Dwacety „kotoł pisaneho“ dožiwli
Wjele hosći je kónc tydźenja třidnjowski wjesny swjedźeń w Koćinje dožiwiło. Marja Latowa, kotraž mjeztym 17 lět tamniši wjesny klub ze 27 čłonami nawjeduje, bě so znowa wo wotměnjawy program – mjeztym třeći raz při kapałce wosrjedź wsy – postarała.
Koćina (aha/SN). Nimo 20. raz pospochi do swjedźenja zapřijateho „kotoła pisaneho“ zabrachu sportowe wubědźowanje wažne městno. Pjatk wječor k zazběhej swjedźenja kehelowachu dźěći w dwěmaj skupinomaj. Najlěpšej běštaj pola młódšich Adrijan Meyer z Koćiny, pola wjetšich Jan Szczepaniak. Mjez žonami spowala najwjace kehelow Betina Pjetašowa, kotraž bě z Bayerskeje ze swójbu domoj na swjedźeń přijěła. Mjez mužemi bě Pětr Reinelt najwuspěšniši.
Sobotu wubědźowaše so pjeć mustwow dźěći w kopańcy, hdźež wobsadźichu Němcy, před Kulowom a Koćinu prěnje městno. Mjez sydom cyłkami młodostnych je prěni króć tež zastupnistwo z Jitka za bulom honiło. Před Sulšečanami dobychu koparjo z Koćiny. We volleyballu wopokazachu so žony z Koćiny jako najlěpše.
Pisany program přez cyłe dny
Młodźi a stari w Serbskich Pazlicach swjećili
Serbske Pazlicy (bl/SN). Znowa witaše Serbskopazličanska młodźina wjesnjanow a syły dalšich hejsowarjow na lětuši wjesny swjedźeń. Pjatk nawječor zdypkom w šesćich bě tak daloko, a na wjesnym sportnišću natočichu piwo. Prěni wjeršk bě kóždolětne wubědźowanje muži praweje a lěweje strony hłowneje dróhi. Mužojo dyrbjachu swoju wušiknosć a preciznosć dopokazać. Mjez druhim třělachu z kłokom a prokom na pyramidu nopaškow. Kotry z wjesneju bokow je nětko najsylniši, pak njemóžachu zwěsćić, dokelž rěkaše na kóncu wubědźowanja: njerozsudne. Chrystof Mikławšk přewodźeše na swojim akordeonje spěwajo dźěći po wsy. Z latarnčkami wobswětlichu wone wjes.
Krótkopowěsće (31.07.17)
Ministerku sej přeprosyli
Budyšin. Rada za serbske naležnosće Sakskeje je sej na přichodne posedźenje kónc awgusta saksku kultusowu ministerku Brunhild Kurth (CDU) přeprosyła. Hłowna přičinu su informacije wo planowanym přerjadowanju a samo zawrjenju kubłanskich agenturow, kaž předsydka rady Marja Michałkowa informuje. Wot ministerki lubja sej wujasnjenje.
K čłowjeskosći namołwjał
Žitawa. Pod hesłom „Cyle hinaši“ su wčera w Žitawje wustajeńcu wo reformaciji w Hornjej Łužicy wotewrěli. Hladajo na tolerantne mjezsobne wobchadźenje nabožinow w kónčinje je sakski ministerski prezident Stanisław Tilich (CDU) na ekumeniskej Božej słužbje w Janskej cyrkwi k čłowjeskosći namołwjał a k tomu, „druheho tajkeho přiwzać, kaž je“.
Policajska straža pomórana
Policija (31.07.17)
Šofer zatłusnjeny był
Čorny Chołmc. Na Skalnym puću w Čornym Chołmcu je wčera wječor šofer do štoma zrazył. Dokelž bě z dotal njeznateje přičiny kontrolu nad wodźidłom zhubił, zjědźe wón z jězdnje a so při zražce w awće zatłusny. Čornochołmčanscy a Wojerowscy wobornicy jeho ćežko zranjeneho wuswobodźichu.
Kólnja so wotpaliła
Mortkow. Sobotu dopołdnja je so w Mortkowje z dotal njeznateje přičiny kólnja na njewobydlenej ležownosći wotpaliła. Wěcna škoda wučinja něhdźe 5 000 eurow. Kriminalna policija přičiny wohenja přepytuje.
Nowej informaciskej tafli
při twarnišću
Z karu twory do wobchoda wozy
Nowy móst nad Klóšterskej wodu a wutwar statneje dróhi S 100 w Pančicach-Kukowje stej tuchwilu z wotstawkom najwjetše nadróžne twarnišćo w dwurěčnych gmejnach. Z tejle seriju twarnišćo přewodźamy a wobswětlamy starosće tamnišich wobydlerjow.
Čiłe partnerstwo
Łužiski „Paproć“ do Čěskeje
Njebjelčicy a Heřmanice skrućeja partnerstwo z pomocu wuměłstwa
Njebjelčicy/Heřmanice (SN/MiR). Partnerstwo mjez łužiskimi Njebjelčicami a čěskimi Heřmanicami chcedźa 18. awgusta z njewšědnej akciju skrućić. Na transporteru změje Njebjelčanski wjesnjanosta Tomaš Čornak (CDU) dalšich wjesnjanow, wuměłca Thomasa Birku a jeho twórbu. Z wulkeho kamjenja z łužiskeho zornowca je Drježdźanjan rostlinu wudypał. Jeho twórba rěka „Paproć“ a ma přichodnje na Heřmaničanskim torhošću stać.
Thomas Birke bě swoje wuměłske dźěło před lětomaj w Miłočanskej skale Při Krabatowym kamjenju zhotowił. Hižo tehdy bě Heřmaničanski wjesnjanosta Vladimír Stříbrný twórbu wobdźiwał. A nětko je jasne, zo paproć z kamjenja do Heřmanic dowjezu. Wšako tež w čěskej partnerskej gmejnje hižo 15 lět rězbarja. Kaž w Njebjelčicach dźěłaja tam regionalni wuměłcy předewšěm na twórbach z drjewa, byrnjež Heřmanice tohorunja zornowcowe składźišća měli.
Woprawdźita delikatesa z lěsa
Škodam wulkeje wody dla zaměrnje zadźěwać
Gmejna a ratarski zawod stej zhromadnje na dobro wobydlerjow škitne naprawy zwoprawdźiłoj.
Róžant (SN/JK). Sylne zliwki loni kaž tež lětsa zaso wjedźechu na ležownosćach w delnim dźělu Róžanta stajnje znowa k škodam wulkeje wody dla. Přičina bě, zo njemóžeše woda spadkow w hrjebi do směra na Smjerdźacu a Łazk spěšnje dosć wotběžeć a tak dźěle ležownosćow zapławi abo kanalizaciju zatyka. Wina na tym běchu roły pod mostom, kotryž wužiwaja tež sobudźěłaćerjo Róžeńčanskeho ratarskeho zawoda Sorabia, zo móhli na pola jěć. Roły pod mostom běchu přemałe a zdźěla zatykane, tak zo njemóžeše wulke mnóstwo wody pod mostom přeběžeć a susodne ležownosće zapławi.
