Rubježnistwa dla před sudnistwom
Budyšin (SN). Zhromadneho ćežkeho rubježnistwa dla dyrbja so wot 16. decembra třo wobskorženi na Budyskim krajnym sudnistwje zamołwić. Kaž nowinske zdźělenje sudnistwa wozjewi, wumjetuje statne rěčnistwo třom mužam, zo su 28. februara 2024 muža wurubili. Tutón bě we Wojerowskej lutowarni runje 400 eurow z awtomata wotzběhnył. Jedyn z třoch wobskorženych je jeho wotzady kruće dźeržał, mjeztym zo je jemu dalši 170 eurow ze zaka wućahnył. Wokoło sebje machajo chcyše škodowany dale tomu zadźěwać, zo jemu rubježnicy tež hišće 280 eurow drohi naručny časnik njepokradnu. Wobskorženi pak do škodowaneho bijachu a časnik tola dosahnychu. Swojich zranjenjow dla dyrbješe muž wjacore dny do chorownje a bu lěkarsce zastarany.
Jednomu z wobskorženych wumjetuja nimo toho wjacore namócne delikty, kotrež je wón wot silwestra 2023 hač do 15. januara 2024 skućił. Mjez druhim je so w Kamjencu do bydlenja zadobył a sej wot wobydlerjow pjenjezy a drogi žadał. Při tym hrožeše jim z nožom. Dale je lětsa w januaru w Kamjencu pjenjezy wudrěwał a žonu z namocu zranił.
Krótkopowěsće (05.12.24)
Serbja w koaliciskim zrěčenju
Drježdźany. „Serbski forum wědy na Lawskim arealu natwarimy“, pisatej najebać aktualne financielne wušparanja CDU a SPD w koaliciskim zrěčenju za Saksku. Woni chcedźa „w dialogu ze serbskim ludom“ Serbski zakoń reformować, so za mjeńšinowy artikl w zakładnym zakonju zasadźować, Institut za sorabistiku dale wuwiwać a serbowanje jako lěpšinu při wuzwolenju personala postajić. Porno šěsć linkam w zrěčenju SPD/BSW w Braniborskej, wěnuja serbskemu ludej w Sakskej 32 linkow.
Wojerecy wuzwolili
Wojerecy. We Wojerecach wotměje so klětu wot 12. do 14. septembra mjeztym 26. Dźakny žnjowy swjedźeń Sakskeje. Zarjadowar je město, krajny kuratorij Wjesny rum organizaciju přewodźa. Sydom dźěłowych skupinow je nětko na projekće dźěła. Wo tym informowaše wčera jednaćel kuratorija Marko Kliman we Wojerecach.
Dweju podhladneju wuslědźili
Spěwaja w dwórnišću
Historiskej woknje zatwariłoj
Dlěje hač 20 lět wobsteji w Pančicach-Kukowje pódla dźěłarnje ...
Kino w maćeršćinje za wšitkich
Radwor (SN/VaŽ). W zhromadnym dźěle Radworskeho młodźinskeho kluba „Radworske“ a staršiskeje iniciatiwy Radwor přewjedźechu minjeny pjatk kinowe zarjadowanje w klubje. Hižo šesty raz organizowaše młodźinski klub tajke zetkanje, při čimž bě to štwórty raz, zo so tež dźěći wobdźělichu. Něhdźe 30 dźěći z Radworja a wokoliny, mjez druhim tež z Budyšina a Worklec, wobhlada sej zhromadnje kanadiski dźěćacy film „Peeweeje – Mišterstwa na lodźe“ w serbskej rěči.
Dokelž přewjedźechu kino lětsa hakle w adwenće, sedźachu dźěći tónraz nutřka při ćopłym kaminje. W młodych mjezwočach so zajim za film jara wotbłyšćowaše. Dźesaćlětna Alena Dźisławkec bě zahorjena a připowědźi, zo sej film na swojich přichodnych dźěćacych narodninach z přećelkami znowa wobhlada. Wosebje lubješe so jej napjata atmosfera a kak su wšitke dźěći za prawe mustwo w duchu sobu wojowali. Zo by zarjadowanje awtentiske kinowe dožiwjenje skićiło, postara so młodźinski klub wo čerstwy popcorn, kołbaski a horce napoje. Zastup bě darmotny. Tak bě zarjadowanje wšitkim přistupne.
Slepjanske dźěćetko wjeršk było
Folklorny ansambl 25. raz adwentny program předstajił
Slepo (sb/SN). Z jubilejnym 25. programom „Nałožki-drasta-tradicije w adwenće“ sposrědkowaštej prěnju adwentnu njedźelu Slepjanski folklorny ansambl a tamniši dźěćacy ansambl na zajimawe wašnje žiwu kulturu Slepjanskeje wosady. Publikum dožiwi pisany program tradicionalnych rejow a spěwow, kiž je staršich kaž tež młódšich na žurli Serbskeho kulturneho centruma zahorił.
Pjeriznu a nukle wustajeli
Krótkopowěsće (04.12.24)
Brošurka wo mjeńšinach wušła
Berlin. Nowe wudaće informaciskeje brošurki zwjazkoweho ministerstwa nutřkowneho (BMI) wo připóznatych domoródnych narodnych mjeńšinach je njedawno wušło. Móžeće sej 92stronski zešiwk wo Serbach, Sintach a Romach, Danach, Frizach a delnjoněmčinje na internetnej stronje BM pod „serwis“ a „publikacije“ pak downloadować pak darmotnje skazać.
Wyše wudawki wobzamknyli
Budyšin. Budyski wokrjesny sejmik je na swojim posedźenju zawčerawšim wyše wudawki we wobjimje 700 000 eurow za ponowjenje Kamjenskeje spěchowanskeje šule wobzamknył. W zwisku z přetwarom su fachowcy škódne twarske maćizny zwěsćili. Tuž je nětko wobšěrne ponowjenje kubłanišća trěbne. Šulerjow přechodnje druhdźe wuwučuja.
Sta skóržbow zapodali
Kubłanska jězba do Choćebuza wjedła
30 čłonow Kamjenskeje župy „Michał Hórnik“ je so njedawno na kubłansku jězbu do Choćebuza podało. Župne předsydstwo je tradicionalne kónclětne a adwentne zarjadowanje z kubłanskej ekskursiju narunało. Spočatnje witaše hosći młodźinska koordinatorka župy Delnja Łužica Franciska Albertowa. Wona rozprawja wobdźělnikam wo serbskej kulturje a stawiznach Choćebuza. Delnjoserbsce wjedźeše wona skupinu po měsće. Při tym skedźbni wosebje na serbske wosebitosće, kotrež delnjołužisku metropolu charakterizuja.
Po słódnym zhromadnym wobjedźe wopytachu Serbski muzej. Tu Christina Kliemowa a jeje přichodna dźowka hosći po trajnej wustajeńcy a aktualnej keramiskej wustajeńcy Heidrun Bastianoweje wodźeštej. Wobě wědu wo mnohotnosći a rjanosći delnjoserbskeje kultury přeswědčiwje sposrědkowaštej, štož je wobdźělnikow wulce zahoriło.
