Nasyp w Sprjejcach zaměrnje ponowjeja
Sprjejcy (JoS/SN). Twarske dźěła na nasypje podłu Sprjewicy w Sprjejcach tež tele dny zaměrnje postupuja. Samo na nuzowy pad bě krajne zarjadnistwo rěčnych zawěrow přihotowane. Při mosće přez Sprjewicu su brjóh podłu twarnišća z pěskowymi měchami skrućili. Byrnjež k nuzowemu padej kaž kónc junija z powodźenjom njedóšło, běchu wěstotne naprawy trěbne. „To bě situacija, na kotruž dyrbimy stajnje přihotowani być“, praji zamołwita za projekt Cathleen Steinert.
Haćenja při měrjenišću pegela su hižo dospołnje hotowe, nětkole koncentruja so dźěłaćerjo na wotrězk hornjeho dźěla rěki hač k mostej we wsy. Twarske dźěła su w dalokej měrje zakónčene, jeničce zwjeršna woršta pjeršće a trawa hišće pobrachujetej. Za to wužiwaja pjeršć, kotruž běchu do zahajenja twarskich naprawow zrumowali. Z bagrom ju na prawe městno dowjezu, zrunaja a płoninu hnydom z trawu zasyja. Meter po metru dźe doprědka. „Na wjeršku připrawimy potom hišće šćežku za škit nasypa“, Cathleen Steinert wuswětla. „Tón je tež w zmysle wobydlerjow a zmóžnja w nuzowym padźe zasadźenskim jězdźidłam najkrótši přijězd.“
Kóžny rak w srjedźišću
Dermatologiski wotrjad jězorinoweho klinikuma dale wuwiwaja
Wojerecy (AK/SN). Pacientam z kóžnym rakom chce Wojerowski jězorinowy klinikum přichodnje hišće wobšěrniši poskitk hojenja a hladanja poskićeć. „Chcemy swój dermatologiski a alergologiski wotrjad dale wuwić a so na tymle polu z ćežišćowym zastaraćelom stać“, potwjerdźi jednaćel klinikuma Jörg Scharfenberg na njedawnej nowinarskej rozmołwje. Dobre sto dnjow nowy šeflěkar dr. Kim Christian Heronimus wobłuk dermatologije a alergologije nawjeduje. 39lětny rodźeny Berlinjan bě hač do lěta 2006 fachowy lěkar w stolicy a hač do 2014 zastupowacy šeflěkar w Zwickauwje. „We Wojerecach mam dobry team, dobre dźěłowe wuměnjenja a prawu wokolinu“, wón rozłoži. Jeho mandźelska móže jako neurologowka tohorunja w klinikumje dźěłać.
Krótkopowěsće (13.07.17)
Přednošk ministra přepołožić
Drježdźany. TU w Drježdźanach chce wustup zwjazkoweho justicneho ministra Heika Maasa (SPD) přichodnu póndźelu přepołožić. Poprawom chcyše Maas w słyšenskim šulskim centrumje wo šćuwańcy w interneće přednošować. Před Drježdźanskej uniwersitu pak chcetej AfD a Pegida přećiwo Maasej demonstrować. Runočasnje wotměja so na TU pruwowanja.
Za wyšu mzdu stawkowali
Lipsk. Sobudźěłaćerjo drobneho wikowanja Sakskeje a Durinskeje su dźensa znowa stawkowali. W Drježdźanach złožichu přistajeni předewzaćow Obi, H&M, Esprit, Kaufland a Ikea dźěło, zo bychu swoje žadanje za šěsćprocentowskim zwyšenjom mzdow potwjerdźili. Dźěłodawarjo poskićeja dotal 2,5 procentow.
Kóždy štwórty jaty wuknje
Drježdźany. Kóždy štwórty zasudźeny skućićel wužiwa čas w jastwje za kubłanje a kwalifikowanje. Po informacijach sakskeho justicneho ministerstwa bě w juniju 782 z cyłkownje 2 919 jatych w šulskim abo powołanskim wukubłanju. Tendenca pak woteběra. Kaž minister Sebastian Gemko (CDU) zdźěli, je kubłanski niwow jatych dźeń a snadniši.
