wyšeje šule zahajili. Februarske posedźenje přewjedu na druhim městnje, dokelž potom hižo pilnje w šuli dźěłaja. K tomu předstaji hłowny planowar a přichodny nawoda twarskeho projekta Torsten Gumpert z Kulowa radźićelam projekt přetwara a wohnjoškitneho wukmanjenja Worklečanskeje wyšeje šule. Gumpert pokaza jara nazornje přetwar twarjenja šule wot hornjeho poschoda hač do pincy. Projektowe rysowanki sposrědkowachu wažne informacije wo wobjimje trěbnych dźěłow a što ma jónu nastać.
Počesća Jakuba Skalu
Budyšin. Towarstwo Cyrila a Metoda, Maćica Serbska a Budyska wosada přeprošuja wutrobnje na wosebity nyšpor njedźelu, 19. januara, w 14 hodź. składnostnje 100. posmjertnin něhdyšeho kanonika Budyskeho tachantstwa a předsydy Maćicy Serbskeje Jakuba Skale, do Budyskeje tachantskeje cyrkwje. Po krótkim počesćenju při jeho rowje na Mikławšku přizamknje so bjesada z kofejom na Budyskej farje.
Na nowolětne přijeće
Wojerecy. Swobodne wolerske zjednoćenstwo Měšćanski přichod Wojerecy přeprošuje wšitkich wobydlerjow na nowolětne přijeće sobotu, 18. januara, wot 8 do 12 hodź. na Wojerowske Łužiske naměsto. Zajimcy móža so tam wo aktualnych temach a ćežišćach zjednoćenstwa informować a so z jeho čłonami rozmołwjeć. Wo napoje su so postarali.
Rěčna hodźina zapósłanče
