Policija (10.07.17)
Hižo popołdnju wopity
Běła Woda. Chětro hłuboko do škleńcy hladał je sobotu muž w Běłej Wodźe. To pak jeho njewotdźerža z awtom jěć. Na parkowanišću před kupnicu Kaufland swědcy wobkedźbowachu, kak wón swoje wosobowe awto typa Mercedes chětro napadnje wodźi a zaparkuje. Jako šofer na to po parkowanišću chabłaše, zawołachu swědcy policiju. Wobsadka policajskeho awta muža hišće w bliskosći dosahny. Přewjedźeny test pola 40lětneho wunjese, zo měješe 2,24 promilow alkohola w kreji, a to krótko po 15 hodź. Na to přewodźachu jeho k wotebraću kreje. Jeho jězbnu dowolnosć kaž tež klučik awta sej zastojnicy hnydom wobchowachu.
„Cyrkej měła mosty twarić“
Pod hesłom „Wšo budźe lěpje“ wotměje so wot 21. do 23. julija w Róžeńće blisko cyrkwje lětuši Gig-festiwal. Nimo hudźby na wysokim niwowje su tež dźěłarnički z wuměłcami předwidźane.
Budyšin (SN/mwe). „Hudźba da duši rejwać. God is good! Rjanosć cyrkwje, wjeselo nad dobrym soundom. To je Gig-festiwal.“ Takle rěka mjez druhim w přeprošenju na zarjadowanje towarstwa Ostwind, na kotrež su nimo młodostnych z cyłeje Němskeje, Irskeje, Pólskeje, Čěskeje abo Awstriskeje tež serbscy młodźi wěriwi a dalši witani. Rady widźana je tam tohorunja starša generacija.
Syno nětko domchowane
Na Budyskim Židowje dźěłatej tuchwilu wulkej bagraj w Sprjewi. We ...
Wot póndźele za Sernjany hłosować
Štož je so před lětomaj w Pěskecach poradźiło, chcedźa nětko tež Sernjančenjo zwoprawdźić. Z pomocu iniciatiwy limonadoweje marki Fanta chcedźa woni wjesne hrajkanišćo ponowić.
Sernjany (SN/MWj). Hrajkanišćo na swjedźenskej łuce na kromje Sernjan skići zrudźacy napohlad. Drjewjane nastroje su wusmahnjene, suwadło je skóncowane, wobhrodźenje tež hižo kmane njeje a pěsk je mazany. Hdys a hdys tam młodych staršich z małymi dźěćimi wuhladaš, hač pak maja pjerachojo při hrajkanju a krosnowanju prawe wjeselo, je dwělomne. To ma so nětko změnić. Skupina młodych swójbow ze wsy chce wjesne hrajkanišćo ponowić a je so za hrajkanišćowu iniciatiwu limonadoweje marki Fanta přizjewiła.
Znowa tójšto inwestuja
Worklečanska gmejnska rada hospodarski plan 2017 schwaliła
Worklecy (SN/MWj). „Po tym zo smy našu sportownju ponowili, chcychmy lětsa poprawom trochu mjeńše całty pjec. A tola mamy zaso 17 naprawow, kotrež mamy hišće zwoprawdźić.“ Takle wopisa Worklečanski wjesnjanosta Franc Brusk (CDU) najwažniše inwesticije lětušeho hospodarskeho plana, kotryž su gmejnscy radźićeljo na swojim wčerawšim posedźenju wobzamknyli. Cyłkownym dochodam 1,9 milionow eurow steja wudawki něhdźe 2,1 miliona eurow napřećo. Deficit pochadźa z předpisanych wotpisanjow, kotrež dyrbja po zakonju za swoje komunalne twarjenja w etaće sobu zaplanować.
Krótkopowěsće (07.07.17)
Šula ma nowu nawodnicu
Worklecy. Sabina Hejdušcyna budźe wot šulskeho lěta 2017/2018 Serbsku zakładnu šulu „Michał Hórnik“ Worklecy nawjedować. To zdźěli wjesnjanosta Franc Brusk (CDU) wčera gmejnskim radźićelam we wobłuku jich posedźenja. Sabina Hejdušcyna bě zańdźene lěta na šuli wučerka z wosebitymi nadawkami a je nawodnicu zastupowała.
