Chcedźa hort zaso we wsy měć
Starši na posedźenju gmejnskeje rady rozhorjeni
Pančicy-Kukow (SN/MWj). Poprawom chcychu Wotrowske hortowe dźěći adwentničku w swojich po wulkej wodźe ponowjenych rumnosćach we Wotrowskej pěstowarni swjećić. Hač pak so to zešlachći, je dwělomne. Přetož přeco hišće njesmědźa wone do swojich rumnosćow zaćahnyć. Wina na tym je, zo njejsu rumnosće hišće twarsce wotewzate. Swoju rozhorjenosć dla toho někotři starši na wčerawšim posedźenju Pančičansko-Kukowskeje gmejnskeje rady zwuraznichu.
Přidatne wudawki plěsniwca dla
Rakecy (JK/SN). Energijowe předewzaće ENSO ma Rakečansku gmejnu přichodnje z płunom zastarać. Tole schwali gmejnska rada zawčerawšim na swojim posedźenju. Firma bě so jako jenička na wotpowědne wupisanje gmejny w juniju přizjewiła a ze swojim poskitkom a wuměnjenjemi radźićelow přeswědči. Wjesnjanosta Swen Nowotny (CDU) móže tuž wotpowědne zrěčenje z płunowym zastaraćelom wotzamknyć.
W dalšim dypku sej rasdźićeljo dokładnje dorěčachu, w kotrej formje plan za wohnjoškit w gmejnje dale powjedu. K tomu předstajištaj čłonaj wohnjoweje wobory zhromadnje z gmejnu zdźěłany plan naprawow a trěbnych nadawkow, zo by so wohnjoškit přichodne lěta we wšěch wsach gmejny zaručił.
Krótkopowěsće (16.12.16)
Kniha Meškanka zaso na předań
Budyšin. Za krótki čas rozpředata kniha Tima Meškanka „Sorben im Blick der Staatssicherheit. Die Akten der K 5 und des MfS der DDR 1949–1989“ je nětko w druhim nakładźe w Ludowym nakładnistwje Domowina wušła. Z knihu pomha historikar hač do dźensnišeho dnja wobstejace běłe blaki serbskeho stawiznopisa wo času NDR wuswětlić.
Njewěstosć pola Bombardiera
Zhorjelc. Njewěstosć sobudźěłaćerjow wagonotwarca Bombardier hladajo na jich dźěłowe městna traje dale. Dźěłarnistwo IG Metall njewočakuje, zo koncern hišće do hód konkretne ličby wozjewi, kelko dźěłowych městnow chce šmórnyć. W Zhorjelcu a braniborskim Henningsdorfje su dźensa přećiwo planam protestowali, wčera w Budyšinje.
Hackerojo w Sakskej aktiwni
Policija (16.12.16)
W bydlenju kradnyła
Łaz. Lochkomyslnosć wobydlerki je njeznata žona zawčerawšim we Łazu k padustwu wužiła. 87lětna wjesnjanka bě dopołdnja swój dom wopušćiła, zo by po šćěpki šła. Po wšěm zdaću pak durje njezamkny, tak zo móžeše cuza žona zastupić. Jako so rentnarka wróći, wona njeprošeny wopyt wuhlada a jemu kazaše, dom a ležownosć wopušćić. Hakle pozdźišo staruška pytny, zo běchu w spanskej stwě wšitke kamory přeborkane a zo je so mały drjewjany kašćik z wopismami a medaljemi w hódnoće něhdźe 50 eurow zhubił.
Krawc čita w hospodźe
Chrósćicy. Na předwječoru štwórteho adwenta přeprošuje Chróšćanska putniska hospoda jutře, sobotu, w 19.45 hodź. w přitulnej atmosferje na měrny čitanski wječork z Křesćanom Krawcom z Hrubjelčic. Jedna z nowšich knihow spisowaćela je roman „Paradiz“ wo stawiznach serbskeje swójby přez tři generacije. Z njeje předstaji Krawc wosebje epizodźe „Gretcyne hody“ a „Serbski kwas“. Wšitcy lubowarjo serbskeje literatury su wutrobnje přeprošeni. Hižo w 16 hodź je dźěćace kino, pokaza so trikowy film.