Policija (13.07.17)
Paduši pola frizera
Budyšin. Po wšěm zdaću měrja so paduši w Budyšinje přiběrajcy na frizerske wobchody. W juniju a juliju dóńdźe dotal k šěsć tajkim zadobywanjam, při kotrychž je zdźěla tójšto wěcneje škody nastało. Najbóle drastiski pad sta so minjeny kónc tydźenja při tachantskej cyrkwi. Z tamnišeho frizerskeho wobchoda pokradnychu njeznaći wjacore nožicy, tabletowy kompjuter marki Asus kaž tež pjenjezy z kasy. Mějićelka wobliči škodu na 2 500 eurow. Nimo toho nasta wěcna škoda na durjach a woknach.
Dźakowano swójskej mocy moderne wuměnjenja nastali (3)
„Kóń je kulturne herbstwo a njesmě so ze wsow zhubić,“ měni předsyda Holešowskeho jěchanskeho towarstwa Frank Lehder. Wot 24. decembra 1999, takrjec jako hodowny dar, ma wone swoje sydło na kromje lěsa pola Holešowskeje Dubrawki. Prjedy bě tam swinjacy chlěw, kotryž su ze swójskej mocu a podpěru předewzaća Beyer z Łomska na konjenc z 25 městnami přetwarili. Bjezposrědnje pódla njeho bě polo. Mjeztym maja tam modernu jěchansku halu a jěchanišćo. Pod hesłom „tež kóń trjeba dobru zemju, zo by so derje pohibować móhł“, su samo wosebitu jěchansku zemju z wysokohódnotnym pěskom a tekstilijemi připrawili. Tež płoniny do směra na Łupjansku Dubrawku su nětko derje hladane łuki. Tak je so jedne z najmodernišich jěchanišćow na wuchodźe Sakskeje wuwiło, a to cyle na zakładźe čestnohamtskeho dźěła.
Škit polěpšeny
Budyšin (SN/JaW). Přetwar spušćadła w Nižej Wsy pola Rakec je zakónčeny. Wo tym informuje Budyski krajny zarjad rěčnych zawěrow. „Dźensa zakónčene dźěła skića lěpši škit před wulkej wodu“, rěka w nowinskej zdźělence. Tak móžachu z natwarom ekologiskeho přechoda zdobom dalše za wulku wodu strašne městno při Wojerowskej Čornicy wotstronić. Cyłkownje nałožichu 1,2 milionaj eurow za přetwar, spěchowanske srědki dóstachu z europskeho fondsa za regionalne wuwiće EFRE.
Stare spušćadło w Nižej Wsy bě w Rakecach wospjet powodźenja zawinowało. „Z nowej připrawu móža wulku wodu w Rakečanskej Młynskej hrjebi zaměrnišo wotwodźeć. Zo móhli tež přitok z Wojerowskeje Čornicy lěpje regulować, su do noweho spušćadła haćidło zatwarili“, tak krajny zarjad rěčnych zawěrow. Z přetwarom spušćadła njebu jeno škit před wulkej wodu za Rakecy polěpšeny, ale tež přepušćomnosć rěki za ryby a dalše wódne žiwochi.
Twarskich dźěłow dla dyrbjachu do toho jědnaće štomow pušćić. Za nje su tam 15 nowych sadźili.
Chcedźa tež starych motiwować
Starši ludźo we Wojerecach měli so bóle na wšědnym žiwjenju wobdźělić a njepřebywać jenož w swojim bydlenju. Tomule zaměrej ma słužić wosebity dźeń srjedź septembra.
Wojerecy (AK/SN). Po lěće 2013 přeproša město Wojerecy znowa na dźeń seniorow, kotryž je zwjazany z wosebitymi seniorskimi wikami. Termin 13. septembra organizuje syć towarstwow a zwjazkow zhromadnje z přiradomaj za seniorow a za zbrašenych na žurli Wojerowskeje lutowarnje. „Chcemy k wuměnje nazhonjenjow a k mjezsobnemu zeznaću pozbudźeć“, podšmórny předsydka přirady seniorow Gabriele Mark wčera na nowinarskej rozmołwje.
