Policija (05.05.17)
Z trikom pjenjezy kradnyłoj
Běła Woda. Wjacore sta eurow staj zawčerawšim njeznataj muž a žona 87lětnej w Běłej Wodźe z móšnje pokradnyłoj. Wonaj běštaj rentnarku prosyłoj jimaj pjenjezy zaměnić. W njekedźbliwym wokomiku sahny jedyn z njeju do móšnje staruški a wza z njeje pjenjezy.
Z keramiku dźěłać
Wulka Dubrawa. Spěchowanski kruh za serbsku ludowu kulturu je keramisku dźěłarničku přihotował. Krótkodobni zajimcy zetkaja so jutře, 6. meje, w 9.30 hodź. w něhdyšej Margarećinej hěće we Wulkej Dubrawje. Nawod změje Jadwiga Lešawic, tema su serbske baje. Kóždy zapłaći swójski přetrjebany material a přinjese sej něšto k jědźi sobu.
Swjeća na šulskim dworje
Worklecy. Zakładna a wyša šula „Michał Hórnik“ Worklecy přeprošatej tež lětsa zaso wšitkich wobydlerjow a hosći na swój tradicionalny dworowy swjedźeń. Wón wotměje so pjatk, 12. meje. Po zwučenym wašnju zahaja jón w 17.30 hodź. z mejemjetanjom. Holcy chcedźa zaso w serbskej narodnej drasće wokoło mejki rejwać. Slědujetej bjesada a zabawa, na kotrejž poruča jednotliwe rjadownje zaso najwšelakoriše kulinariske chłóšćenki a so na wopyt wjesela.
Žohnuja motorske
Ralbicy. Popołdnjo z požohnowanjom motorskich zahaji so njedźelu, 7. meje, w 14 hodź. z nyšporom w Ralbičanskej cyrkwi. Přizamknje so zhromadny wulět.
Rostliny sej wuměnjeć
Přemysłownišćo so wuwiwa
Na ležownosći Megalith chcedźa wotpadki biologisce předźěłać
Njebjelčicy (JK/SN). Na minjenym posedźenju Njebjelčanskeje gmejnskeje rady bě jednaćel předewzaća Missale Justus Große na próstwu wjesnjanosty Tomaša Čornaka (CDU) rozłožił, kak chce tamniše přemysłownišćo dale wužiwać. Za stopnjowanje efektiwity składowanja a překładowanja wotpadkow ma předewzaće Missale hižo přizwolenje krajnoradneho zarjada Budyšin a gmejny Njebjelčicy. Zo njebychu so wotpadki w padźe wobškodźenja wulkich paketow zwonka zawoda brojili, chce předewzaće po dołhosći nimale 300 metrow dwaj metraj wysoku murju twarić. Tomaš Čornak skedźbni jednaćela Großu na to, zo móhli murju z wijatymi rostlinami zarosć dać. Jednaćel tajki nastork rady přiwza a přilubi so wo to postarać, zo budźe so projekt derje do wokoliny hodźeć. Murju stajić chcedźa w přichodnymaj měsacomaj. Material za nju hižo maja.
Šulu ponowić so dliji a budźe dróše
Budyska Fichtowa zakładna šula budźe hakle nazymu hotowa. Přidatne nadawki nastupajo wohnjoškit a pomnikoškit wuskutkuja, zo so projekt dliji.
Budyšin (CK/SN). Dlěje hač předwidźane traje ponowjenje Budyskeje Fichtoweje zakładneje šule. A projekt budźe nimo toho dróši. Přičina su wohnjoškitne techniske předpisy, zdźěla Falko Wendler. Kaž nawoda měšćanskeho twarskeho zarjada rozłožuje, drje běchu sej za zhotowjenje wohnjoškitneho koncepta kubłanišćo wobhladali. Zo pak njebychu wučbu mylili, njejsu twarsku substancu bliže přepytowali. Nětko je so wukopało, zo dyrbja sćěny a wjerchi zesylnić, zo móhli wohnjoškitne durje zatwarić. Tole płaći přidatnje něhdźe 70 000 eurow.
