Krótkopowěsće (11.12.24)
Přećiwo ekstremizmej a rasizmej
Budyšin. Wučomnicy Budyskeho wokrjesa móža so hač dosrjedź januara wo „žołtu ruku“ požadać. Je to wubědźowanje přećiwo prawicarskemu ekstremizmej a rasizmej na dźěłowym městnje a zwonka njeho. Dźěłarnistwo IG twarstwo-agrar-wobswět pyta projekty, kotrež so kreatiwnje za wjace tolerancy a přećiwo diskriminaciji zasadźeja. Najkreatiwnišej ideji kiwa 1 000 eurow.
Rektor je dowěru senata zhubił
Rózbork. Senat policajskeje fachoweje wyšeje šule Rózbork je wčera z trěbnej dwutřećinowej wjetšinu za wotsadźenje amtěrowaceho rektora šule hłosował. Nětko rozsudźi nutřkowne ministerstwo wo tym, hač dyrbi Dirk Benkendorf zastojnstwo wopušćić. Dwaj wysokošulskaj wučerjej wumjetowaštaj jemu njeaktiwnosć a falowacu zamóžnosć při nawjedowanju šule. Dołhož pruwowanje traje, so rektor do ministerstwa wotrjaduje.
Zaso wjace pjenjez w móšni
Policija (11.12.24)
Na křižowanišću do pěška zrazył
Kamjenc. Póndźelu nawječor je na křižowanišću při Wojerowskej dróze w Kamjencu 59lětny šofer dróhu přeprěčaceho pěška přewidźał, jako chcyše ze swojim awtom nalěwo wotbočić. Při zražce bu 43lětny pěšk ćežko zranjeny. Wuchowanska mediciniska słužba jeho do chorownje dowjeze. Wěcowna škoda wučinja 500 eurow.
Pućujetaj po serbskej hudźbje
Budyšin. Pod hesłom „Pućowanja po hudźbnym swěće Serbow“ wuhotujetaj huslerjej Malte Hübner a Holm Birkholz sobotu, 14. decembra, w 19 hodź. koncert na žurli Budyskeho Serbskeho muzeja. W programje su „twórby klasiskich/romantiskich serbskich komponistow kaž tež jich „naslědnikow“ a swójske přinoški Hübnera, Birkholza a Petera Manfreda Wolfa.
Kantina přećehnje
Wojerecy. Kantina na Wojerowskim industrijnišću poskićuje zajutřišim posledni raz snědań a wobjed. Potom přećehnje na nowu městnosć do Łužiskeje kupjele. Wot 6. januara 2025 potom tam hłódnych hosći wita.
Wulki zajim za film wo Jaseńcy
Wětrow. Na njedawne měsačne zarjadowanje Wětrowskeho domu wjacorych generacijow bě z 50 wobdźělnikami njewšědnje wjele zajimcow přišło. Samo z Njeswačidła a Šešowa móžeše organizatorka zeńdźenja Ingrid Konschak hosći witać. Přičina wulkeho zajima bě film wo susodnej wsy Jaseńca. Zahrodnikec bratraj Guido a Achim běštaj film wo swojej wsy zhotowiłoj.
Tema „Serbja“ lědma prezentna
W Slepom so na nowy kulturno-turistiski projekt dojednali
Brězowka (AK/SN). Gmejny zarjadniskeho zwjazka Slepo chcedźa w zhromadnym projekće z mjenom „SerbIT – Serbska inowacija z tradiciju“ spěchowanje rěče, kultury a tradicijow kaž tež turizma rozšěrić a dale wuwić. Po Slepom a Trjebinje je tydźenja štwórtk nětko tež Dźěwinska gmejnska rada jednohłósnje wotpowědnemu kooperaciskemu zrěčenju přihłosowała. Nimo dohromady 75 000 eurow swójskeho podźěla, kotrež sej gmejny dźěla, financuje Załožba za serbski lud projekt ze srědkami spěchowanskeho programa „Serbska rěč a kultura w změnje strukturow“. Mjez druhim nastanu z tym tež štyri personalne městna.
