Krótkopowěsće (04.08.17)
Po 15 lětach kónc
Nowa Niwa. Wot septembra změja w Nowoniwjanskej pěstowarni „Błótowske wrobliki“ jenož hišće jednu hodźinu serbšćiny wob tydźeń. Po 15 lětach je tuž kónc z cyłodnjowskim kubłanjom po modelu Witaj, rozprawjatej Serbski a Delnjoserbski rozhłós. Jako přičinu mjenuje nošer, zarjad Luboraz-Hornje Błóta přemało přizjewjenjow jeničce šěsć dźěći.
Hotel předaty
Budyšin. Best Western w Budyšinje ma noweho wobsedźerja. Kaž wjednistwo hotela zdźěla, je Podstupimska towaršnosć Obotritia Hotel minjenu wutoru dom přewzała a chce jón profesionalnje dale wjesć. Wot lěta 1991 běše Berlinska HGG oHG štyrihwězdowy dom ze 157 stwami, kotryž bě za čas NDR jako hotel Lubin znaty, wuspěšnje wobhospodarjała.
Policist muža zatřělił
Zhorjelc. Policist je wčera w Eckartsbergu w gmejnje Mittelherwigsdorf 23lětneho muža zatřělił. Tole zdźěla Zhorjelska policajska direkcija. Do toho běchu zastojnikow wołali, dokelž bě 23lětny pječa swoju 47lětnu mać nadběhował. Kriminalna policija pad přepytuje, předewšěm wobstejnosć, kotrejež dla je k zasadźenju brónje dóšło.
Policija (04.08.17)
Bjerjer zastajencow w jastwje
Zhorjelc. Wutoru wječor je 32lětny we Wuskidźi najprjedy dwě dźěsći a po tym jeju 27lětnu mać jako zastajencow wzał. SEK muža přemó a jeho nachwilnje zaja (SN rozprawjachu). Přepytowanski sudnik Zhorjelskeho hamtskeho sudnistwa je wčera rano přećiwo wobskorženemu na próstwu Zhorjelskeho statneho rěčnistwa zajeće branja zastajencow a wotpohladneho zranjenja ćěła dla přikazał. Skućićelej hrozy pjeć do 15 lět jastwa.
Wobornicy kóčku wuchowali
Biskopicy. Dźensa dopołdnja je wobydler na Lessingowej w Biskopicach měšćansku wohnjowu woboru wo pomoc prosył. Dokelž sedźeše kóčka hižo hodźiny dołho na chětro nahłej třěše a muž njemóžeše ju tež z ani jeničkej hrajku dele zwabić, njewědźeše sej wón žaneje rady a woleše hawarijowe čisło wobory. Na kóncu wšak móžeštaj wobsedźer kóčki a jeho žona swojeho lubuška cyle zbožownaj zaso do ruki wzać.
Nachribjetnik a wačok fuk
SKI budźe měsac zawrjena
Budyšin (SN). Kupcy měli so na to nastajić, zo wostanje Budyska Serbska kulturna informacija wot 30. awgusta do 22. septembra zawrjena. Před wjace hač dźesać lětami běchu rumnosće posledni króć ponowili. Tež techniskich přičin dla je tuž načasu SKI modernizować.
Dalše wjelče šćenjata
Rěčicy (SN). Kónc julija Rěčičanski wjelči běrow wozjewi, zo su w dźewjeć dalšich sakskich wjelčich kónčinach „reprodukcije dopokazali“. Tak móžachu mjez druhim we łužiskej jězorinje, pola Niskeje a blisko Róžanta šćenjata fotografować.
Nowa software we VVO
Budyšin (SN). Kupcowski serwis wobchadneho zwjazka Hornje Łobjo (VVO) wužiwa hižo poł lěta nowy program, zo by naprašowanja, pokiwy, kritiki a pady garantije pasažěram lěpje wobdźěłać móhł. Po přewšo dobrych nazhonjenjach planuje VVO zhromadnje ze 14 předewzaćemi zwjazka, program dale rozšěrić.
Wopička so narodźiła
Ma wobšěrnu zběrku lampow
Kaž w dowolowym času z wašnjom, tež lětsa na tymle městnje stajnje wutoru a štwórtk wosebitu seriju wozjewjamy. W njej předstajamy wosobiny, kotrež na někajkežkuli wašnje stawizny zachowuja, zo starožitnosće zběraja a je zdźěla zjawnosći spřistupnjeja.
Zboka puća Při Zmijowej horje w Běłym Chołmcu napadnje ći statok z jara rjenje zapołoženej a hladanej zahrodu. Nimo toho je tam bydlacy 74lětny Siegfried Bleža w swojej dwójnej garaži zarjadował wustajeńcu z njeličomnymi eksponatami, kotrež njepokazuja jenož na wuwiće žehlawkow, kaž je dźensa wužiwamy. Wobšěrna zběrka wopřijima tež wobswětlenje a wulku paletu přewšo zajimaweje techniki, kotraž zaruča wěstotu na dróze, na železniskich kolijach kaž tež na wodźe a w brunicowych jamach.
Budyski Kamjentny dom přeproša kóždu srjedu w awgusće na lětnje ...
