Stegmann: „Demokratija nas trjeba“
Wojerecy (KD/SN). Mjeztym druhi raz wotmě Iniciatiwa za ciwilnu kuražu demonstraciju we Wojerecach. Tam přizamknychu so swójby z dźěćimi, młodostni a wuměnkarjo tuchwilnemu hibanju, kotrež so po cyłej Němskej wotměwa. Wobdźělnicy akcijow wustupuja přećiwo prawicarskemu zmyslenju, wotpokazanju wukrajnikow abo seksualneje orientacije dla. Drježdźanska band Skaprifischer je zarjadowanje čestnohamtsce podpěrała.
„Stejimy tu, dokelž trjebamy demokratiju. Ale nětko trjeba demokratija nas“, zwurazni direktor wobłuka astrofyziki pola DESY a nawoda slědźenskeho centruma Zeuthen prof. dr. Christian Stegmann na torhošću před něhdźe 200 připosłucharjemi. W Zhorjelcu nastawacy Astrocentrum Łužica budźe Saksku dale na technologiski kraj wuwiwać, tola při tym dyrbja wědomostnicy a technikarjo z mnohich krajow derje hromadźe dźěłać. Zakład toho pak su demokratiju lubowacy łužiscy wobydlerjo.
Po lětomaj twarskeho časa su pjatk nowu sportownju Wojerowskeje ...
We Wojerecach demonstrowali
Krótkopowěsće (11.03.24)
Noweho wjesnjanostu wolili
Sprjewiny Doł. Jasnje z 78,3 procentami su wobydlerjo gmejny Sprjewiny Doł wčera njestronjana Marca Beera na přichodnych sydom lět k wjesnjanosće wolili. W Rudnych horinach rodźeny Beer dźěłaše dotal jako nawoda wotrjada za financy a twar za gmejnu. Wón naslěduje njestronjana Manfreda Heinu, kotryž je hižo wot lěta 1996 sem w zastojnstwje skutkował.
Wuspěšny festiwal SPIN 2030
Drježdźany. Na wědomostny festiwal zašły pjatk a sobotu w trajnej wustajeńcy w Drježdźanskich „Techniskich zběrkach“ bě dohromady 8000 wopytowarkow a wopytowarjow přichwatało. Wjace hač 50 wědomostnych zarjadnišćow a wšitke wysoke šule skićachu dohlad do mnohostronskeho slědźenja w Sakskej. Zabawne formaty kaž „science slam“ a „meet a scientist“ wotmołwjachu na prašenja a sposrědkowachu wědu.
Tójšto nowych mustwow
Fasadu wěže ponowja
Ukrainjanam poboku
W Budyskim wokrjesu su so na situaciju ćěkancow nastajili
Budyšin (SN/MiR). Mjeztym je tomu dlěje hač dwě lěće, zo w Ukrainje wójna knježi. Před lětomaj wozjewichu SN baseń słowjenskorěčneho awstriskeho nakładnika knihow a awtora Lojzy Wiesera, kotruž je wón nětko aktualnym podawkam přiměrił: Tu słónco. Tam (stajnje hišće) bomby. // Tudy (woprawdźe) měr? Tam (stajnje hišće) sylzy. // Tule (woprawdźe) přichod? Tam (stajnje hišće) hrózba! // Dokal dźemy? To so ludźo po wšěm swěće prašeja.
Policija (08.03.24)
Kolesowarja přewidźał
Worklecy. Srjedu popołdnju wujědźe ze swojeje ležownosće na Hłownej dróze we Worklecach 68lětny z awtom. Při tym přewidźa wón 73lětneho kolesowarja, kiž po dróze jědźeše, a zrazy do njeho. Kolesowar padny a so při tym lochce zrani. Nuzowu pomoc a policiju hnydom alarmowachu. Chorobne awto dowjeze muža do chorownje. Na awće a kolesu nasta wěcna škoda dohromady 1 800 eurow. Policija pad nětko přepytuje.
Nowa sirena mjenje płaći
Trjebin (AK/SN). Twar noweho sćežora za sirenu we wsy je gmejnska rada srjedu na swojim posedźenju wobzamknyła. Cyłkowne kóšty projekta wučinjeja 21 000 eurow. Swobodny stat Sakska spěchuje twar z 16 000 eurami, zbytk zapłaći gmejna sama. Tute srědki běchu do hospodarskeho plana zapisali.
„Wjele lět smy so wo spěchowanje prócowali, nětko su je nam skónčnje přizwolili“, praji nawoda Trjebinskeje wobory a gmejnski radźićel Thomas Husse (Wolerske zjednoćenstwo Trjebin). Nowu sirenu chcedźa blisko stareje šule postajić. Dołhi čas njebě jasne, hač budu sirenu woprawdźe twarić móc. Wšako njedóstachu spěchowanske srědki přizwolene. „Loni 22. decembra je nam krajna direkcija srědki připrajiła“, Husse dale rozłoži. Na to schadźowaše so techniski wuběrk gmejny a projektej naposledk přihłosowaše.
Mnozy mužojo su swoje žony dźensa zawěsće na dźeń žonow ...
Z centerom witanja kroča w Choćebuzu nowy puć
Choćebuz (SN/at). Center witanja maja w Choćebuzu wot minjeneho awgusta. Mjeztym staj so sobudźěłaćerjej wo naležnosće 363 wopytowarkow a wopytowarjow starałoj, kaž město Choćebuz tele dny informowaše. Center chce prěnja adresa być tym, kotřiž su migracije abo ćěkańcy dla do delnjołužiskeho wulkoměsta přišli, dale tym, kotřiž su tu přićahnyli abo so zaso nawróćili. Runje tak poradźuja tam w ramiku „poskitka Euro-Desk“ młodych ludźi wo móžnosćach, so we wobłuku přebywanja we wukraju kubłać. „Dalši stołp budźe w přichodźe powołanske poradźowanje, kotrež agentura za dźěło w centeru poskićuje“, rjekny nawodnica centruma Astrid Schreiber našemu wječornikej. Tam komunikaciju w němskej, arabskej, francoskej, jendźelskej, persiskej, ruskej a ukrainskej rěči zaručeja. „Tež pólsce je móžno“, nawodnica dodawa. W Choćebuzu bydli aktualnje wjace hač 12 500 ludźi, kotřiž němski pas nimaja. Před dźesać lětami bě jich 3 680. Tuž je dosć potrjeby jich podpěrać, zo bychu němčinu nawukli. „Dalša tema je dźěło, jich do tudyšich dźěłowych wikow zapřijeć“, rozłoži Astrid Schreiber.