Hygiena wokoło mjasa pjerizny
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich lubuškow prócuja. K tomu přinošować chce naša serija z pokiwami z weterinarneje mediciny. (47)
Pomału bliža so hody a w někotrejžkuli domjacnosći wjeseli so swójba na tradicionalnu husacu pječeń k swjatym dnjam. Smě pak tež raz kačka abo kokoška być.
Lětnje rězaja w Němskej přibližnje 600 milionow kokoškow, to je něhdźe 1,1 milion tonow mjasa.
Pjerizna je porno druhemu skotej nastupajo kormjenje jara wunošna. Ptaki spěšnišo rostu hač swinje abo howjada. Nimo toho su lěpši zwužitkowarjo picy (Futterverwerter).
Drježdźanscy kapałnicy su njedźelu nawječor w kopaće połnej ...
Swj. Borbora wjeselo zbudźiła
Prěni raz je swjata Borbora z přewodnikom rumpodichom lětsa wobydlerjow Domu swj. Jana w Smječkecach wopytała. W hrónčku rozjasni wona přitomnym zmysł swojeho wopyta. Po tym pomajka po tradiciji kóždeho z nich a přepoda na kóncu hałužku wišniny. Popołdnju zarjadowachu organizatorojo Křesćanskeho socialneho skutka (CSW) adwentne wiki z najwšelakorišimi poskitkami. Wopytowarjo móžachu so tu na přikład do raja bajkow zanurić. Tež adwentnu pychu sy sej na wikach spaslić, w losowanju zdobyć abo kupić móhł. Nimo toho běchu so zamołwići wo ćělne derjeměće z typiskimi adwentnymi jědźemi a napojemi postarali. Wječor wuklinča ze znatymi adwentnymi pěsnjemi, kotrež su dujerjo Chróšćanskich muzikantow zahrali.
Andrea Jakubašec-Hrjehorjowa
Krótkopowěsće (10.12.24)
Nowa skupina PEN-centruma
Darmstadt. Dohromady 21 awtorkow a awtorow z Durinskeje, Berlina a Braniborskeje kaž tež ze Sakskeje a Sakso-Anhaltskeje je minjenu sobotu Skupina Lipsk mjenowanu nowu sekciju Němskeho PEN-centruma załožiło. Zaměr skupiny je mjez druhim, „dialog z kolegami z wuchodnych a južnych susodnych krajow aktiwizować“. Jako prěnjeho rěčnika wuzwolichu Benedikta Dyrlicha.
Zažny rabat za filmowy festiwal
Wulke Hendrichecy. Towarstwo Kunstbauerkino přijimuje hišće hač do kónca lěta namjety za program klětušeho Nysoweho filmoweho festiwala (NFF). Zdobom zarjadowarjo informuja, zo su wotnětka tak mjenowane Early-bird-tikety na předań, zmóžnjace zajimcam sej wšitke předstajenja za 40 eurow wobhladać. NFF wotměje so wot 20. do 25 meje.
„Hodowny pokoj“ w zarjedźe
Policija (10.12.24)
Wulka akcija policije praskotakow dla
Kamjenc. Dotal njeznaći su njedźelu popołdnju w bydlenju a na balkonje w domje na Kamjenskej Fichtestraße z praskotakami a hudźbu telko hary „nadźěłali“, zo wjacori susodźa policiju informowachu. Policisća spytachu z 20lětnym podružnikom bydlenja rěčeć, tón pak jich wohrožowaše naspomnjo, zo ma brónje, z kotrymiž chce so wobarać, je-li do bydlenja zastupja. Policisća zapodachu wozjewjenje přeńdźenja dla a wotsalichu so. Hižo wječor pak ze susodstwa znowa zdźělenku wo sylnej harje praskanja dla kaž tež wo harowacych pjanych wosobach w bydlenju dóstachu. Policistow přewodźachu tónraz wohnjowa wobora a wuchowanska kaž tež specialna słužba. Po diskusiji wotewrě młodostny podružnik zastojnikam durje do bydlenja. Tam pak ani brónje ani dalše wosoby nadešli njejsu.
