Stajnu wustajeńcu w muzeju dwě lěće zawru
Kamjenc (SN/MWj). Dokelž Lessingowy muzej w Kamjencu přetwarja, njezměja tam wot přichodneje wutory hižo stajnu wustajeńcu. Kaž muzej w nowinskim wozjewjenju zdźěli, započnu so twarske dźěła 19. meje. Tón dźeń wotměje so w domje w 13.30 hodź. swjatočnosć składnostnje prěnjeho pisomneho naspomnjenja města Kamjenca před 800 lětami. Po tym zahaja twarske dźěła.
Do směra na park ma přitwar nastać. Z tym stworja wuměnjenja za to, zo móža na hornim poschodźe wosebite wustajeńcy na moderne wašnje prezentować. Z přitwarom wutworja nimo toho nowe puće w domje. Zatwarić maja so tež načasne sanitarne rumnosće. Wopytowarjo literarneho muzeja změja z tym lěpše wuměnjenja. Planowane je, muzej we wobłuku 56. Kamjenskich Lessingowych dnjow w lěće 2027 znowa wotewrěć.
Policija (07.03.25)
Z trikom pjenjezy wulišćili
Žane móžnosće za inwesticije
Zhorjelski wokrjes wostanje bjez wobzamknjeneho hospodarskeho plana
Zhorjelc (AK/SN). Zhorjelski wokrjes nima dale hospodarski plan za lěće 2025/2026. Tež hospodarski strukturny koncept dale njesćěhuja. To bě srjedu wuslědk posedźenja wokrjesneho sejmika. Wobaj dokumentaj je wjetšina radźićelow wotpokazała. „Z tym njemóžemy na přikład šule modernizować, dróhi a wuchowanske straže twarić a dalše projekty zwoprawdźić“, wuzběhny krajny rada dr. Stephan Meyer (CDU). W běhu přichodnych třoch tydźenjow chce wón wurjadne posedźenje wokrjesneho sejmika zwołać. Potom ma so hospodarski plan 2025/2026 po móžnosći tola hišće wobzamknyć.
Kćějate kamelije ludźi přiwabjeja
Štóž chce kónc tydźenja připowědźene rjane wjedro wužić, njech sej do Kinsporka dojědźe. Tamniše kamelije nětko w połnej pyše kćěja. Přichodne dny tam z tójšto poskitkami wabja.
Kinspork (SN/MWj). Wjele přidatnych wopytowarjow registruja tele dny a wočakuja přichodne tydźenje w Kinsporku. Woblubowane kamelije tam runje rozkćěwaja. Kaž Peter Sonntag z domizniskeho towarstwa zdźěli, zličichu stajnje njedźelu hač do tysac wopytowarjow. Nětko wočakuja móhłrjec statne wopyty, rjadownje šulerjow a samo slepych, kotřiž sej rjanosće wosebitych rostlin wotkrywaja.
Dźensa je sakska ministerska za infrastrukturu a wuwiwanje kraja Regine Kraushaar Kinsporski kamelijowy dom wopytała. Ju witaštej kamelijowej damje Lotta a Sophia, šulerce Kinsporskeje wyšeje šule. Holcy kćějate kamelije předstajištej a rozłožištej jich wuznam za region a za Saksku. Měšćanosta Heiko Driesnack a Peter Sonntag staj při tutej składnosći tohorunja infrastrukturne prašenja regiona narěčałoj.
Ławku z jutrownymi motiwami su wčera w Radworju zjawnosći ...
Krótkopowěsće (07.03.25)
Nowu přiradu wolili
Zhorjelc. Zhorjelski wokrjes ma nowu serbsku přiradu. Na posedźenju wokrjesneho sejmika zawčerawšim su zastupjerjo Dianu Maticowu (namjet CDU), Lutza Jankusa (namjet AfD), Sebastiana Bertko (namjet Swobodnych wolerjow) a Marka Schneidera (namjet Zelenych/SPD/dźěći a młodźiny sejmika) do gremija wuzwolili. Woni budu wotnětka ze społnomócnjenej za serbske naležnosće Kati Strukowej hromadźe dźěłać.
