„Wurjadny lětnik maturantow“, w tym běchu sej přitomni přezjedni, je swoje wuswědčenja zrałosće dóstał. Tež swjatočnosć sobotu na žurli Serbskeho gymnazija Budyšin bě wurjadna.

Budyšin (SN/at). Za swójbu so rozsudźić, maćeršćinu dale dać a přećelstwa ze šulskeho časa zachować – tele tři poručenja je swjedźenski rěčnik Danko Handrik lětušim maturantam Serbskeho gymnazija za nowy žiwjenski wotrězk sobu na puć dał. 36 dotalnych gymnaziastow bě sej jeho přeprosyło, zo bychu z jeho słowow nastorki za swójske wuwiće dóstali. Tajke zwurazni tež nawoda najwyšeho serbskeho kubłanišća René Wjacławk, dopominacy na ideale Jakuba Barta-Ćišinskeho. Wjacławk zmóžni zaćišć wo „wurjadnym lětniku“ a zhladowaše hromadźe z maturantami, jich staršimi a přiwuznymi na wjerški jich wosomlětneho přebywanja na gymnaziju, doniž swjatočnje zdrasćenych młodych ludźi njenamołwi: „Dźiće do swěta, dźiće, dokal so wam chce, rozhladujće so, rěčće we wšelakich rěčach.“

Slepo (AK/SN). „Wutrobu pytać“ rěka ­wustajeńca, kotraž je wot minjeneho ­tydźenja w Slepjanskej wyšej šuli „Dr. Marja Grólmusec“ widźeć. W njej pokazuja najwšelakorišu domjacu nadobu, kotraž so dźensa lědma wužiwa, kaž zuwak (škórnjow), truhak (při swinjorězanju) a tak mjenowany howjazy jazyk k zapřehnjenju kruwow. Přehladka je wuslědk projekta 23 šulerjow 9. lětnika. Cyły tydźeń zaběrachu so woni kónc meje­ w Slepjanskej wosadźe z domiznu a identitu­.

Budyšin (SN/MiR). Budyski Rěčny centrum WITAJ wuwiwa zhromadnje z Erfurtskej agenturu za młode medije „Kids interactive“ a wučerkami wyšich šulow serbskorěčny digitalny wučbny srědk „DIGITAL – krok po kroku“, přidatnje k wučbnicam maćeršćiny. Aktualny projekt spěchuje Załožba za serbski lud. Digitalny wučbny srědk měri so w prěnim rjedźe na šulerjow serbskich a dwurěčnych šulow. Woni zamóža z jeho pomocu swoje gramatiske a prawopisne kmanosće zwučować a skrućić. Cilowa skupina prěnjeje projektoweje fazy su šulerjo 5. a 6. lětnika. W přichodźe je předwidźane, zo so poskitk na wyše lětniki rozšěri.

Hórki (SN/MiR). Na lětuši dźěćacy swjedźeń Serbskeho šulskeho towarstwa je dźensa 180 hornjo- a delnjoserbskich dźěći pěstowarnjow Malešec, Němcow, Wotrowa, Ralbic, Chrósćic, Žylowa a Choćebuza, kiž su w nošerstwje SŠT, do Hórkow přichwatało. Cyłe dopołdnjo su sej dźěći Hórki a wokolinu wotkryli. Při tym zaběrachu so wone ze serbskimi powědkowymi postawami, z wódnym mužom, błudničkami a lutkami. Zarjadowanje přihotowałoj stej Marija Jaworkowa a Monika Süßowa. Jimaj poboku běchu někotre lětuše maturantki Budyskeho Serbskeho gymnazija, wukubłancy Budyskeje Serbskeje fachoweje šule za socialnu pedagogiku kaž tež šulerjo 7. lětnika Ralbičanskeje Serbskeje wyšeje šule. „Jako smy dóstali ze SŠT naprašowanje, hač móhli projekt podpěrować, je naš wučer Michał Wałda, kiž je zdobom čłon předsydstwa SŠT, namjetował, zapřijeć lětsa młódšich šulerjow“, rozłoži Ralbičanski wučer Pětr Bejmak. „Za nich bě to derje, před druhimi připosłucharjemi čitać, hač su to hewak w šuli zwučeni. Při tym zwěsćichu, kelko angažementa je trjeba, zo by tajki projekt wuspěšny był.“