Žitnych wikow dla bydlenja přepytali
Podawki 14. septembra kaž tež w nocy wot 1. na 2. nowember 2016 na Budyskich Žitnych wikach stejachu dźensa w fokusu Zhorjelskeje policajskeje direkcije a operatiwneho wotwobaranskeho centruma sakskeje policije.
Budyšin (SN/MWj). Zhromadna přepytowanska skupina „Platte“, wobstejaca ze zastojnikow Zhorjelskeje policajskeje direkcije a wotwobaranskeho centruma sakskeje policije je dźensa w Budyšinje, Wojerecach, Schönteichenje a Hnašecach wjacore bydlenja přepytała. Kaž w zhromadnym nowinskim wozjewjenju policajskeje direkcije a statneho rěčnistwa rěka, je tele naprawy Zhorjelske hamtske sudnistwo na namjet tamnišeho statneho rěčnistwa přikazało. „Naprawy stejachu w zwisku z přepytowanjom podawkow 14. septembra 2016 kaž tež w nocy wot 1. na 2. nowember w Budyskim nutřkownym měsće. Mjez druhim přepytujemy spjećowanja přećiwo policajskim zastojnikam a nuzowanja dla“, steji w nowinskim wozjewjenju.
Wužiwać prawo naprašowanja
Budyšin (SN/at). Z nastorkami z rozprawy społnomócnjeneje Reginy Krawcoweje loni 12. decembra Budyskemu wokrjesnemu sejmikej zaběrachu so čłonojo wokrjesneho dźěłoweho kruha za serbske naležnosće na wuradźowanju wčera w Budyskim krajnoradnym zarjedźe.
Podpěru nazhoni społnomócnjena w kritice, zo je so městno kuratorki Christiny Boguszoweje přeměniło. Po tym zo bě wona zastojnstwo direktorki Serbskeho muzeja přewzała, bu z toho městno muzejoweho pedagogi. Tajkeho nuznje trjebaja, wšako bu wotpowědne městno lěta 2008 šmórnjene. Pozitiwnje hódnoći dźěłowy kruh nowe městno za wolontarku. Zo bychu zhonili, kak móhł gremij Serbski muzej zaměrnišo podpěrać, chcedźa z Christinu Boguszowej rěčeć.
Přez serbskich wěcywustojnych wobydlerjow we wuběrkach Budyskeho wokrjesneho sejmika měło so serbskim, ale tež dalšim wokrjesnym radźićelam přidźěłać, zo bychu so woni nastupajo konkretne serbske předmjety z prašenjemi na wokrjesne zarjadnistwo wobroćili. „Prawo naprašowanja ma so bóle wužiwać“, rjekny społnomócnjena.
Krótkopowěsće (11.01.17)
Internat ma praktikanta
Choćebuz. Vincent Lukas skutkuje wotnětka w internaće Delnjoserbskeho gymnazija Choćebuz jako praktikant. Młodźenc je w druhim wukubłanskim lěće na kubłarja. Jako bywši šuler gymnazija měješe wón dobre wuměnjenja za wupisane městno. Žadanej běštej dwurěčnosć a zajim, w serbskich institucijach skutkować chcyć.
Wadźa so wojakow USA dla
Podstupim. Zaměr USA, swoje wojerske jednotki do srjedźneje a wuchodneje Europy přepołožić, je w Braniborskej protesty a raznu politisku debatu zbudźił. Zastupnicy Lěwicy a AfD šwikaja akciju jako „wójnsku hrožacu politiku“. Rěčnicy CDU transport wojakow porno tomu zakituja. Ministerski prezident Dietmar Woidke (SPD) bě debatu z kritiskimi wuprajenjemi wo wojakach nastorčił.
Hendricks: Wjelki njetřěleć
Policija (11.01.17)
Cuze pakety wočinjeli
Kamjenc. Póstowy zarjad na Andreasa Güntherowej w Kamjencu bě cil paduchow, kotřiž so tam w nocy na póndźelu zadobychu. Kaž policija rozprawja, su njeznaći wšitke rumnosće přepytali a wjacore pakety zwočinjeli. Nimo toho pokradnychu trezor z pjenjezami a kołkami, telewizor a mikrožołmu. Hódnota rubizny dotal znata njeje. Na twarjenju nasta něhdźe 300 eurow škody. Policija pad nětko přepytuje.
Hodowne předstajenje z diskutowacymi teeniejemi
Budyšin (CRM/SN). Lětdźesatki swjeća Serbja Budyskeje katolskeje tachantskeje wosady wokoło Třoch kralow swoju wosadnu hodowničku, a to kóždy raz z bjesadu při kofeju a wosušku a ze zhromadnym spěwanjom. Přetož mnohe lěta hižo stara so wučerka na wuměnku Ludmiła Bizoldowa tež wo mały kulturny program, kotryž wosadni sami wuhotuja.
Lubowarjo starych traktorow a dalšich historiskich jězdźidłow ...
Nowosće a překwapjenki dožiwili
Róžant (jh/SN). Dźeń po nowolětnej hońtwje drustwow Róžant a Pěskecy su Róžeńčanscy hońtwjerjo zhromadnje z Róžeńčanskimi młodymi swójbami wjesne dźěći, jich staršich a přećelow na mjeztym hižo štwórte nowolětne pućowanje k Staremu hatej pola Smjerdźaceje přeprosyli.
Prawy puć namakać je ćežko
Wo zwóńkowskej słužbje w Róžeńčanskej cyrkwi rěčeli
Róžant/Ralbicy (JK/SN). Wjelelětneho zwóńka Róžeńčanskeje cyrkwje Tomaša Glawša su minjenu njedźelu w Róžeńce po dopołdnišich kemšach rozžohnowali. Wobšěrnych powołanskich nadawkow dla njemóže Róžeńčan słužbu we a wokoło putniskeje cyrkwje hižo wukonjeć. Sčasom bě wón to wosadnemu fararjej Šćěpanej Delanej, kiž je za Róžeńčansku swjatnicu zamołwity, zdźělił a jeho zdobom prosył naslědnika abo rozrisanje za słužbu namakać. Farar Delan bě so móžnych kandidatow prašał, ale bjez wuspěcha. Zetka so tuž z někotrymi z nich a z dotalnym zwóńkom wčera wječor na Ralbičanskej farje, zo by z nimi wo tym rěčał, kak móhli tuchwilny problem rozrisać.
