Přepytowanja zastajene
Rakecy/Zhorjelc (SN/JaW). Policija je přepytowanja nastupajo móranja na wjesnych taflach w Rakecach zastajiła. Wo tym informowaše wčera nawječor nowinski rěčnik Zhorjelskeje policajskeje direkcije Thomas Knaup redakciju SN.
„Móranja na wjesnych taflach pola Rakec njeje nichtó jako njeskutk policiji přizjewił“, zdźěli Knaup na naprašowanje. Rakečanski wobydlerski policist je slědźił a po naprašowanju w gmejnskim zarjedźe zhonił, zo buchu wjacore tafle pomórane a polěpjene. Dokładnu ličbu pak tež gmejna mjenować njemóžeše. „Mjeztym su njeznaći nalěpki a móranja zaso wotstronili, bjez toho zo bychu škodu zawostajili. Při kontroli taflow njezwěsći policist hižo žanežkuli nalěpki a tež žanežkuli wobškodźenje na nich“, nowinski rěčnik wuswětli.
„Po tuchwilnych dopóznaćach tuž žane chłostajomne jednanje njepředleži. Přiwšěm móže polěpjenje wjesnych taflow přestupjenje porjada być, kotrež ma přisłušna gmejna přepytować“, rjekny Thomas Knaup našemu wječornikej.
Krótkopowěsće (19.07.17)
Basnje Chěžki běłorusce wušli
Minsk. Šěsć basnjow Jurja Chěžki je Mikola Mjetlickij znowa do běłorušćiny přenjesł. Mjez druhim su to Dundakowa pěseń“, „Zelene zet“ a „Kak lochko so to spi“. Basnje su přełožki z originala. Pomoc a interlinearne přełožki poda Kajrat Bakbergenow. Wozjewjene su basnje w časopisu za literaturu a publicistiku „Sozwučije“ (Harmonija) w Minsku.
Wólbne namjety zapodali
Budyšin. Za wólby 19. němskeho zwjazkoweho sejma 24. septembra 2017 předleža we wólbnym wokrjesu 156 – Budyšin I – namjety wosom stron a jednoho jednotliwca. Wo přizwolenju tychle namjetow rozsudźi wokrjesny wólbny wuběrk na zjawnym posedźenju pjatk, 28. julija, w 11 hodź. w Budyskim krajnoradnym zarjedźe, Dwórnišćowa 9, stwa 210.
Wjace pjenjez muzejam
Policija (19.07.17)
Zahrodkowa lawba so paliła
Běły Chołmc. W Běłym Chołmcu paleše so wčera rano na ležownosći při Wjesnej dróze zahrodkowa lawba. Płomjenja běchu tež na pódlanskej šćěpowc a rostlinarnju přeskočili. Wohnjowi wobornicy z Běłeho Chołmca, Łaza, Bjedrichec, Šćeńcy a Wulkich Ždźar hromadźe z Wojerowskej powołanskej woboru móžachu tomu zadźěwać, zo woheń tež domske 56lětneho wobsedźerja wobškodźi. Wěcna škoda wučinja přiwšěm něhdźe 15 000 eurow. Čehodla bě so paliło, dotal jasne njeje.
Do firmy so zadobyli
Kubšicy. W Kubšicach běchu so njeznaći minjene dny do firmy na Starej Lubijskej dróze zadobyli. Z kasy pokradnychu pjenjezy. Mějićel firmy rjekny, zo wučinja wěcna škoda něhdźe 6 000 eurow.
Pjeć zranjenych
Zhorjelc. We wobłuku Zhorjelskeje policajskeje direkcije registrowachu wčera 37 wobchadnych njezbožow. Pjeć wosobow je so zraniło.
Jazzowa legenda w sotrowni
Mały Wjelkow (CS/SN). Kulturny organizator Mike Salomon bě tež lětsa zaso za kulturne lěćo w Małowjelkowskej sotrowni wobšěrny a wotměnjawy program zestajał. Minjenu sobotu je w přepjelnjenym twarjenju před wjace hač 100 přihladowarjemi jazzowa legenda Pascal von Wroblewsky swój program předstajiła. W dwuhodźinskim koncerće hódnoćeše wona ze swojimi improwizacijemi wosebje Johanna Sebastiana Bacha. Publikum bě wulce zahorjeny a wužada sej tež wot hudźbnikow Michija Winklera a Reimera Hentschki přidawk.