Zapósłancaj na lětnjej turje
Worklecy/Kozarcy/Wěteńca (aha/SN). Wot lěta 2009 podawataj so zapósłancaj Sakskeho krajneho sejma Alojs Mikławšk a Marko Šiman (wobaj CDU) z kolesom po swojimaj wólbnymaj wokrjesomaj 52 a 53. Wčera po Božej mši w Radworju nastajištaj so wonaj k někotrym předewzaćelam Wulkodubrawskeje gmejny a po tym na swojej něhdźe 60 kilometrow dołhej turje do Worklec, hdźež witaše jeju kaž tež kandidata za nowy zwjazkowy sejm Rolanda Ermera a wjesnjanostu Franca Bruska (wobaj CDU) pjekarski mišter Michael Šlapa.
Prěnjotny zaměr bě, zhonić wo starosćach a wuwićowych tendencach rjemjeslniskich zawodow a pytać móžnosće, kak hodźa so problemy ručišo rozrisać. Michael Šlapa předstaji swoju pjekarnju, kotruž wot lěta 1996 wjedźe, a móže na dobru bilancu zhladować. Tuchwilu ma z mandźelskej wosom přistajenych. Mjeztym wudźeržuje tež filialu w Kamjencu. Wšědnje pjeku we Worklecach něhdźe 1 500 całtow, sobotu štyri razy telko. Lětny wobrot wučinja něhdźe 400 000 eurow. Šlapa skedźbni na wulku běrokratiju nastupajo zličbowanje. Roland Ermer, sam pjekar w Njedźichowje, hódnoćeše, zo ma pjekarnja na wsy přichod.
Město kupjele kulturne srjedźišćo
Zhromadne dźěło pohłubšić
Choćebuz (SN/at). Město Choćebuz chce zhromadne dźěło z wjelelětnym pólskim partnerskim městom Zielonej Góru pohłubšić. Na to wusměrja so němsko-pólski projekt, za kotryž stej wobě komunje hižo spočatk julija spěchowanske zrěčenje podpisałoj. We wobłuku předewzaća chcetej pódla centruma za němsko-pólske zetkawanja w Zielonej Górje-Przylepu nowe zarjadnišćo wutworić, hdźež ma so mjezy překročace zhromadne dźěło koordinować. W delnjołužiskej metropoli nastanje kontaktnišćo, kaž z nowinskeje informacije města wuchadźa.
Centrum budźe zhromadne dźěło wobeju městow kaž tež dohromady 56 partnersce skutkowacych organizacijow a zarjadnišćow we wobłukach kubłanje, kultura, sport, ludźo ze zbrašenjom kaž tež seniorojo mjezsobnje wothłosować.
Nimo městow je tež Aeroklub Lubuskeho kraja projektowy partner. Kaž město Choćebuz dale zdźěli, budźe projekt po 85 procentach ze srědkow programa Interreg 5a Braniborska–Pólska spěchowany, to je nimale 586 000 eurow.
Krótkopowěsće (03.08.17)
Spěchowanje rěče wobzamkli
Podstupim. Braniborska chce delnjoněmsku rěč w kraju lěpje spěchować. To je krajne knježerstwo wobzamkło a partnerow kaž tež směrnicy postajiło. Zdobom přewostaja kraj towarstwu za delnjoněmčinu lětnje 50 000 eurow podpěry. W Braniborskej maja towarstwa za pěstowanje delnjoněmčiny mjezdruhim w regionach Prignitz, Fläming a Uckermark.
Běrow AfD pomórany
Wojerecy. Njeznaći su regionalny běrow strony AfD při naměsće před Wojerowskim dwórnišćom pomórali. Wo tym informuje strona sama w nowinskej zdźělence. Kaž policija zdźěli, dóstachu zastojnicy informaciju, zo běchu njeznaći běrow ze zelenej lakowej barbu namórali a škodu něhdźe tysac eurow načinili. AfD skućićelow namołwja so radšo z argumentami ze stronu rozestajeć.
Zakituja dźěło policije
Policija (03.08.17)
Z třomi promilemi za wodźidłom
Kamjenc. Zastojnicy Kamjenskeho policajskeho rewěra su so wutoru wječor njemało dźiwali, kontrolujo 42lětneho šofera BMWja na Christiana Weißmantelowej. Měrjenski nastroj jim pokazowaše, zo ma muž tři promile alkohola w kreji. Při tym bě samo hišće awto wodźił. To pak nětko dlěši čas wjac njebudźe, dokelž jemu zastojnicy nablaku jězbnu dowolnosć sćazachu. Nimo toho leži pad jako njeskutk na blidźe Zhorjelskeho statneho rěčnistwa.
79lětna do Opela zajěła
Nowe Město. Na Sprjejčanskim puću w Nowym Měsće je wutoru připołdnju 79lětna ze swojim Huyndaijom do parkowaceho Opela zajěła. Při tym so njekedźbliwa šoferka lochko zrani. Wěcna škoda wučinja něhdźe 7 000 eurow.
Sydom zranjenych při njezbožach
Zhorjelc. We wobłuku Zhorjelskeje policajskeje direkcije, kotrejž nimo wobłuka awtodróhi A 4 šěsć policajskich rewěrow přisłuša, registrowachu wčera 59 wobchadnych njezbožow. Sydom wosobow je so zraniło.
