Minjeny tydźeń je Wěteńčan Walentin Bjedrich na sakskim krajnym hudźbnym wurisanju „Młodźina hudźi“ we Wojerecach z brawuru wobstał. Z wuběrnym hraćom na klawěrje wubědźi sej telko dypkow, zo je jeho přewšo kritiska a kompetentna jury na zwjazkowe wubědźowanje delegowała kotrež budźe w meji w Kasselu. Na to je Walentin wězo jara hordy a so wjeseli, zo móže tam znowa z kontrabasistom Leopoldom Ruckerom z Drježdźan swoje zamóžnosće dopokazać. Byrbjež młodostnaj w dueće hrałoj, so kóždy jednotliwje za swójski wukon hódnoći. „Wot Kassela wočakuju, zo runje tak derje wotrěznjemoj kaž loni w Hamburgu, hdźež smój na zwjazkowym wubědźowanju 2. městno docpěłoj“, Walentin praji. „Chcu z toho wuknyć a nadźijam so, zo so z wobdźělenja na wurisanju tež koncertowe wustupy a mišterske kursy wudadźa. Loni móžachmoj na mytowanskim koncerće na hrodźe Weesenstein hrać, a dóstach słuchanske hóstne městno pola prof. Zensiere“, 17lětny šuler Drježdźanskeho Krajneho hudźbneho gymnazija za hudźbu „Carl Maria von Weber“ hordźe powěda.
Chcemy so tu zaso wěnować swójbnym mjenam serbskich prócowarjow zańdźenosće, a to tym, kotrychž róčnicy narodnin abo posmjertnin lětsa wopominamy. To njech steji na prěnim městnje markantna wosobina serbskich stawiznow 19. lětstotka Jan Arnošt Smoler. 3. měrca bě tomu 200 lět, zo je so wón w mjeztym wotbagrowanej wsy Łućo narodźił. Smoler je wězo swójbne mjeno serbskeho pochada, a to po starym powołanju. Smolerjo běchu ludźo, kotřiž produkowachu smołu; němsce prajachu jim Pechbrenner abo Pechsieder. Dźensa tele powołanje wjace njeznajemy, dopomnjeće na nje pak je so nam zdźeržało w poměrnje rozšěrjenym swójbnym mjenje Smoler, w zněmčenej podobje jako Schmaler.
Nimo narodnin Jana Arnošta Smolerja wopominamy 11. apryla tež 75. posmjertniny jeho syna Marka Smolerja, kotrehož znajemy předewšěm jako dołholětneho redaktora Serbskich Nowin a nakładnika serbskeje literatury.
Bashar kopańcu jara lubuje. Wón je wulki přiwisnik Christiana Ronalda wot Reala Madrid. „Pochadźam ze Syriskeje. Sym 16 lět. Pochadźam z Adliba“, napisa mi wón spontanje do zapisowanskeho zešiwka. W kwartěrje za njepřewodźanych njepołnolětnych požadarjow azyla w Debrikecach mějachu wopyt z Wojerec. Dźesać šulerjow tamnišeho Lèona Foucaultoweho gymnazija angažuje so w projekće Dźěłaćerskeho dobroćelstwa (AWO) „7 mjez 25“, kotryž tudyšich šulerjow a młodych azyl pytacych hromadu wjedźe. A AWO Łužiska towaršnosć za hladanje a dohladowanje dom Budyskeho wokrjesa w Debrikecach wobhospodarja.
Nawodnistwo Instituta za sorabistiku Lipšćanskeje uniwersity, sobudźěłaćerjo a studenća měli zaso bóle ze sobu rěčeć. Tole bě jasne žadanje, kotrež wurosće ze zetkanja mjez zastupjerjemi Lipšćanskeho kubłanišća a serbskimi institucijemi we Łužicy minjenu wutoru w Lipsku. Po kotrym puću měło so to stać, maja sej wosebje studenća hišće wuwědomić. Damian Dyrlich rjekny: „Sym wjesoły, zo je so dźensniše zetkanje wotměło. By tež rjenje było, bychu-li studenća we wobłuku wuwučowanskich hodźin wjace składnosćow měli, z profesorom a docentami wo problemach rěčeć, kotrež w běhu studija nastawaja.“
Drježdźany (SN/MiR). Na 108. zakładnej šuli w Drježdźanach, na Hepkowej hasy w měšćanskim dźělu Strěžin, ma so wot šulskeho lěta 2016/2017 serbšćina po-dawać. Šula leži njedaloko Geisingskeje dróhi, na kotrejž je pěstowarnja, hdźež hižo wjacore lěta dźěći serbskorěčnje kubłaja. Hišće móža zajimowani starši wupjelnić formular na internetnej stronje towarstwa Stup dale a tak swój zajim potwjerdźić, zo měło so jich dźěćo na wučbje serbšćiny wobdźělić. Přizjewjenje po tymle puću je trěbne, zo bychu čłonojo towarstwa zwěsćili, kak wulka je potrjeba, wuknjacych w zakładnošulskej starobje serbskorěčnje wuwučować. Přizjewić maja so tuchwilu wosebje starši, čejichž dźěći su so w lětach 2006 do 2010 narodźili. Tole přeje sej Drježdźanski regionalny zarjad Sakskeje kubłanskeje agentury, zo by zwěsćił aktualnu potrjebu za planowanje kaž tež tu na dalše lěta. Hišće w měrcu wotměja so rozmołwy mjez zarjadom a zastupjerjemi towarstwa Stup dale, zo móhli nadrobnišo planować. Loni w decembru bě předsyda towarstwa dr.
Berlin (SN). Wubědźowanje DenkT@g namołwja młodostnych w starobje 17 do 22 lět, so přez rešerše, teksty, interviewy a dalše projekty z prašenjemi prawicarstwa, hidy na cuzych a njetolerancy rozestajeć. To zdźěla zapósłanča zwjazkoweho sejma Marja Michałkowa (CDU). Patron wubědźowanja je předsyda zwjazkoweho sejma prof. dr. Norbert Lammert. Přinoški hodźa so hač do kónca oktobra zapodać. Najlěpše chcedźa klětu w januaru w Berlinje wuznamjenić. Dalše informacije namakaja zajimcy na internetnej stronje www.denktag.de.
Konrada Adenauerowa załožba bě wubědźowanje DenkT@g w lěće 2001 składnostnje dnja wopominanja woporow nacionalsocializma 27. januara iniciěrowała. Wurisanje wotměwa so kóžde druhe lěto.
„Runje w aktualnej situaciji měli iniciatiwu wužiwać, zo bychmy přez hidu na cuzych motiwowanym njeskutkam znapřećiwili, so z nimi rozestajeli a tak starobje wotpowědnje za naš přichod přinošowali“, piše Marja Michałkowa.