Nowa mjećawa po puću
Budyšin (SN). Někotre dny mjeztym wukonja mała nowa mjećawa CityCat 2020 XL w Budyšinje swoju słužbu. Nastroj njeje jenož optisce něšto za wóčko, mašina je tež enormne dźěłowe wolóženje. Wšako rjedźa z modernej mašinu měšćanske chódniki a kolesowarske šćežki kaž tež zjawne městnosće. Wuhotowana je CityCat z wjacorymi chošćemi a 300literskim tankom wody.
Zubny lěkar pisa dwě chronice
W swojej lětušej dowolowej seriji předstajamy wosoby, kotrež na někajkežkuli wašnje stawizny zachowuja, zo starožitnosće abo stawizniske zajimawosće zběraja a je zjawnosći spřistupnjeja.
Na zetkanjach chronikarjow, kotrež Domowinska župa „Michał Hórnik“ kóždolětnje organizuje, wobdźěla so nimale stajnje Worklečan dr. Beno Wałda. Jeho namjety a pokiwy su tam přitomnym dobry pućnik za wunošne zběranje a dokumentowanje časowych podawkow.
Znowa serbske napisy přemórane
Tójšto ludźi je wčera nawječor na Radworske sportnišćo ...
Zwón ma dale zwonić
Hač do nazymy zatwarja w Konječanskej kapałce elektrisku připrawu
Konjecy (aha/SN). Na wčerawšej wobydlerskej zhromadźiznje, na kotruž bě wjesna rada Šunow-Konjecy do Konječanskeho towarstwoweho domu „Delany“ přeprosyła, wobdźěli so wjac hač štyrceći ludźi. Tale ličba swědči wo wulkim zajimje a wo zhromadnej zamołwitosći, zo by zwón Konječanskeje starodawneje kapałki přichodnje dale zwonił.
Mjeztym 88lětna Hańža Rachelowa bě so wot lěta 1950 swěru wo to starała, zo zwón trójce wob dźeń – rano w šesćich, připołdnju w dwanaćich a wječor w šesćich – zwonješe. Starobnych a strowotnych přičin dla wšak to hižo njemóže.
Hižo loni w nowembru je wjesna rada wo tym rozmyslowała nańć móžnosć, zo by zwón tež dale wobydlerjow ze wšědnosće dnja k pomodlenju pozbudźał. Tak wobhoni so móžneho zatwara elektriskeje připrawy za zwonjenje dla; a gmejna Ralbicy-Róžant, kotrejž kapałka słuša, staji próstwu wo spěchowanske srědki.
Krótkopowěsće (18.07.17)
Na wjelčicu třělane było
Rěčicy/Berlin. Wjelčica, kotraž bu spočatk julija na B 156 mjez Blunjom a Zabrodom přejědźena, je na sćěhi njezboža zahinyła. To je Leibnizowy institut za coologiske a dźiwinowe slědźenje w Berlinje zwěsćił. Zdobom namakachu w ćěle zwěrjeća šrótowe kulki, štož rěči za to, zo bu na nje třělane. Wot spočatka lěta su w swobodnym staće hižo šěsć mortwych wjelkow namakali.
Sta woporow namocy
Regensburg. Znajmjeńša 547 spěwarjow chóra Regensburger Domspatzen je so swój čas z woporom ćělneje a splažneje namocy stało. Tole wuchadźa z dźensa předpołoženeje kónčneje rozprawy wo skandalu znjewužiwanja w swětosławnym chórje dla. Prawiznik Ulrich Weber bě pady, kotrež stachu so wot 1945 do spočatka 90tych lět, dokumentował.
William a Kate w Pólskej
Policija (18.07.17)
Jědnaćoch wuchować dyrbjeli
Běła Woda. Z dotal njewujasnjeneje přičiny je wčera wječor w bydlenju na Bertolta Brechtowej w Běłej Wodźe na přizemju woheń wudyrił. Ze štyriposchodoweho domskeho dyrbjachu wuchowanske mocy a wohnjowi wobornicy jědnaće wosobow z pomocu wjerćiteho rybla wuchować. Pjećoch z nich dowjezechu podhlada zajědojćenja kura dla do chorownje. 37lětny wotnajer dospołnje wupaleneho bydlenja njebě doma. Kriminalna policija nětko přičiny wohenja přepytuje. Wobsteji podhlad zapalerstwa.
Bjez papjerow z mopedom jěł
Jitk. Jako chcychu zastojnicy Kamjenskeho policajskeho rewěra w nocy na minjenu sobotu w Ralbicach wodźerja mopeda kontrolować, so tón zawróći a ze sobujěducej do Jitka ćekny. Tam jeju lepiwši policisća zwěsćichu, a zo bě Simson w Běłej Wodźe pokradnjeny, zo njeměješe jeho 37lětny šofer ani jězbnu dowolnosć. Moped zastojnicy nablaku sćazachu.
