Policija (04.04.17)
Awto motorskemu předjězbu wzało
Běła Woda. Jedne z prěnich lětušich njezbožow, na kotrymž bě wodźerka motorskeho wobdźělena, sta so zawčerawšim pola Běłeje Wody. Na zwjazkowej dróze B 156 bě 22lětna wodźerka Suzukija z runje tak starej sobujěducej po puću, jako wodźer awta jeju předjězbu njewobkedźbowaše a do njeju zrazy. Wobě žonje so ćežko zraništej.
Šerjenje „po serbsku zdrasćena žona“ była
Budyšin (CRM/SN). Njeje dźě ničo wosebiteho, zo so w chronikach wo šerjenjach rozprawješe. Tola na Budyskim šerjenju (abo spektrumje), kiž wot hód 1683 hač do nazymy 1684 knjeni Evu Catharinu Keilpflug w domje na dźensnišej Małej Bratrowskej 5 nadběhowaše, je to kedźbyhódne, zo zjewi so pozdatnje jako „po serbsku zdrasćena žónska“ z běłym rubišćom wokoło hłowy. Dosć dokładnje rysowaše njedawno w Serbskim muzeju stawiznar Měrćin Brycka podawki, kotrež su we wjacorych chronikach wopisane. Šerjacej wosobje dźěše wo hódne pochowanje žony z mjenom Sabina Ruprecht(in), kotraž bu pječa w lěće 1631 wot Martina Kalmanna, wobydlerja domu na Bratrowskej 5, morjena. Njeje wšak při tym wěste, hač njejednaše so tu poprawom wo dopominanje na mór w horjeka mjenowanym lěće w měsće nad Sprjewju.
Budu serbske temy dale rozjimać
Budyšin (SK/SN). Serbske temy steja dale na dnjowym porjedźe Budyskeho kluba k zachowanju rěče. Na to su so čłonojo kluba na swojej wólbnej zhromadźiznje dojednali. „Za nas je samozrozumliwe, zo wěnujemy so serbskej rěči a literaturje. Zo smy to dotal zdokonjeli, bě nam wšěm na wužitk“, rjekny předsyda kluba Diethold Tietz.
Nimale dźesać lět jako zapisane towarstwo dźěłacy klub je w tym času wjace hač 500 přednoškow wo rěčnej politice, kulturje a literarnych stawiznach wobydlerstwu města poskićił. Mjez referentami běchu tež znaći serbscy wědomostnicy a kulturnicy, kaž prof. Dietrich Šołta, Ludmila Budarjowa a dr. Beata Brězanowa.
Na čole towarstwa stejitaj Diethold Tietz jako předsyda a Sieghard Kozel jako městopředsyda. Wón wobžarowaše, zo nimamy w Serbach tak prawidłownje a ze substancu do zjawnosće skutkowacy cyłk spěchowarjow rěče. „Runje Serbja bychu to najbóle trjebali.“
Debjerjo wšón čas swěrni
SKC wopytowarski magnet 20. serbskich jutrownych wikow był
Slepo (JoS/SN). Připowědźene nalětnje wjedro je kónc tydźenja syły ludźi do Slepjanskeho Serbskeho kulturneho centruma (SKC) wabiło. Tam wopokazachu so jubilejne 20. jutrowne wiki jako woprawdźity wopytowarski magnet. Wjace hač 30 debjerjow z cyłeje Łužicy wot Budyšina hač do Błótow prezentowaše swoje wuměłstwo.
W srjedźišću stejachu wězo tradicionalne serbske mustry na pisanych jejkach, ale tež přirodne motiwy a dalše kreacije sy wobdźiwać móhł. Rainer Grosa ze Sprjejc, Kurt Pluta z Běłeje Wody a Hubert Bartsch z Rěčic běchu takrjec mištrojo škrabanskeje techniki. Nimo nich běchu tohorunja někotři dobyćerjo lětušeho wubědźowanja wo najrjeńše serbske jutrowne jejko pódla.
Mopedy z časa NDR su kult
Kaž za čas NDR sy so sobotu na terenje firmy AKF na Drježdźanskej dróze w Budyšinje čuł – a sy to we wěrnym zmysle słowa čuchać móhł. Sta mopedow rozšěrjachu hobersku bencinowu mróčel z dwutaktoweje měšeńcy.
