Towarstwo je kulturna duša wsy
Ćisk (JT/SN). Z 91 čłonami, z toho 62 žonow, je Ćišćanske kulturne towarstwo po sportowym towarstwje druhe najwjetše towarstwo wsy. Wone je takrjec kulturna duša wsy a organizuje kóžde lěto wjacore zjawne zarjadowanja w Ćišćanskim statoku, kiž je domicil towarstwa. Na hłownej zhromadźiznje minjeny pjatk bilancowaše předsydka Tina Schubertowa aktiwity zašłeho lěta. Mjez druhim běchu to nalětni swjedźeń a domchowanka kaž tež dźiwadło pod hołym njebjom. Adwentne wiki su wšitke wjesne towarstwa wuhotowali. Dale přewjedźechu rjad Ćišćanske wočinjene wokno kaž tež Serbsku bjesadu a skutkowachu sobu w Krabatowym tydźenju.
Runje tak su na 150 lět starym Ćišćanskim statoku dale twarili, hdźež stajnje dźěło čaka. Tak je Wolfgang Finger z drjewom tepjenu pěc ponowił a René Schubert, Daniel Pollack a Jörg Fichte su za předawanišćo na Ćišćanskim statoku nowu třěchu natwarili. Nimo toho dachu přijězd k statokej wuplestrować.
Tež w zymskich prózdninach poskića experiMINT Campus w Radworju ...
Angažement mytowany
Kulow (SN). Herbertej Kobalzej spožči Budyski krajny rada Udo Witschas (CDU) wčera, póndźelu, wuznamjenjenje „čestnohamtski měsaca“. Hižo lětdźesatki dołho angažuje so Kobalz w Kulowskim karnewalowym towarstwje, rěka w zdźelence krajnoradneho zarjada. Wot lěta 2006 hač do 2015 běše wón předsyda woneho towarstwa a je z tym „tradiciju a zhromadnosć karnewaloweje towaršnosće trajnje formował“. Loni spožčichu jemu za jeho dołholětne prócowanja w swěće norow hižo najwyše wuznamjenjenje Zwjazka němskeho karnewala.
Nimo swojeho angažementa w pjatym počasu je Kobalz zahority jěchar a hižo wjele lět sobustaw jěchanskeho towarstwa w Kulowje, tež tam běše čłon předsydstwa. „Herbert Kobalz njeje jenož kulturu Kulowskeho karnewala sobu postajował, ale je tež politisku krajinu města wulce wobwliwował“, praji Witschas w swojej lawdaciji. Z tym měni wón wjelelětny mandat Kobalza za stronu CDU w měšćanskej radźe. Na spožčenju poby nimo měšćanosty Markusa Poscha tež tuchwilny prezident karnewaloweho towarstwa Mathias Glaab.
Krótkopowěsće (25.02.25)
Trjebaja maćernorěčnu wosobu
Bukecy. Starši něhdyšeje Witaj-skupiny w Bukecach a Bukečanska bjesada pytaja nuznje maćernorěčnu wosobu, kotraž by po póndźelach abo wutorach mjez 16 a 17 hodź. šěsć dźěći w starobje mjez třomi a sydom lětami pěstoniła. Próca so z honorarom zapłaći. Zajimcy njech přizjewja so pod telefoniskim čisłom 01525 /749130.
Michał Chěžka zemrěł
Budyšin. Serbski hudźbnik a dirigent Michał Chěžka je zašłu njedźelu w starobje 64 lět po dlěšej chorosći zemrěł. Rodźeny Budyšan je mjez druhim w 1980ych lětach jako orchestrowy asistent Serbskeho ludoweho ansambla skutkował. W 1990ych lětach je wón 1. serbsku kulturnu brigadu nawjedował a tamniši smyčkowy orchester Collegium musicum załožił.
Dan Brown a Praski turizm
Pioněr z Južneje Afriki wurjadne zdokonjał
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (64).
W zašłym přinošku sym wam předstajił natwar a funkciju wutroby, centrale krejneho wobtoka. Schorjenja tutoho elementarneho organa tworja zhromadnje ze schorjenjemi wobtoka smjertnu přičinu čisło jedyn w Němskej. Štóž je ćežko na wutrobu schorjeł, ma so husto z wulkimi wobmjezowanjemi we wšědnym žiwjenju bědźić.
