Jězdźidło zymskeje słužby wupadnje
Krótkopowěsće (05.01.17)
Mjenje zrěčenjow
Budyšin. 98 žonow a 270 muži je loni wukubłanske zrěčenje w rjemjeslniskich zawodach Budyskeho wokrjesa podpisało. Přirunujo z lětom 2015 pak je so ličba pomjeńšiła. To bě jich hišće 433, kaž wozjewi dźensa rjemjeslniska komora Drježdźany. W Zhorjelskim wokrjesu wosta ličba 261 podpisanych wukubłanskich zrěčenjow konstantna.
Lěwica z rekordom
Drježdźany. Cyłkownje 328 nowych sobustawow móžeše sakski krajny zwjazk Lěwicy minjene lěto witać. To je rekord. Najmłóši sobustaw bě za čas zastupa 16, najstarši 68 lět. Přiwšěm je 394 ludźi stronu předewšěm starobnych přičin dla wopušćiło. Pjeć procentow wustupjenych pak mjenowaše politiske wusměrjenje jako přičinu.
Wjace mzdy dóstali
Berlin. Tarifowe mzdy wučomnikow su po wuhódnoćenju zwjazkoweho instituta za powołanske kubłanje w lěće 2016 znowa stupali. Tak dóstachu wučomnicy na zapadźe Němskeje přez cyły wukubłanski čas brutto měsačnje přerěznje 859 eurow. Na wuchodźe Němskeje je so tarif wo 4,9 procentow zwyšił. Tu dóstachu młodostni přerěznje 807 eurow bruttomzdy na měsac.
Freund dale njeskaka
Policija (05.01.17)
Pytaja swědkow
Smjerdźaca. K wobchadnemu njezbožu, kotrež je so zawčerawšim na dróze mjez Smjerdźacej a Němskimi Pazlicami stało, pyta policija swědkow. Krótko po 15.30 hodź. bě wodźer VW Golfa po wšěm zdaću tak daloko nalěwo jěł, zo dyrbješe so napřećo jěduca 22lětna šoferka VWja Polo wuwinyć. Při tym zajědźe wona přez kromu jězdnje, zhubi kontrolu nad wodźidłom a suny so z awtom na lěwym boku puća do přirowa. Na zbožo so młoda žona njezrani, na jeje jězdźidle pak nasta 5 000 eurow škody. Wodźer tamneho awta so zhubi. Štóž je njezbožo wobkedźbował abo móže pokiwy k wodźerjej Golfa dać, njech přizjewi so pod telefonowym čisłom 03578/ 35 20.
Wšitke hrajkanišća wažne
Tež gmejna Worklecy so rady wo młode swójby stara
Runja Sernjanam a Kulowej je so w minjenych lětach tež we Worklecach tójšto młodych swójbow zasydliło a sej tam domčk natwariło. Štož wjesnjanostu Franca Bruska (CDU) zwjesela, je gmejnje zdobom wužadanje. Wšako ma wona swójbam městna a wotpowědne wuměnjenja w žłobiku, pěstowarni a šuli skićić, trěbne su w jednotliwych wjesnych dźělach komuny tohorunja hrajkanišća. Nastroje njejsu runjewon tunje a dyrbja so prawidłownje přepruwować, zo bychu wěstotnym předpisam wotpowědowali. Za porjad a wěstotu tam nastajenych připrawow je wudźeržowar abo wobsedźer ležownosće zamołwity. Při zjawnych hrajkanišćach su to zwjetša komuny, hewak nošerjo pěstowarnjow, šulow a dalši. Měrćin Weclich je so z Worklečanskim wjesnjanostu Francom Bruskom (CDU) rozmołwjał a je zhonił, zo tež dźěći z Kozarc a Chrósćic rady do Worklec na hrajkanišćo jězdźa.
Kelko hrajkanišćow we Worklečanskej gmejnje maće?
Trjebaja 15 000 eurow
W Kamjencu maja cyłkownje 19 hrajkanišćow, kotrež Lessingowe město wobhospodarja. Do toho zapřijate su tež hrajkanišća městu přisłušacych wsach.
Kamjenc (SN/mwe). Jedne z najznaćišich hrajkanišćow w Kamjencu je Krabatowe, kotrež běchu 20. meje 2006 w zwisku z 5. Krabatowym swjedźenjom blisko Muzeja zapadneje Łužicy pod Čerwjenej wěžu poswjećili. Kaž nowinski rěčnik města Thomas Käppler zdźěli, „Kamjencej tučasnje žane grawěrowace žadanja za hišće wjace hrajkanišćemi njepředleža. Tuž nětko k dispoziciji stejace připrawy dosahaja, byrnjež wězo wjace hrajkanišćow přeco prašanych było.“
Papjerniki derje wuprózdnjene
Kulow (SN/mwe). Přistajeni Kulowskeho twarskeho zawoda su mjez druhim za to zamołwići, na zjawnych městnosćach komuny, a to tež we wjesnych dźělach, prawidłownje papjerniki wuprózdnjeć. Jurij Brösan, zastupowacy hamtski nawoda města Kulowa, podšmórny, zo dźěłaćerjo při tydźenskej kołojězbje tež při městu přisłušacych hrajkanišćach pozastanu a tam „za prawym hladaja“. Wšako wudźeržuje Kulow wjace hač dwaceći hrajkanišćow, w kóždej wsy jedne. Tohorunja w Kulowskej lěsnej kupjeli abo při měšćanskim haće móža dźěći krosnować a so čumpać.
