Kamjenske kołbaski w srjedźišću
Policija (20.03.24)
Kolesowarka smjertnje znjezbožiła
Běła Woda. Tragiske wobchadne njezbožo sta so póndźelu dopołdnja w Běłej Wodźe. 38lětny wodźer nakładneho awta chcyše z pódlanskeje na hłownu dróhu wotbočić, njewobkedźbowaše pak předjězbu kolesowarki, kotraž wotlěwa přijědźe. 85lětna zajědźe do nakładneho awta, padny a so ćežko zrani. Žonu dowjezechu z helikopterom do chorownje, hdźež wona we wječornych hodźinach na sćěhi swojich zranjenjow zemrě.
Sprjewine město wobydlerski etat za 2024 podwojiło
Budyšin (SN/MWj). Ze spočatkom nalěća Budyske měšćanske zarjadnistwo swojich wobydlerjow namołwja, město sobu porjeńšeć. Wot lěta 2017 wobydlerski etat města Budyšina zmóžnja, najwšelakoriše mjeńše projekty a předewzaća we wobłuku města zwoprawdźić. „Chcemy wobydlerski angažement spěchować a tohodla wšitkich namołwjamy, město porjeńšeć a poměr mjez ludźimi polěpšić. Tohodla smy wobjim spěchowanskeho hornca podwojili“, praji wyši měšćanosta Karsten Vogt w nowinskej zdźělence. Za projekty wobydlerjow chcedźa lětsa 20 000 eurow wudać. Namjety a próstwy za projekty w tymle lěće hodźa so hač do 15. apryla zapodać. Wot junija financny wuběrk wo zwoprawdźenju rozsudźi.
Radźićeljo jutře wuradźuja
Róžant. We wobłuku zarjadniskeho zwjazka Při Klóšterskej wodźe wotměja so jutře, štwórtk, hnydom tři posedźenja gmejnskich radow. We 18.30 hodź. zetkaja so radźićeljo Ralbic-Róžanta w Róžeńčanskim gmejnskim zarjadnistwje. Tam zaběraja so z konceptom kolesowanskich a pućowanskich šćežkow a z rekultiwowanjom hrjebjow pola Šunowa.
Worklecy. Tohorunja we 18.30 hodź. schadźuja so Worklečanscy radźićeljo w šuli. Mjez druhim póńdźe wo zasadne wobzamknjenje wo nachwilnym přećahu šule do knježeho dwora. Nimo toho chcedźa wo hospodarskim planje 2024 diskutować.
Chrósćicy. W 19 hodź. započnje so posedźenje Chróšćanskich radźićelow w gmejnskim a kulturnym centrumje „Łužica“. Najwažniši dypk dnjoweho porjada je předstajenje hospodarskeho plana 2024 a diskusija.
Interaktiwne wuchodźowanje
Za klóšter Marijinu hwězdu a gmejny ma informaciski system nastać
Pančicy-Kukow (SN/MWj). Hač do kónca lěta 2025 ma za klóšter Marijinu hwězdu a za pjeć sobustawskich gmejnow zarjadniskeho zwjazka Při Klóšterskej wodźe nastać digitalny a mobilny informaciski system. Za to wotzamknje zarjadniski zwjazk kooperaciske zrěčenje z Kruhom přećelow klóštra. Tole su zastupjerjo sobustawskich gmejnow wčera w Pančicach-Kukowje wobzamknyli. Runočasnje předsydu zarjadniskeho zwjazka Stefana Andersa społnomócnichu, wotpowědny nadawk přepodać firmje, kotraž je za to poskitk zapodała.
Z bywšim gmejnskim zarjadnistwom a něhdyšej piwarnju zhubi so na ...
Kriminalna statistika Sakskeje: Alarmowace powěsće
Drježdźany (BD/SN). Powšitkowna kriminalita je lěta 2023 w Sakskej na 260 800 njeskutkow postupiła, štož wučini w přirunanju z lětom 2022 zwyšenje wo 5,1 procentow. To wuchadźa z najnowšeje kriminalneje statistiki, kotruž je wčera popołdnju statny nutřkowny minister Armin Schuster (CDU) w Drježdźanach z dalšimi zamołwitymi za wěstotu w kraju předstajił. Wosebje njedowolene zapućowanja, padustwo z wobchodow, pincow, łubjow a płokarnjow kaž tež namócna kriminalita ze škodu na ćěle ćěrjachu kwotu deliktow do wyšiny.
