Na poslednim štwórtku wulkeho róžka smy sej kapłana Pětra Mróza do Budyskeho internata na domyswjećenje přepro­syli. Zhromadźichmy so we wulkej klubowni k małemu nyšporej. Mócnje a połnje zaklinčachu kěrluše a modlitwy. Po tym přewodźachu młodostni kapłana po domje, zo by jim žohnowanje na stwine durje napisał.

W lońšim lěće smy w internaće ně­kotružkuli rjanu akciju přewjedli, mjez druhim smy zhromadnje hrali, tykancy pjekli, kirbsowu poliwku warili abo reje za šulske zarjadowanja nazwučowali. Kaž kóžde lěto smy před hodownymi prózdninami adwentničku woswjećili. Loni je nas samo rumpodich wopytał – bjeze ­darow drje, za to pak „wobdari“ wšitkich z lóštnymi spěwami a hrami. Wosebje sym so wjeseliła, zo chcychu šulerjo hru „Activity“, kotruž běch namjetowała, w serbskej wersiji hrać. Zesłodźeli su nam tež naše samopječene poprjančki – te ­běchu so tónraz wosebje derje radźili.

Na městnje něhdyšeho lokala „Zeleny pysk“ na Budyskej Bohatej hasy wobhospodarja wot lěta 2023 Chorwatka Vesna Mladenović (nalěwo) swój bistro. Tam poskićuje 44lětna mějićelka jědźe balkanskeje kuchnje. Jej poboku steji ze Syriskeje pochadźacy šef­kuchar Ahmed Trabulseiah, kotryž prezentuje hordźe mjez hosćimi jara woblubowanu balkansku jědź „Pljeskavica“ – z wowčim twarožkom pjelnjeny steak ze sykaneho mjasa. Foto: SN/Bojan Benić

Narodniny woswjećili

Wojerecy. Wuchowanska straža we Wojerecach je wčera swoje 10lětne wobstaće woswjećiła. Z wjace hač 172 000 zasadźenjemi wob lěto wuchowanska centrala wuchodna Sakska zamołwiće słužbu za ludźi w nuzowych połoženjach wukonja, wuzběhny nawoda centrale Stefan Schumann na wčerawšim swjedźenskim zarjadowanju.

We Łužicy chcedźa stawkować

Budyšin. Dźěłarnistwo verdi namołwja tele dny k stawkam přistajenych zjawneje słužby. Tomu sćěhuja sobudźěłaćerjo měšćanskich zarjadnistwow w Budyšinje, Běłej Wodźe a Niskeje hdźež chcedźa zajutřišim stawkować. Verdi žada sej w aktualnych tarifowych jednanjach za přistajenych Zwjazka a komunow mjez druhim wosom procentow wjace mzdy, znajmjeńša měło to 350 eurow wob měsac być.

Ekstremisća ludźi mobilizuja

Hamor (AK/SN). Gmejna Hamor chce ­kołopuć wokoło Bjerwałdskeho jězora krok po kroku saněrować. Za lětsa planuje najprjedy ponowjenje 1 250 metrow dołheho wotrězka mjez přitokom Sprjewje južnje Delnjeho Wujězda a přistawom w Klětnom. Cyłkowne twarske kóšty ­wučinjeja něhdźe 286 000 eurow. Jednohłósnje schwalichu Hamorscy gmejnscy radźićeljo wotpowědny plan na swojim wčerawšim posedźenju. Financować chcedźa naprawu ze srědkami gmejn­skeho etata kaž tež ze srědkow Sakskeje komunalneje pawšale za wuporjedźenje a ponowjenje dróhow a kolesowanskich šćežkow.

Na posedźenju informowaše dr. Steffen Kutter, nawoda fachoweje skupiny za awtomatizowane jězdźenje na Drježdźanskej TU, wo dopóznaćach w zwisku z awtonomnje jěducym slědźerskim jězdźi­dłom, kotrež je mjez dwórnišćom w Klětnom a Bjerwałdskim jězorom po puću. Wot apryla móža wobydlerjo a zajimcy je zaso darmotnje wužiwać. W času wot 9 do 17 hodź. wone šěsć króć wob dźeń na mjenowanej čarje tam a sem jězdźi.