Zwoprawdźeja dalše plany
Při Bjerwałdskim jězoru ma Hamorska gmejna wjacore twarnišća
Hamor (AK/SN). Wobtwarjensku štwórć Klětno-Jazowa při Bjerwałdskim jězoru chce gmejna Hamor dale wotkrywać. Tole rjekny zastupowacy wjesnjanosta Hendrik Scholz (Hamorske wolerske zjednoćenstwo) na zašłym posedźenju gmejnskeje rady. Druhi wotrězk je dowotkryty. Wot srjedź junija dźěłaja na třećim wotrězku. Hamorska gmejna dósta za to spěchowanske srědki z programa k polěpšenju infrastruktury.
„Při Klětnjanskim přistawje je mjeztym hornja woršta kołopuća wotfrezowana, tak zo móže tam nowa promenada nastać“, rozłoži Hendrik Scholz. Tuchwilu kładu wodowód a wopłóčkowy kanal. Dokelž je kołopuć wokoło jězora při Klětnjanskim přistawje tuchwilu zawrjeny, dochadźa tam k wobchadnym poćeženjam. Tež při zjawnym nuzniku dyrbja hłubokotwarske dźěła přewjesć. Tohodla wostanje nuznik wot 24. julija hač do srjedź septembra zawrjeny. Gmejna stara so wo narunanje.
Prěnje drustwowe zahrodnistwo města wuhasnjene
Budyšin (EbS/SN). Na Špitałskich łukach w Budyšinje zminychu so tele dny poslednje zbytki něhdy prěnjeho drustwoweho zahrodnistwa sprjewineho města. Zahrodniskeje produkcije běchu so hižo před wjacorymi lětami wzdali a su so jenož hišće na wikowanje koncentrowali. Tak zhubichu so w zašłosći hižo techniske připrawy kaž tež škleńčane a folijowe rostlinarnje. Loni zwosta jenož hišće zarjadniske twarjenje, kotrež je nětko tohorunja spotorhane.
Započało bě so wšitko 1958. Tehdy běchu tři małe zahrodnistwa Exner, Faworka a Wehle prěnje zahrodniske produkciske drustwo (GPG) Budyskeho wokrjesa załožili. Cyłkownu płoninu 6,5 hektarow wobhospodarješe 18 drustwownikow. GPG „Morgensonne“, kaž je mjenowachu, wuwi so w běhu lět na najwažnišeho producenta zažneje zeleniny, kwětkow a rostlin wokoło Budyšina. Nimo tohole drustwa eksistowaštej w měsće měšćanske zahrodnistwo na Cyhelskim nasypje a GPG „Budissin“ ze sydłom na Wjelećanskej. Dale dźěłachu hišće wjacore priwatne zahrodnistwa kaž Hrjehorjec, Steglichec a Pelzec, kotrež hač do dźensnišeho wobsteja.
Krótkopowěsće (12.07.17)
Poslednje lěto darmotne
Podstupim. Braniborska SPD chce dźěćom poslednjeho předšulskeho lěta wot nazymy 2018 darmotny wopyt pěstowarnje zmóžnić. Naprawa ma prěni krok po puću k dospołnje darmotnej pěstowarni być, rjekny frakciski šef SPD Mike Bischoff dźensa w Podstupimje. Opoziciska CDU žada sej porno tomu wjace personala w pěstowarnjach.
Wot jutřišeho wothłosować
Sernjany. Techniskich problemow dla njebě minjene dny móžno hłosować za hrajkanišćowu iniciatiwu Fanta, na kotrejž so mjez druhim skupina Sernjanskich staršich wobdźěla. Kaž zamołwići zdźěleja, so wothłosowanje tuž jutře, 13. julija, w 0.01 hodź. wotprědka započnje. Wothłosowanje skónči so regularnje 10. awgusta w 23.59 hodź.
„Njerjana“ zelenina popularna
