Železnica po muzeju jězdźi
Wšitcy lubowarjo modelowych železnicow nadeńdu w tutych dnjach jónkrótny poskitk w Njeswačanskim domizniskim muzeju. Tam natwarichu zamołwići wosebitu wustajeńcu mjez druhim z miniaturnym swětom, w kotrymž so ćahi pohibuja.
Njeswačidło (ML/SN). Wosebitu dohodownu wustajeńcu z dohromady třinaće modelowymi železnicami je Wojerowske towarstwo modelowych železnicow wuhotowało. Wone zhladuje mjeztym hižo na 57 lět swojeho wobstaća. Wojerowscy hobbyjowi twarcy modelowych ćahow zhotowichu dźesać dioramow a jědnaće modelowych železnicow, kotrež móže wopytowar we witrinach wobdźiwać.
Mjez nimi je model w Němskej prěnjeje parneje lokomotiwy z mjenom „Saksonija“. W lěće 1838 w Drježdźanach twarjena, je wona hač do lěta 1849 ludźi z Lipska do Drježdźan wozyła. Nimo wjele dalšich modelow nadeńdźe wopytowar tu tež model dieseloweje lokomotiwy BR110 z wagonom. Wona bě wot 1960tych lět sem jara rozšěrjeny typ Němskeje železnicy NDR.
Nowe zetkanišćo rosće
W Rodecach zběhanku za wulke předewzaće gmejny swjećili
Rodecy (SN). Jedne z předewzaćow, kotrež we wobłuku strukturneje změny w dwurěčnej Łužicy zwoprawdźeja, je nowy kulturny a zetkawanski centrum w Rodecach w Bukečanskej gmejnje. Po šěsć měsacach twarskeho časa su jeho hrube kontury mjeztym jasnje spóznajomne. W přitomnosći zastupjerjow gmejny a kehelowanskeho towarstwa, sobudźěłaćerjow twarskich firmow kaž tež planowarjow swjećachu tam předwčerawšim zběhanku.
W nowym kulturnym a zetkawanskim centrumje budu kehelowanska připrawa ze štyrjomi čarami, rumnosće za techniku a skład a předewšěm žurla za zarjadowanja towarstwow, wobydlerske zhromadźizny a dalše najwšelakoriše zjawne zaměry zaměstnjene. We wobłuku inwesticiskeho zakonja brunicoweho regiona dósta Bukečanska gmejna za projekt w Rodecach 2,9 milionow eurow spěchowanja přizwolenych. To je 90 procentow cyłkowneje twarskeje sumy. Tak móže na městnje dotalneho a dodźeržaneho zetkawanišća nowe nastać.
Cyble nalětnich kwětkow tykali
Krótkopowěsće (22.11.24)
Jako „turistiski rjek“ mytowany
Lipsk. Referent Domowiny a předsyda towarstwa Serbski kulturny turizm Pětr Brězan je wčera w Lipsku za swoje zasłužby we wobłuku regionalneho turizma wuznamjenjenje „turistiski rjek“ dóstał. Sakske ministerstwo za wědomosć, kulturu a turizm je cyłkownje 55 ludźi na Lipšćanskich turistiskich wikach počesćiło. Březan bě jedyn z nich.
Serbaj na „Liet international“
Bastia. Na hudźbnym wubědźowanju w mjeńšinowych rěčach „Liet international“, kotrež so dźensa na kupje Korsika wotměwa, wobdźěli so tež delnjoserbska spěwarka Lena Hauptmannojc z pěsnju „Co by nadejšła“. Choćebužanka studuje jazz-spěwanje w Lipsku. Mjez jurorami je lětsa prěni raz tež Serb, hudźbny redaktor Serbskeho rozhłosa Handrij Špitank.
Ukrainjenjo etatej tyja
Grit Lemke z filmom w Kufa
Wojerecy. Zhromadnje z Medijowej syću Łužica přeprošuje Wojerowska Kulturna fabrika (Kufa) na zarjadowanje z předstajenjom filma serbskeje filmowče Grit Lemke „Pola nas rěka wona Hanka“ a to njedźelu, 24. nowembra, w 19 hodź. do rumnosćow Kufa na Piwarskej hasy 1 we Wojerecach. Z hosćom je tež serbski spěwotwórc Jacke Schwarz, kotryž před předstajenjom filma wustupi. Režiserka Grit Lemke přeprošuje na zhromadnu rozmołwu na kóncu zarjadowanja.
Na Chrysta krala do Chrósćic
Chrósćicy. Dekanatne dušepastyrstwo Worklecy přeprošuje serbskich katolskich młodostnych njedźelu Chrysta Krala, 24. nowembra, w 14 hodź. na nyšpor do Chróšćanskeje cyrkwje. Zajimcy njech přiwjezu sej swoje šmóratko sobu. Po tym su wšitcy na zhromadnu swačinu a překwapjenku na tamnišej farje přeprošeni.