Hrajki w muzeju widźeć
Njeswačidło. Wosebite wodźenje budźe njedźelu, 18. decembra, wot 13 hodź. po hodownej wustajeńcy w Njeswačanskim domizniskim muzeju. Tamnišu přehladku metalowych hrajkow jich zběraćel a wustajer Matthias Stein rozłoži a je tohorunja demonstruje. Tak budźe so hoberske koło runje tak wjerćeć kaž někotre dalše eksponaty. Přehladka je hač dosrjedź januara kóždu njedźelu wot 13 do 17 hodź. wotewrjena. Tež na hodownych a nowolětnych swjatych dnjach su wopytowarjo w muzeju witani, zdźěli Njeswačanske towarstwo přećelow domizny a kultury, kotrež so wo muzej stara.
Wjace muzejam
Budyšin šulsku jědź znowa wupisa
Kriterije wupytanja su starši a měšćanska swójbna rada sobu postajili. Za dźěćace dnjowe přebywanišća budu jednotliwe losy, zo bychu tež mjeńši poskićerjo šansu měli.
Budyšin (CK/SN). Wot awgusta 2017 rjaduja dodawanje šulskeje jědźe w Budyšinje znowa. W januarje zarjadnistwo zastaranje wupisa. Měšćanska rada sprjewineho města tole wčera jednohłósnje wobzamkny. Wjace hač 2 000 dźěćom a młodostnym chcedźa tak ćopły wobjed zmóžnić. Zastaranje pjeć dźěćacych dnjowych přebywanišćow w nošerstwje města a štyrjoch zakładnych šulow wupisaja w jednotliwych losach. Po słowach Thomasa Großa maja z tym mjeńši poskićerjo šansu, so wo jednotliwe zarjadnišća požadać. Zhromadny los płaći za tři wyše šule, zo bychu wěste minimalne wotewzaće zaručili. Zastaranje Schilleroweho a Melanchthonoweho gymnazija tohorunja w jednym losu zjimaja. Z organizatoriskich přičin je ćežko, tónle wukon rozdźělnym poskićerjam rozdać, rjekny nawoda zarjada za kubłanje a socialne.
Směrnicy integrowanja schwalene
Budyšin (UM/SN). Jako prěni wokrjes Swobodneho stata Sakskeje ma Budyski wot zašłeho posedźenja wokrjesneho sejmika integraciske směrnicy. „Integracija je dobrowólny a zakonsce njedefinowany nadawk“, rjekny nawoda tudyšeho zarjada za wukrajnikow Lars Eibisch. Tohodla dyrbi sej wokrjes sam wotpowědne směrnicy podać.
W směrnicach mjez druhim steji, zo je integracija prěnjorjadny nadawk tych, kotřiž chcedźa integrowani być. „My rukujemy za wotpowědne poskitki, iniciatiwu pokazać pak maja ći, kotřiž chcedźa je wužiwać“, zarjadniski nawoda rozłoži. Cyle jasnje je tohorunja zapisana zasada, zo su integraciske poskitki jeno za tych, „kotřiž dołhodobnje a prawnisce w Němskej bydla“. Kataloga naprawow móhli so po słowach Eibischa wzdać. „Smy we wokrjesu hižo telko poskitkow etablěrowali, zo mamy tajki katalog za zbytny.“ Poskitki koncentruja so na wobłuki rěč, kubłanje, dźěło a wobdźělenje na towaršnostnym žiwjenju, to rěka sobuskutkowanje w towarstwach a čestnohamtske dźěło.
Strachi a předsudki wottwarić
Zamołwity za serbske naležnosće města radźićelam rozprawjał
Kulow (AK/SN). Dwurěčne kubłanje poskićuja w Kulowje wot lěta 2009 bjez přetorhnjenja wot pěstowarnje hač k wyšej šuli. Pěstowarnje, zakładna a wyša šula, cyrkej, město a towarstwa so wo serbsku rěč na mnohostronske wašnje prócuja. Tole podšmórny zamołwity za serbske naležnosće města Stephen Rachel, zdobom nawoda twarskeho zarjada města, w swojej lětnej rozprawje na wčerawšim posedźenju měšćanskeje rady. „Je wažne, so wobstajnje a konsekwentnje wo serbšćinu prócować. Wjele lět tomu tak njeběše“, rjekny Rachel.
Tele prócowanje widźi wón w pěstowarni Jakubecowy wustaw, kotrejež nošer je katolska wosada, kaž tež w pěstowarnjomaj w nošerstwje CSB w Kulowje a Sulšecach. W Krabatowej zakładnej šuli wuknje z 217 šulerjow 116 serbsce, z toho 40 po koncepće 2plus. „Nimo wučby serbšćiny wuwučuja w dalšich předmjetach dwurěčnje“, rěka w rozprawje. Tež šulske žiwjenje wusměrjeja dwurěčnje.
