Rejowarjo přihotuja so na jubilej
W Chrósćicach su kónc tydźenja kermušu woswjećili. Tež dźensa ...
Wobohaćacy aspekt inkluzije
W Němcach nowy bjezbarjerny wjacezaměrowy dom poswjećili
Němcy (KD/SN). Wjeselo mjez sobudźěłaćerjemi zwjazkoweho zjednoćenstwa žiwjenskeje pomocy Kamjenc-Wojerecy na stejnišću w Němcach běše njedawno wulke. Woni su tam nowy, bjezbarjerny wjacezaměrowy dom poswjećili. „Tu móža w našim bydlenskim zhromadźenstwje bydlacy ludźo z handikapom skónčnje zaso prawidłownje sportować a swjedźenje swjećić“, praji regionalny nawoda předsydstwa zjednoćenstwa Bernd Wiesner. „To je wažny zakład za to, zo su woni dale a bóle aktiwnje na žiwjenju wobdźěleni a z tym spjelnimy zdobom tež hłowny zaměr našeho zjednoćenstwa, za kotryž so wšitcy čłonojo zasadźa“, wón doda.
Krótkopowěsće (28.10.24)
CDU z nowym předsydstwom
Budyšin. CDU w Budyšinje je nowe předsydstwo wuzwoliła. Nawoda wokrjesneho šulskeho zarjada Matthias Knaak je nowy předsyda. Nimo toho słušeja nětko Elisabeth Hauswald, Andreas Ziesche a Anke Knaak k předsydstwu, kotrež chce so 12. nowembra skonstituować. Z dobrej politiku chce so nowe načolnistwo wo to postarać, zo dowěra ludnosće do CDU zaso přiběra.
Brehmer wostanje wjesnjanosta
Rěčicy. Ralf Brehmer wostanje wjesnjanosta w Rěčicach. We wčerawšich wólbach hłosowaše 879 wobydlerjow gmejny za njeho. Dalši kandidat Torsten Lorenscheit dósta jenož 454 hłosow. Wólbne wobdźělenje wučinješe 66,4 procentow. Brehmer chce předewšěm medicinske zastaranje zaručeć. Tež wo wuwiće přemysłoweju přestrjenjow chce so wón dale prócować.
Kupnicu chce přetwarić
Seniorojo škotuja
Liza-Marija Cyžec w našej redakciji
Liza-Marija Cyžec je lětsa abituru złožiła a so potom za najlěpšu opciju rozsudźiła: něšto měsacow w redakciji Serbskich Nowin dźěłać. Tak móže so 19lětna Chróšćanka wšědny dźeń z nowymi temami serbskeho a druheho swěta zeznajomić. Wona njeje sej pak mysliła, zo budźe jej dźěło za redakciju serbskeho dźenika tak spodobać. Wšako druhdy hakle na rańšim posedźenju zhoniš, štož změješ popołdnju na starosći.
Přiwšěm profituje redakcija wot jeje kruteho zakótwjenja w serbskim kulturnym žiwjenju a wjele kontaktow. A Liza-Marija dóstawa nic jenož dohlad do pisanja, komentowanja, ale, kaž sama praji, „móžnosć zwučować, kritisce swoje měnjenje prajić.“
Team redakcije začuwa wona jako jara pomocliwy, tak dóstawa přeco hnydom wotmołwu na wšě prašenja. Zdobom so redaktorojo wězo wjesela, zo něhdyša šulerka wukonoweho kursa serbšćiny w dobrej maćeršćinje tež pod wulkim časowym ćišćom jara produktiwnje – z tekstami a fotami – k aktualnym wudaćam Serbskich Nowin přinošuje.
Njewšědne zwučowanje w lěsu su Smječkečanscy a Worklečanscy ...
Roman „Raumfahrer“ předstajił
Wojerowska ludowa uniwersita je srjedu na dalše zarjadowanje w rjedźe „Rozmołwa na hrodźe“ přeprosyła. W Zhorjelcu bydlacy awtor Lukas Rietzschel je tu swój roman „Raumfahrer“ předstajił.
Wojerecy (KD/SN). „Domy móžeš zwotnosyć a znowa natwarić, dopomnjenki nic“. Tuta sada je kaž zjeće wobsaha w lěće 2021 wušłeho druheho romana „Raumfahrer“ w Zhorjelcu bydlaceho awtora Lukasa Rietzschela.
W knize zeznaje młody hladar Jan z Kamjenca hižo stareho pacienta Torstena, kotryž jemu wšelake dokumenty z powójnskeho a NDRskeho časa přepoda. Fota a listy swědča wo zwisku dóńtow Janoweje swójby a swójby swětoznateho molerja Georga Baselitza kaž tež jeho bratra Güntera Kerna. Naposledk mjenowany bydli hač do dźensnišeho w Kamjencu. „Wón je mój tworićelski proces z originalnymi podłožkami jara podpěrował“, powědaše Lukas Rietzschel w rozmołwje z Anna-Mariju Bulang, sobudźěłaćerku Wojerowskeje ludoweje uniwersity, kotraž je derje wopytane zarjadowanje na Wojerowskim hrodźe moderěrowała.
Zakłady za klětu połožili
Gmejnska rada Ralbicy-Róžant wustawki za wažne dźěła přichoda schwaliła
Ralbicy (JK/SN). Gmejnska rada gmejny Ralbicy-Róžant bě so zaso w Ralbičanskej starej šuli k swojemu posedźenju zetkała. K zahajenju poda komornica Franciska Čapkowa přehlad wo wuwiću pozicijow lětušeho hospodarskeho plana. Pola wudawkow je gmejna směrnicy spjelniła, dźakowano połnemu wurunanju přidatnych wudawkow za nowotwar Ralbičanskeje pěstowarnje. Sakska spěchowanska banka je, kaž SN hižo rozprawjachu, wšitke dodatne wudawki w połnej wysokosći spěchowała. Najebać to pak je gmejna dale namołwjena, zlutniwje hospodarić. K tomu přinošować budu nowe wustawki k zakładnym dawkam w gmejnje. Tute su zakład za klětuše zwyšenja resp. rjadowanje dawkow. Diskusija mjez radźićelemi w zwisku z temu bě kontrowersna, wosebje hladajo na wysokosć dawkow a na sumu zwyšenja. Přitomny předsyda zarjadniskeho zwjazka „Při Klóšterskej wodźe“ Stefan Anders wobkrući radźićelam, zo móže so zakładny dawk hač do 30. junija klětu skorigować.
Prěnje kwasne wiki w Njeswačidle
Njeswačidło (UM/SN). Kóždy porik, kotryž chce swój „najrjeńši dźeń žiwjenja“ – kwas – woswjećić, drje pyta za cyle wosebitym, dostojnym městnom za tutón swjedźeń. Njeswačanski barokny hród je tajka městnosć. W lěće 2024 je sej tu 31 kwasnych porikow slub za žiwjenje dało, praji Ariane Wünderlich, hłowna stawnica w Njeswačanskej gmejnje.