Wosadny mision zahajili
Radwor. W Radworskej wosadźe su wěriwi wčera wosadny mision z temu „Wěriš abo pytaš hišće?“ zahajili. Zhromadnje z Hünfeldskimi oblatami chcedźa sej wosadni japoštołske wěrywuznaće wotkryć. Za to su hač do 16. měrca nimo Božich mšow najwšelakoriše zetkanja planowane. Wobšěrny program nańdu zajimcy, tež z druhich wosadow, na internetnej stronje Radworskeje wosady.
Wulke myta kiwaja
Na balkonje so paliło
Wosebita wustajeńca
Budyšin. Wosebita wustajeńca „Wěčne pućowanje. Barba a słowo w twórbje ukrainskeho wuměłca Anrija Sharana“ so ke kóncej chila. Budyski Serbski muzej přeprosy na finisažu njedźelu 16. měrca 2025. Zarjadowanje započina w 15 hodź. z wjedźenjom po wustajeńcy. Po tym předstaja katalog wo wosebitej wustajeńcy. Wobdźěleni zastupjerjo institucijow smědźa sej bjezpłatny eksemplar kataloga sobu wzać.
Wobydlerski etat
Wojerecy. Ze spočatka februara přiwozmje město Wojerecy namjety za wobydlerski etat. Hač do 9. měrca móža wobydlerjo z Wojerec a měšćanskich dźělow hišće swoje ideje zapodać. Wobdźělnicy móža tak wužiwanje zjawnych srědkow w někotrych wobłukach wowliwować a projekty přesadźić, kotrež njedadźa so hewak zlochka zwoprawdźić. Dotal je Wojerowske měšćanske zarjadnistwo něhdźe połsta namjetow přijimało. Tute su na internetnej stronje podate a hrubje wopisane. Zajimcy móža swoje ideje na platformje města pod zapisać.
Policija (06.03.25)
Namakane šmóratko wotedał
Kulow. Přiwšěm póstniskim hołku a tołku spočatk tydźenja w Kulowje je so tam wosomlětny hólc runjewon přikładnje zadźeržał. Wutoru wokoło 11 hodź. namaka wón blisko dwórnišća šmóratko, kotrež bě po wšěm zdaću něchtó zhubił, a woteda namakanku policiji. Kaž w policajskej rozprawje rěka, jedna so wo Samsung Galaxy M30s. Wone bě w přewidnej škitnej wobalce. Štóž tajke šmóratko pyta, móže sej je w Kulowskim běrowje za namakanki wotewzać, hdyž dopokaz předpołoži, zo je wobsedźer.
Dróhotwar ludźi zaběra
Z krajnym radu aktualne prašenja Bukečanskeho regiona rozjimali
Bukecy (SN/MiR). Budyski krajny rada Udo Witschas (CDU) je so njedawno z Bukecami zaběrał. Na wobydlerskej rozmołwje pod hesłom „Na jedne słowo“ je so dwanaće zajimcow wobdźěliło. Nimo krajneho rady a decernentow su tež wjesnjanosća regiona wo aktualnych temach diskutowali. Mjez druhim rěčachu wo strukturnej změnje a hospodarskej perspektiwje. Jedyn Bukečan žadaše sej dokładniše informacije wo zasadźenju srědkow za naprawy strukturneje změny. Wšako nimaja wšitke projekty kaž busowe zastanišćo abo městnosće za přebywanje we wólnym času žanežkuli direktne tworjenje hódnotow. Wićaz rozjasnjowaše, zo so tele srědki zaměrnje za atraktiwitu regiona zasadźuja, dokelž njemóže Zwjazk w tymle zwisku předewzaća spěchować. Zaměr je z „mjechkimi faktorami za stejnišća“ region atraktiwniši sčinić a předewzaća kaž tež dźěłowe mocy přićahować. Zdobom so wokrjes wo připóznaće jako wosebita cona w zmysle „Net-Zero-Valley“ zasadźuje, zo by hospodarske lěpšiny měł. Přirjadnica dr.
