Chrósćicy (JK/SN). Hnydom na spočatku wčerawšeho posedźenja Chróšćanskeje gmejnskeje rady skedźbni wjesnjanosta Marko Kliman (CDU) na to, zo budźe zjawny dźěl posedźenja jenož krótki, porno poměrnje wobšěrnemu dźělej njezjawneho. Tak potom tež bě. Přiwšěm pak w běhu dobreje poł hodźiny wjacore naležnosće zrjadowachu. Nimo nimale kuriozneho wobzamknjenja k twarskej naprawje informowaše wjesnjanosta radźićelow wo tym, zo zwyši so zarunanje za hladanje wotpadkowych kontejnerow, kotrež we wjeskach gmejny steja, přichodnje wo 20 procentow. Něhdy měješe krajnoradny zarjad tute sudobja na starosći, ale je zamołwitosć za nje na gmejny delegował. Wone maja z wotpadkami tola husćišo problemy. To so nětko něšto lěpje zaruna.
Z alkoholom do přirowa
Pančicy-Kukow. Na wokrjesnej dróze 9238 pola Pančic-Kukowa je w nocy na wutoru k wobchadnemu njezbožu dóšło. 25lětny wodźer VW bě z dotal njeznateje přičiny w prawej křiwicy na lěwy bok puća zajěł a so do přirowa sunył. Při tym nasta něhdźe 5 000 eurow škody. Při wobdźěłanju njezboža policisća zwěsćichu, zo měješe wodźer awta 1,04 promile alkohola w kreji. Na to njedyrbješe wón jenož krej, ale tež swoju jězbnu dowolnosć wotedać.
Kolesa zaso přišrubowali
Bretnig. Kuriozne padustwo je so kónc tydźenja w Bretnigu stało. Njeznaći su wot Opela najprjedy štyri kolesa wotšrubowali a na to spinadła wottwarili. Skónčnje wšitke kolesa zaso přišrubowachu a so hakle potom zminychu.
Ćisk (JT/SN). Po starym wašnju so w Ćisku kóžde lěto po zakónčenju póstniskeho časa mužojo ze wsy na tak mjenowane póstniske piwo zetkaja. Minjenu sobotu je so na tymle nałožku něhdźe sto muži wobdźěliło. Do wsy přićehnjenych muži kaž tež tych, kotřiž su so w zašłych měsacach woženili, je wjesny předstejićer Jens Zahrodnik z ruku do wjesneho zhromadźenstwa witał. Kóždy ze sydom muži je 50 eurow zapłaćił. Tak woni swój obolus za wjesnu zhromadnosć zapłaćichu a so wo darmotne piwo za tamnych wobdźělnikow tohole zarjadowanja starachu.
Budyšin (dpa/SN). W procesu wotpaleneje cyrkwje we Wulkich Rědorjecach (Großröhrsdorf) dla su wobskorženeho ćežkeho zapalerstwa dla k dźewjeć lět trajacemu jastwu zasudźili. Sudnistwo měješe při wozjewjenju wusuda wčera za dopokazane, zo je 41lětny 4. awgusta 2023 woheń w Božim domje wotpohladnje zamiškrił. K tomu bě wón w baroknym twarjenju bencin zapalił, kotryž je přez rozbite wokno w domje wukidał. Při tym bě so muž zranił. Cyrkej so dospołnje wupali. Wěcna škoda wučinja něhdźe 32 milionow eurow.
Politkarjow komunow škitać
Drježdźany. Wěstota komunalnych politikarjow bě hłowna tema konferency wutoru na Drježdźanskim lětanišću. Tam wuradźowachu zastupjerjo komunow, policije a swobodneho stata wo tym, kak móhło so wěstotne połoženje zjawnych politiskich wosobow hladajo na přiběracu agresiwitu jim napřećo polěpšić. W přichodźe chcedźa jich lěpje škitać a za to wšě trěbne srědki nałožować.
Rakečanscy finale docpěli
Radwor. Prěnje koło wokrjesneje pěstowarskeje olympiady wotmě so wčera w Radworskej sportowej hali „Slavia“. Na wubědźowanju wobdźělichu so wjacore skupiny pěstowarnjow mjez druhim z Radworja a Chrósćic. Prěnje městno wudoby sej skupina dźěći Rakečanskeje pěstowarnje, druhe městno docpěchu dźěći kubłanišća ze Zemic-Tumic. Wobě cyłkaj kwalifikowaštej so za finale.
Nowak ministerstwo wopušći
„Posłuchaj lěkarja, prjed hač jeho trjebaš!“, serbske přisłowo namołwja.
Tuž wěnuje so student mediciny Pětr Dźisławk znatym a mjenje znatym chorosćam, zo by je čitarjam trochu bliže rozłožował (39).
W starobje ludźo zwjetša špatnišo widźa. To móže wšelke přičiny měć, wot prosteje degeneracije brónicy hač ke kompleksnym syndromam. Často jewitej so w tym konteksće tež wopřijeći šěre a zelene mjadro. Lědma štó pak wě wonej chorosći rozeznawać, byrnjež jara rozdźělnej byłoj. Šěre mjadro mjenujemy w medicinje tež katarakt, na swěće z cyłkownje 95 milionami potrjechenych rewersibelna přičina čisło jedyn za woslepjenje. Rewersibelne rěka wobroćomne, sleposći da so potajkim terapeutisce zadźěwać. Šěre mjadro wšak wopisuje zamućenje čóčki, zwjetša spomaleneje wuměny maćiznow w starobje dla.
Pos njeskutki wuslědźił
Biskopicy. Policajski pos je njedźelu w Biskopicach wjacore njeskutki wuslědźił. Najprjedy bě so na Neustadtskej wobchadne njezbožo stało, při kotrymž motorski do awta zrazy. Po zražce wodźer motorskeho ćekny. Při wobdźěłanju njezboža zasadźichu mjez druhim policajskeho psa. Tón wjedźeše zastojnikow do zahrodkownišća, hdźež bě so 36lětny zawinowar zražki schował. Wón přizna, zo bě njezbožo zawinił. Kaž so wukopa, njebě motorske přizjewjene a tež nic zawěsćene. Hamtske čisło njebě płaćiwe. Jězbnu dowolnosć muž njeměješe. Nimo toho steješe wón pod wliwom drogow.