Zawru dalši dźěl dróhi
Pančicy-Kukow. Wot 12. hač do 22. julija budźe w Pančicach-Kukowje dalši wotrězk statneje dróhi S 100 zawrjeny. Kaž krajny zarjad za dróhotwar a wobchad informuje, jedna so wo wotrězk mjez tankownju a kupnicu Netto. Tam chcedźa hornju worštu asfalta wotškrabać, kromy jězdnje ponowić a ju znowa asfaltować. Přijězd ke kupnicy w tym času z Kamjenskeho směra móžny njebudźe.
Šćežka w krónach štomow
Policija (07.07.17)
Rentnarku wobšudźili
Wóspork. Na wjacorych městnach w Hornjej Łužicy su tele dny njeznaći staršich ludźi zazwonili a ze wšelakimi stawizničkami spytali, jim pjenjezy wulišćić. Mjeztym zo to w Zhorjelcu, Drječinje (Dretschen) w gmejnje Dobruša-Huska a we Wojerecach fungowało njeje, běchu njeznaći we Wósporku bohužel wuspěšni. Tam bě so pola 67lětneje wobydlerki žona přizjewiła a so jako statna rěčnica wudała. Wona napowěda, zo ma rentnarka 1 000 eurow dołha, dokelž bě so na wupisanju mytow wobdźěliła. Jenož hdyž pjenjezy hnydom zapłaći, móhła so wobskóržbje wuwinyć. Wustróžana Wósporčanka sumu z konta wotzběhny a pósła je z listom na adresu w Turkowskej. Hakle nazajtra wona spózna, zo bě to zmylk, a informowaše policiju.
W lěsu kedźbować
Budyšin. Po sylnym njewjedrje 22. junija tež mnozy priwatni wobsedźerjo lěsow na swojich ležownosćach škody zwěsćeja resp. spytaja je wotstronić. Tole pak móhło strašne być a žada sej wosebite wukubłanje. W zašłosći je při tajkich dźěłach časćišo k njezbožam dóšło, kotrež mějachu zdźěla tragiski wukónc. Zwjetša je jeno z ćežkej techniku móžno škody wotstronić. Tohodla delni lěsniski zarjad Budyskeho krajnoradneho zarjada wšitkim wobsedźerjam lěsa poruča so w lěsniskich rewěrach abo na krajnoradnym zarjedźe wobhonić, kak móža škody w lěsu bjez stracha wotstronić. Najlěpje je, hdyž tajke dźěła fachowym firmam přewostajimy. Wone nimaja jenož wukubłanych sobudźěłaćerjow, ale tež wotpowědnu specielnu techniku.
Planuje putnisku jězbu
Smjerdźaca. Přichodnu putnisku jězbu z busom do Medźugorja w Bosniskej-Hercegowinje planuje Smjerdźečan Gerat Róbl wot 30. septembra do 7. oktobra 2017. We wobłuku jězby je tohorunja dnjowy wulět do Dubrovnika předwidźany. Přizjewjenja, kotrež přijimuje Gerat Róbl pod telefonowym čisłom 035796/ 96 540, su hišće móžne.
Hudźa na torhošću
Na deskowany wóz wosebje hordaj
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
We Łomsku pola Njeswačidła napadnje rjenje hladany štyristronski Panachec statok. 1929 bě so tam Měrćin Panach narodźił. Doma zeznajomi so na 28 hektarow wulkim kuble hižo jako dźěćo z ćežkim ratarskim dźěłom. Tehdy Łomšćenjo tež hišće přewažnje serbowachu. W Njeswačanskej šuli to dowolene njebě. 62lětny syn Manfred je wot njeho lubosć k ratarjenju zdźědźił, byrnjež spočatnje powołanje blidarja nawuknył. Runja nanej wobhladuje wón jako winowatosć, pozdźišim generacijam zachować, kak běchu ratarjo něhdy pola wobdźěłali a skót zastarali, ale tež, kotre nałožki běchu pěstowali.