Wo zwjazku rozsudźa pozdźišo
Wulka Dubrawa (CS/SN). Jednotliwe nadawki za přetwar jědźernje a wjacezaměroweje rumnosće Zakładneje a Swobodneje srjedźneje šule we Wulkej Dubrawje je tamniša gmejnska rada na swojim zańdźenym posedźenju rozdała. Suchotwar přewozmje zawod z Wulkeho Wosyka, nutřkowne a wonkowne durje kaž tež wokna wuměni firma z Klukša a sanitarne připrawy ponowi rjemjeslnik z Wulkeje Dubrawy.
Byrnjež radźićeljo na samsnym posedźenju wo zjawnoprawniskim zrěčenju k wutworjenju gmejnskeho zwjazka Wulka Dubrawa/Malešecy/Radwor rozsudźić chcyli, su tónle dypk dnjoweho porjada šmórnyli. Kaž na posedźenju rěkaše, chcedźa najprjedy regionalnu konferencu a jeje wuslědki wočaknyć, prjedy hač so z temu dale zaběraja.
Wot 1. meje je w muzeju Margarećineje hěty widźeć wosebita wustajeńca składnostnje 160. róčnicy spožčenja tohole mjena. 18. junija změja tam podijowu diskusiju ze sakskej ministerku za runostajenje a integraciju Petru Köpping (SPD). Mjez druhim póńdźe wo to, kak běchu po politiskim přewróće Margarećinu hětu wotwiwali.
Meju dale swěrnje stražuja
Krótkopowěsće (04.05.17)
Wjace pjenjez do šulow
Drježdźany. Sakske šule dóstanu w šulskim lěće 2017/2018 něhdźe 26 milionow eurow za cyłodnjowske poskitki. To přesahuje poskitk w aktualnym šulskim lěće wo wjace hač tři miliony. Něhdźe 304 000 šulerjow a tak 6 000 wjace změje z toho wužitk. W přichodnych tydźenjach dóstanje 1 278 šulow informaciju wo spěchowanju.
Heinz Keßler zemrěł
Berlin. Něhdyši zakitowanski minister NDR Heinz Keßler je njeboh. Armejowy general je zawčerawšim, wutoru, 97lětny w Berlinje zemrěł, kaž tamniše medije rozprawjeja. Keßler steješe wot lěta 1985 hač k wotstupej 1989 na čole zakitowanskeho ministerstwa. Zdobom bě wón čłon politběrowa SED. Berlinsku murju a socializm je hač do kónca zakitował.
Łužiske hory zwičnić
Nový Bor. Zwjazk gmejnow w čěskich Łužiskich horach je předstajił plany, kak kónčinu turistisce zwičnić. Dotal skerje pozabyty region ma wulki přirodny kaž tež kulturny potencial. Marketingowe pomjenowanje „Łužiske hory“ ma při tym centralne městno měć. Projekt wopřijima tež sobudźěło z organizacijemi w němskich Žitawskich horinach.
Higuain dwójce trjechił
Policija (04.05.17)
Kabl kradnyć chcył
Budyšin. Na twarnišću noweho železniskeho mosta na Budyskej Zeppelinowej je policija muža nachwilnje zajała. 33lětny chcyše tam koporowy kabl kradnyć. Kaž Zhorjelska policajska direkcija zdźěli, bě swědk podhladneho skućićela wobkedźbował a na to zastojnikow informował.
Na nalětni swjedźeń běchu zawčerawšim do Čornochołmčanskeho ...
Potrjeba za ludźimi dale wulka
Nimo bjezdźěłnych, kotřiž za dźěłowym městnom pytaja, registruje statistika na přikład tež tych, kiž chcedźa powołansce hinaši puć kročić. Tole rozłožichu dźensa w Budyskej agenturje za dźěło.
Budyšin (CK/SN). Sobudźěłaćerjo Budyskeje agentury za dźěło móža tuchwilu 4 364 swobodnych dźěłowych městnow w regionje sposrědkować. Najwjetši dźěl z nich su połne dźěłowe městna. Naprašowanje za fachowymi mocami w Hornjej Łužicy je dale wulke. W aprylu drje pochadźeše z 1 352 poskitkami najwjetši dźěl z wobłuka dźěła na čas, ale tež w druhich wobłukach sobudźěłaćerjow pytaja. Jeničce w předźěłacym přemysle bě 754 swobodnych městnow, tójšto wjace hač do toho. W strowotnistwje a socialnistwje ma so 410 městnow wobsadźić, w twarstwje 297.
