Kabl pokradnyli

Łupjanska Dubrawka. Elektriske kable najwšelakorišeho razu su stajnje znowa woblubowany cil paduchow. Tónraz měrjachu so na tajki we Łupjanskej Dubrawce w Radworskej gmejnje, a to na terenje wobhrodźeneje pěskoweje jamy tamnišeho betonoweho zawoda. Wottam pokradnychu něhdźe 60 metrow sylno- prudoweho milinowoda. Jeho hódnotu trochuje šef zawoda na něhdźe 10 000 eurow. Kriminalni technikarjo zawěsćichu slědy. Policisća je nětko wuhódnoćeja a pad dale přepytuja.

Budyšin. Fotowu přehladku „Heimat – Domizna“ Andreasa Varnhorna z Frankfurta nad Mohanom wotewru srjedu, 21. februara, we 18 hodź. w Budyskej Serbskej kulturnej informaciji. Budźe-li zajim jara wulki, zetkaja so wopytowarjo k wotewrjenju na žurli. Andreas Varnhorn je před 25 lětami Hornju Łužicu wopytał a wosebje katolskich Serbow při naj­wšelakorišich přiležnosćach, nałožkach, swjedźenjach atd. fotografował. Loni je jich znowa wopytał, wospjet na swojim aparaće zapopadnył, z nimi samo někotružkuli rozmołwu wjedł a so prašał, kak bě so jim mjeztym zešło. Wustajeńca w SKI a na chódbach Serbskeho domu skići zajimawy wid na nowše serbske stawizny. Wona je dwurěčna (němsko-serbska) a tuž tež němskim wopytowarjam jara zajimawa. Prěnjotnje za Dom při hłownej cyrkwi w Frankfurće koncipowanu su ju tam wot 1. decembra 2017 do 31. januara 2018 pokazali. Załožba za serbski lud je składnosć wužiła a přehladku do Łužicy skazała. Prezentaciju z fotami a tekstami pokazaja hač do 30. junija, a to wot póndźele do pjatka k wotewrjenskim časam Serbskeje kulturneje informacije wot 10 do 16.30 hodź.

Budyšin. Na Serbskej wyšej šuli Budyšin na Friedricha Listowej 8 móža starši spočatk měrca nowych šulerjow přichodneho 5. lětnika za šulske lěto 2018/2019 přizjewić. Móžno je to k slědowacym terminam: štwórtk, 1. měrca, wot 7.30 do 18 hodź., pjatk, 2. měrca, wot 7.30 do 13 hodź., póndźelu a wutoru, 5. a 6. měrca, wot 7.30 do 16 hodź. a srjedu 7. měrca, wot 7.30 do 12 hodź. Kaž šula zdźěli, su předznajomosće serbšćiny kriterij za přiwzaće. Za zapisanje trěbne su wupjelnjeny přizjewjenski formular, kubłanske poručenje zakładneje šule, narodźenske wopismo a połlětna informacija z 9. februara 2018.

Z wulkej inwesticiju chcedźa njeznjesliwe połoženje w šuli přewinyć

Worklecy (SN/MWj). Zo bychu tuchwilne napjate połoženje wokoło horta we Worklečanskim šulskim twarjenju dołhodobnje rozrisali, je gmejnska rada na swojim wčerawšim posedźenju jednohłósnje wobzamknyła nowy hort twarić. Po prěnich idejach, kotrež wjesnjanosta Franc Brusk (CDU) radźićelam předstaji, móhło to dwuposchodowe twarjenje z płonej třěchu z městnom za 120 dźěći być. Nastać móhł dom na sewjernej kromje šulskeho a sportoweho kompleksa, tak zo by hromadźe ze sportownju a šulu třistronski ansambl tworił. Kóšty trochuja na 1,8 milionow eurow.

Tuchwilne połoženje horta je runjewon katastrofalne. Za 95 přizjewjenych dźěći blokuja šěsć rumnosćow, kotrež šulomaj pobrachuja. Nimo toho nastawa stajnje wulka hara, hdyž so holcy a hólcy z horta woblěkaja abo rozhotuja, mylo tak šulerjow, kotřiž maja hišće wučbu. To drje so tež wulce njezměni, přetož za přichodne šulske lěto maja w zakładnej šuli hižo nětko 35 přizjewjenjow, tak zo wobě kubłanišći dale wjele městna trjebatej.