Pochod přećiwo antisemitizmej
Towarstwo Cyrila a Metoda je lětsa ze swojej akciju „Łužica ...
Z nowej drastu překwapili
Z wustupom Serbskeho muskeho chóra Delany w Pančicach-Kukowje je so wutoru lětuši rjad nazymskich koncertow zakónčił. Delanscy mužojo žnějachu za swój dobru hodźinu trajacy program wjele chwalby a sej tež z publikumom zhromadnje zaspěwachu.
Pančicy-Kukow (SN/MWj). 22 lět je trało, zo je sej Domowinska skupina Pančicy-Kukow zaso raz Serbski muski chór Delany na nazymski koncert přeprosyła. Z nimale 90 wopytowarjemi bě awla Šule Ćišinskeho połnje wobsadźena, jako mužojo tam spěwajo zaćehnjechu. To wšak běchu hišće w swojich kabatach. Pod nimi pak mějachu překwapjenku přihotowanu, kotruž pozdźišo hordźe prezentowachu. W Pančicach mjenujcy wustupichu prěni raz z nowym outfitom, a to z běłymi folklornymi košlemi a z lacom, na kotrymž mějachu stilizowany chmjel a ječmjeń našity. Z podpěru Załožby za serbski lud běchu sej nowu drastu w Čěskej zešić dali. Debjenku na lacach naćisnyła bě Marija Šołćic, za čož so jej na kóncu programa nawoda chóra Janek Wowčer z kwětku dźakowaše.
Wustawki za słužbu změnili
Wohnjowi wobornicy w Halštrowskej Holi dóstanu wyše wotškódnjenje
Hory (AK/SN). Gmejna Halštrowska Hola chce kameradam dohromady dźewjeć dobrowólnych wjesnych wohnjowych woborow fairne a přiměrjene wotškódnjenje płaćić. Tole podšmórny wjesnjanostka Antje Gasterstädt (CDU) wutoru na posedźenju gmejnskich radźićelow w Horach. Jednohłósnje su woni předźěłane wustawki za zarunanje wudawkow wohnjowych woborow wobzamknyli. „Je to wuraz hódnoćenja a připóznaća. Nochcemy pak jenož fachowu kompetencu wohnjowych wobornikow hódnoćić, jich dźěło je tež wažna słužba na dobro zhromadnosće“, wjesnjanostka podšmórny.
Prěnje zymske poskitki při jězoru
Hamor (AK/SN). Hamorska gmejna zhladuje na wuspěšnu sezonu 2024 při Bjerwałdskim jězoru. Tole wuzběhny wjesnjanosta Hendryk Balko (Hamorske wolerske zjednoćenstwo) na zašłym posedźenju gmejnskeje rady. Wón dźakowaše so towarstwam a njeličomnym pomocnikam za zarjadowanja, kotrež su lětsa přewjedli, mjez druhim za njedawnu 27. mjezynarodnu Łužisku rallye ADMV.
31. oktobra je so wodosportowa sezona při Bjerwałdskim jězoru skónčiła. Nětko spočina so za nuzniki, přistawy, parkowanišća a wobswětlenje takrjec zymski čas. Specialna firma stara so wo wšitke płuwace připrawy w přistawach. To žada sej dźeń a wjace wudawkow, dokelž wichory stajnje sylnišo zachadźeja a škody naparaja. W zhromadnym projekće z Łužiskim a srjedźoněmskim hórnistwowym zarjadnistwom (LMBV) chce gmejna tute připrawy přetwarić a je wužadanjam změny klimy přiměrić.
Krótkopowěsće (21.11.24)
Klětu dóstanu wjace mzdy
Radebeul. Sakska metalowa a elektroindustrija přewozmje Hamburgske tarifowe wobzamknjenje. Na to dojednachu so dźěłarnistwo IG metal a dźěłodawarjo zawčerawšim w Radebeulu. Z tym změje 160 000 přistajenych branše w Swobodnym staće wjace mzdy. W februaru dóstanu woni jónkrótnje 600 eurow. Wot apryla budźe mzda wo 2 proc. stupać. Dalše zwyšenje je w aprylu 2026 planowane.
Łopjena z trutami rozdźěla
Wjelcej. Hladajo na rozšěrjenje nawěškowych łopjenow dale a wjac roznošowarjow pobrachuje. Towaršnosć za roznošowanje Łužica chce w přichodźe truty zasadźić, kotrež maja wot lětanišća we Wjelcej sem domjacnosće w regionje posłužeć. Lětanske objekty towaršnosć za logistiku Morpheus w sewjerorynsko-westfalskim Lüdenscheidźe wodźi. Najprjedy raz maja truty „Lausitzer Woche“ a „LR Tipps“ rozdźělić.
Wjerški minjeneju lětdźesatkow