Budyšin (CS/SN). Hižo třeći raz zetkachu so přećeljo dwukolesoweje techniki z časa NDR. Tele zetkanja wotměwaja so stajnje spočatk a kónc sezony. Kaž organizator Alexander Kalkbrenner rjekny, je zajim za zetkanje lěto a wjetši. Po zakónčenju wón sobotu zdźěli, zo bě dohromady 800 jězdźidłow z něhdźe 1 500 hosćimi přijěło. Mjez nimi běchu někotři z Lipska abo ze susodneje Braniborskeje. Najdlěši puć měješe wodźer motorskeho typa AWO, kiž bě ze Šwicarskeje přijeł.
Kapon jeno žort był
Krótkopowěsće (03.04.17)
Kruch Bratrowstwa wuspěšny
Kulow. Dźiwadłowa skupina Bratrowstwa je wčera inscenaciju „Jědźk a lěnjoch“ na Kulowskim Starym dwórnišću pokazała. Zdobom bě to poslednja pokazka wuspěšneho krucha w režiji Měrka Brankačka. Na wšitkich jědnaće předstajenjach běchu žurle derje pjelnjene, rjekny předsydka Bratrowstwa Sonja Hrjehorjowa. Přichodnu inscenaciju předstaja za dwě lěće.
Nowa brošurka tež delnjoserbska
Lubnjow. Lubnjowski biosferowy rezerwat ma nowu informacisku brošurku. W njej njepodawaja zajimawosće jenož w němskej a jendźelskej, ale nětko tež w pólskej a delnjoserbskej rěči. Braniborski wobswětowy minister Jörg Vogelsänger (SPD) a nawoda rezerwata Eugen Nowak staj brošurku minjeny tydźeń předstajiłoj, informuje rezerwat. Domowina bě do projekta zapřijata.
„Lausitziale“ zahajena
Policija (03.04.17)
Trik bohužel fungował
Budyšin. Z wnučkowym trikom su njeznaći minjeny pjatk 79lětnej žonje w Budyšinje pjećcyfrowu sumu pjenjez wulišćili. Młoda žona pola njeje připołdnju zazwoni a wuda so jako wnučka, kotraž pjenjezy trjeba, dokelž chce sej awto kupić. Pozdźišo zazwonichu dalši njeznaći, kotřiž jako pozdatni prawiznicy a kriminalisća „basničku wnučki“ wobkrućichu. Skónčnje rentnarka wjacore tysac eurow njeznatemu mužej přepoda. Woprawdźita wnučka je pad nazajtra policiji přizjewiła.
Prjedy hač budu křižerjo zaso jutrowne poselstwo wozjewjeć, su ...
Wotpadki wotbyć nětko zakazane
Worklečanska gmejna bě dotal jedna z mało, hdźež móžachu wobydlerjo swoje zahrodkowe wotpadki a samo nuklacy hnój darmotnje wotbyć. Tónle čas pak je nětko doskónčnje nimo.
Worklecy (SN/MWj). Z dweju stron wjedźetej pućikaj na kromje Worklec k městnu, hdźež móžachu wobydlerjo gmejny wjele lět wotsyčenu trawu, lisćo, zbytki zahrodowych rostlin a podobne wotbyć, a to darmotnje. Mjeztym pak je přijězd k tak mjenowanemu Psyčemu kěrchowej z wobeju bokow zawrjeny a zawěra z wotpowědnym wobchadnym znamjenjom wuhotowana. Wotpadki wotbyć je tam wotnětka zakazane.
Wjesnjanosta Franc Brusk (CDU) tónle krok wokrjesneho wobswětoweho zarjada jara wobžaruje, ma pak za njón zrozumjenje. „Mi je jara škoda, zo po telko lětach tule přijomnu móžnosć darmotneho wotwožowanja rostlinskich wotpadkow zhubimy, jenož dokelž so jednotliw- cy z gmejny, ale tež zwonka njeje zadźeržeć njewědźa“, praji wjesnjanosta. Na tele skerje zdwórliwe wašnje wón wopisuje, kak je so minjene měsacy połoženje na Psyčim kěrchowje přiwótřiło.