Woteběrali pak su přeńdźenja přećiwo zhromadźenskemu zakonjej, kradnjenje awtow a wumocowanja. „Šěroku kedźbnosć žada sej rozrost kriminality pola młodostnych a bohužel tež dźěći, kotrež docyła hišće chłostajomne njejsu“, zwurazni minister z trochu bjezradnym podzynkom. A wón přida skoro prošo, zo je dźakowny za kóždu iniciatiwu, kotraž chce njeskutkam dźěći zadźěwać.
Krótkopowěsće (20.03.24)
Zetkanje Budyskeje župy
Budyšin. Posedźenje předsydstwa Budyskeje župy „Jan Arnošt Smoler“ je so wčera na Radworskim dwórnišću wotměło, kaž regionalna rěčnica Katja Liznarjec informowaše. Tam su so čłonojo gremija ze zastupjerjemi Domowinskich skupin a župje přisłušacych towarstwow zetkali. Woni aktiwity serbskich cyłkow rozjimachu a so zdźerženju w wutworjenju rěčnych rumow wěnowachu.
Nuzowe přebywanišćo zawru
Budyšin. Budyski krajnoradny zarjad zawrěje kónc apryla po planje Wojerowski dom za požadarjow wo azyl na Liselotte Hermannowej dróze. Sto wobydlerjow domu přećehnje potom do decentralnych kwartěrow. Dohromady ma wokrjes 1700 požadarjow wo azyl w centralnych a decentralnych přebywanišćach zakwartěrowanych.
„Čěscy“ Rusojo přećiwo Putinej
Wuprawu wuznamnymaj pčołarjomaj wěnowali
40 čłonow Kamjenskeje župy „Michał Hórnik“ a Wojerowskeje župy „Handrij Zejler“ poda so minjenu sobotu na kubłansku jězbu do Berlina. Jězba bě wuznamnymaj pčołarjomaj Serbej Hadamej Bohuchwałej Šěrachej a Słowjencej Antonej Janši wěnowana. Jako prěnje wobhladachu sej wustajeńcu Słowjencow wo pčołkach a ludźoch w Muzeju europskich kulturow. Wobdźělnicy zhonichu wo rozpřestrětym pčołarstwje we Słowjenskej. Po wobjedźe podachu so dale do wopomnišća Berlinskeje murje na Bernauskej dróze. Tu čakaše na wulětnikarjow zajimawe wjedźenje, na kotrymž přewodnik wo twarje murje, wo woporach a wo padnjenju murje informowaše.
Popołdnju wužichu wobdźělnicy swobodny čas k wopytej Braniborskich wrotow. Nasyčeni z mnohimi zajimawymi informacijemi nawróćichu so wječor zaso do Němcow, Konjec a Ralbic. Dalšu kubłansku jězbu do Berlina přewjedu sobotu 13. apryla. Přizjewjenja přijimuje Katja Liznarjec w Serbskim domje w Budyšinje pod telefonowym čisłom 03591 550211. Katharina Jurkowa
Dźěl domizniskich stawiznow
Dwurěčny pomnik za padłych Prěnjeje swětoweje wójny chcedźa ponowić
Łaz (AK/SN). Łazowska gmejna podpěruje saněrowanje němsko-serbskeho pomnika za padłych Prěnjeje swětoweje wójny při cyrkwinskej muri we Wulkich Ždźarach. Tole su radźićeljo na swojim zašłym posedźenju jednohłósnje wobzamknyli. Za projekt chce komuna Budyskemu wokrjesej próstwu wo spěchowanske srědki zapodać. To ma so po słowach radźićela Steffena Mühla (Łazowscy swobodni wolerjo) najpozdźišo hač do septembra stać.