W prózdninach do muzeja
Hospodarske spěchowanje wožiwić
Nowa wyša měšćanostka Běłeje Wody Katja Dietrich je po swojim wuzwolenju prěnich sto dnjow w zastojnstwje. W tym času dyrbješe hižo mnohe wužadanja zmištrować.
Běła Woda (AK/SN). Město Běła Woda zasadźuje so za profijowy lodosport a za přichod Łužiskich liškow. Tole podšmórny wyša měšćanostka Katja Dietrich (SPD) w swojej bilancy po prěnich sto dnjach w zastojnstwje. „Wažne je wobswětlenje a wobhrodźe ponowić. Jenož hdyž tele žadanja spjelnimy, dóstanu liški licencu za sezonu 2025/2026“, wona rjekny. 28. februara so měšćanska rada na wurjadnym posedźenju z tutej temu zaběra. Tuchwilu město płaćizny za lodowu halu znowa kalkuluje a dyrbi při tym wužiwanske časy, popłatki, płaćizny miliny kaž tež wody wobkedźbować. „Lodowa arena njeje za to wupołožena, zo mamy ekstra milinowy ličak za profijow. Tež to dyrbimy wobkedźbować a změnić“, praji Katja Dietrich. Dotalna kalkulacija płaćiznow pochadźa z časa do korony.
Lutowanje w gmejnje šwikali
Karnewalowe towarstwo prěni kapičkowy wječor přewjedło
Njebjelčicy (AKr/SN). Z norami połna wobsadźena bě sobotu Njebjelčanska „Bjesada“, jako tam Serbskopazličanske karnewalowe towarstwo prěni kapičkowy wječor swojeje 53. sezony swjećeše. Wječor zahajichu po protokolu ze zaćahom rady jědnaćoch, škričkowej gardu, a prezident Daniel Wätzig wšitkich hosći witaše. Z mócnym WCV helaw a wutrobnym přikleskom witachu wosebje amtěrowacy princowski por Clemensa II. a jeho princesnu Andreju III.
Po dwurěčnej narěči knježićelow zarejowa škričkowa garda ze zapalom a temperamentom swoju gardowu reju. Trochu pozdźišo tež dorostowa holča garda z reju wustupi. Hižo něšto lět smědźa so nory na lóštnu narěč Kornelije Kurjatoweje wjeselić. Wona so tónkróć na swoje njezaměnliwe wašnje ze zwjazkowej politiku rozestaješe. Wosebje stronu Zelenych ze šćipatym jazykom pošwika.
Krótkopowěsće (24.02.25)
Přeprošuja znowa na seminar
Opole. Młodźina europskich narodnych mjeńšinow (MENS) zarjaduje tež lětsa zaso swój tradicionalny jutrowny seminar. Na njón přeprošuja zajimowanych wot 11. do 17. apryla do pólskeho města Opole. Hač do 9. měrca hišće maja młodostni a młodźi dorosćeni chwile so přizjewić. Za to je trěbne, so ze serbskim młodźinskim towarstwom Pawk pod skontaktować.
Lubina Kühnowa je direktorka
Wojerecy. Serbowka Lubina Kühnowa nawjeduje wot 1. februara Wojerowski Lessingowy gymnazij. Dotalna šulska nawodnica Katharina Michelfeit je so po 18lětnym skutkowanju na kubłanišću na wuměnk podała. Tež nawoda tamnišeho Johanneuma Günter Kiefer je so do wuměnka rozžohnował. Jeho městno jako nawoda gymnazija a wyšeje šule so hižo njewupisa.
Powyšenje jasnje přesnadne
Policija (21.02.25)
Diesel kradnyli
Chrósćicy. We wulkim stilu diesel kradnyli su njeznaći minjeny čas na Wićežnym puću w Chrósćicach. Kaž policija zdźěli, paduši tam w času wot 20. januara hač do předwčerawšim z priwatneho zawoda něhdźe 5 000 litrow ćěriwa spakosćichu. Při tym nasta něhdźe 8 000 eurow škody. Nětko pytaja swědkow, kotřiž su w mjenowanym času něšto podhladne wobkedźbowali. Pokiwy přijimuja w kóždym policajskim běrowje.