Wjetšinu hrajkanišćow su po přewróće připrawili, te z NDRskeho časa su dospołnje ponowili, dokelž nowym předpisam njewotpowědowachu. Za wosebje derje wuhotowane hrajkanišćo, kaž w Spalach, tak Jurij Brösan, dyrbiš něhdźe 30 000 eurow nałožić.
Šula a puć wulkej twarnišći
Lońše podawki a lětuše předewzaća w gmejnje Pančicy-Kukow
Pančicy-Kukow (SN/MWj). Na lěto 2016 zhladuje wjesnjanosta gmejny Pančicy-Kukow Markus Kreuz (CDU) z jara měšanymi začućemi. Kaž wón w swojej lětnej bilancy na zašłym posedźenju gmejnskeje rady rjekny, běchu někotre zwjeselace podawki, ale tež mjenje zwjeselace. Tajkej běštej w prěnim rjedźe njewjedrje 23. meje a 26. junija. Wonej stej drje we wšěch wsach gmejny škody načinili, předewšěm pak we Wotrowje a Swinjarni. We Wotrowje stej woda a błóto dwójce pěstowarnju zapusćiłoj. Tam su nimo wjacorych nowych špundowanjow tež nowe tepjenje, wokna a durje zatwarić dyrbjeli. W Swinjarni je porno tomu wulka woda w meji cyły puć rozdrěła. Tón drje je mjeztym prowizorisce zwuporjedźany, jeho porjadny wutwar pak budźe hišće wulki nadawk.
Na hładkim puću znjezbožił
Mjenje dołha wopłóčkow dla
Kulow (AK/SN). Wopłóčkowy zawod města Kulowa je w lěće 2015 derje hospodarił. „Z našeho wotličenja wuchadźa dobytk 70 000 eurow. Lěto do toho mějachmy hišće deficit 24 000 eurow“, rozłoži Jurij Brösan, nawoda wopłóčkoweho zawoda, na zašłym posedźenju Kulowskeje měšćanskeje rady. Po jeho słowach mějachu 1,194 milionow eurow dochodow a 1,124 milionow eurow wudawkow.
„Njemějachmy žane wjetše inwesticije. Dyrbjachmy jeničce někotre klumpy wuměnić“, rjekny Brösan. W lětomaj 2018 a 2019 budźe tomu hinak. Potom dyrbja wjetši dźěl klumpow ponowić. Wina na tym pak su zdźěla tež wobydlerjo, kotřiž často wěcy do nuznika mjetaja, kotrež w nim ničo pytać nimaja. Za to wopłóčkowe připrawy prosće twarjene njejsu. Tohodla apelowaše Brösan na posedźenju radźićelow na sobuzamołwitosć wobydlerjow we wšitkich přizamknjenych domjacnosćach.
Miliony za wokrjesne dróhi
Wokrjes Budyšin chce lětsa wjacore dróhi zdźěla abo dospołnje ponowić a někotre twarske naprawy dokónčić. Tež serbske wsy z naprawow za nimale dwucyfrowu milionowu ličbu profituja.
Budyšin (SN/JaW). Nimale dźesać milionow eurow chce wokrjes Budyšin lětsa za zwuporjedźenje a wutwar dróhow nałožić. Z toho maja tež serbske a dwurěčne komuny profitować, wobkrući našemu wječornikej na naprašowanje sobudźěłaćerka wotrjada za zjawnostne a nowinske dźěło Budyskeho krajnoradneho zarjada Sabine Rötschke.
Tak chce wokrjes za něhdźe 1,3 miliony eurow wjacore puće z bitumenom znowa pokryć. 380 000 eurow wuda mjez druhim za dróhu přez Zdźěr, kotruž započnu najzašo w aprylu ponowjeć. 20 000 eurow wjace ma předwidźane za ponowjenje powjercha dróhi ze Šunowa do delnich Sulšec. Twarske dźěła su za junij a julij planowane. Za čas ponowjenja měli so wobydlerjo na poćeženja a móžne wobjězdki nastajić. W samsnym času chcedźa tež dróhu mjez Sepicami (Schwepnitz) a Zelenej Hrabowku (Grüngräbchen) za 130 000 eurow znowa asfaltěrować.
