Štóž za swojich lubych přeco hišće hodowny darik nima, namaka ...
Čiłu zhromadnosć hajili
Hórki (KJu/SN). Hižo na wjacorych městnach Hórkow běchmy minjene lěta adwentne wiki wotměwali. Lětsa pak přeprosy wjesne towarstwo Při skale prěni raz na tajke při gratowni Hórčanskeje wohnjoweje wobory. Bohužel so cyłe popołdnjo dešćowaše. Wjace hač 150 Hórčanow, Dobroščanow a dalšich ludźi pak njeda so wottrašić a je přišło.
Pilni pomocnicy běchu gratownju přerumowali, tak zo móžachu so hosćo w suchim posydnyć a programej sćěhować. Najprjedy zawjeselichu jich wjesne dźěći z pisanym programom, kotryž běchu pod nawodom Anet Škodźineje nazwučowali. Za rjany přinošk so jim rumpodich dźakowaše. Po tym tež dalše dźěći składnosć wužiwachu a jemu baseń abo spěwčk přednjesechu, za čož dóstachu mały darik. Dale móžachu wone rjane paslenki zhotowić. K hudźbnemu wobrubjenju hrajachu dujerjo kapały Horjany adwentne pěsnje. W budkomaj před gratownju poskićachu dźěćace paslenki, rězbarske wudźěłki Měrćina Pjetaša a měd Sćapanec swójby z Hórkow.
Swěca znamjo měra
Krótkopowěsće (22.12.16)
Njetrjebatej telko płaćić
Budyšin/Zhorjelc. Wokrjesaj Budyšin a Zhorjelc njetrjebatej w přichodnymaj lětomaj telko pjenjez regionalnemu wotpadkowemu zwjazkej Ravon přepokazać, kaž bě dotal planowane. Cyłkownje lutujetej wonej štyri miliony eurow, informuje dźensa rozhłosowy sćelak MDR. Ravon bě ze spalernju wotpadkow we Łutach nowe přijomniše zrěčenje za wokrjesaj wujednał.
Trjebaja wjace pomocnikow
Drježdźany. Přiběraceje ličby potrěbnych trjebaja sakske tafle wjace čestnohamtskich pomocnikow. Předewšěm šoferojo awtow, kotřiž žiwidła rozwožuja, su trěbni, zdźěli rěčnik krajneho zwjazka sakskich taflow. Dotal maja w kraju 1 500 čestnohamtskich pomocnikow, kotřiž zwjetša žiwidła rozdźěleja.
Zapłaći Kuba dołh z rumom?
Praha/Havanna. Kuba ma pola Čěskeje republiki hišće wot časa Čěskosłowakskeje dołh něhdźe 250 milionow eurow. Nětko je wona Čěskej njewšědny namjet činiła – mjenowany dołh z dodawanjom ruma wurunać. Wotpłaćić cyłu sumu by wjace hač 23 milionow blešow woznamjenjało. Poskitk je po cyłym swěće wulku kedźbnosć zbudźił.
Policija (22.12.16)
Wulku škodu načinili
Mały Wjelkow. W Małym Wjelkowje běchu so njeznaći wčera rano do kupnicy na Wojerowskej dróze zadobyli. Po prěnich dopóznaćach tam drje ničo pokradnyli njejsu, wěcna škoda rozbitych duri dla pak wučinja něhdźe 10 000 eurow.
Wopity z awtom jěł
Wjazońca. Na statnej dróze S 119 sta so wčera pola Wjazońcy ćežke njezbožo. 39lětny wopity šofer bě kontrolu nad jězdźidłom zhubił a na łuku zajěł. Wěcna škoda je něhdźe 5 000 eurow.
Na dobro wsy wjele organizuja
Hižo wjele lět organizujemy w Smječkecach adwentničku za seniorow. Samsny dźeń wječor zetkawaja so wjesnjenjo a hosćo před domom wjesneho kluba. Tón bě tež lětsa zaso z hosćićelom rjaneje tradicije, kotruž hižo nimale dwaceći lět pěstujemy.
Pilne žony běchu blida kryli, pomazki mazali a nětko tež rentnarjow posłužowachu. Při kofeju rozprawješe předsyda wjesneho kluba Handrij Hejduška wo jeho dźěławosći. Protyčka přewjedźenych zarjadowanjow saha wot póstnic a přednoškow přez mejemjetanje a wjesny swjedźeń hač k zmijepušćenju a kermušnej zabawje.
Dźěći a młodostni pokazachu na to mały program. Lóštnemu wustupej přizamkny so přednošk Aleny Hejduškec wo zetkanju swětoweje młodźiny w pólskim Krakowje. Loni rozprawješe nam tu na samsnym městnje Smječkečan Marian Budar wo swojim přebytku w Chile. Na kóncu wopytaštaj nas hišće swjaty Mikławš a swjata Borbora, kotrajž měještaj za kóždeho mały darik sobu.
Přesadźowanje wusadźene
Nowe wuwiće wokoło přichoda Worklečanskeho hosćenca
Worklecy (SN/MWj). Nanuzowane přesadźowanje Worklečanskeho hosćenca „Při kupowym haće“ je na njewěsty čas wusadźene. Tole zhonichu Serbske Nowiny, naprašowace so na Budyskim hamtskim sudnistwje kaž tež pola Ludoweje banki Budyšin.
Po prěnimaj sudniskimaj terminomaj lětsa w juniju a w awgusće bě přichodny za 10. januar 2017 planowany. Kaž z terminoweho přehlada na internetnej stronje www.zvg-portal.de wuchadźa, je tónle termin nětko šmórnjeny. Kaž sudnistwo na naprašowanje SN zdźěli, je Ludowa banka jako wěrićelka jednanje najprjedy raz zastajić dała. Dalše informacije sudnistwo njepodawa.
Tež Budyska Ludowa banka k tomu skerje mjelči a powołuje so na bankowe potajnstwo. Kaž pak rěčnik pjenježneho instituta Andreas Wanitzek rjekny, ma so z nanuzowanym přesadźowanjom Worklečanskeho hosćenca „we wotwidźomnym času“ pokročować.
Towarstwam perspektiwu dać
Łaz (AK/SN). Łazowska gmejna chce towarstwam při Hórnikečanskim jězoru dołhodobnu perspektiwu zmóžnić. Za to ma na bywšich płoninach stanowanišća Z1, hdźež něhdy dnjowi hosćo přebywachu, přichodnje towarstwowy centrum nastać. Z jednym napřećiwnym hłosom je gmejnska rada na swojim zašłym posedźenju wobzamknyła, nadawk za twarski plan přepodać. Zdźěłać ma jón za nimale 50 000 eurow Budyski krajinowy architekturny běrow Ernsta Pansy.
„Runje při Hórnikečanskim jězoru je přez jeho saněrowanje hač do lěta 2021 wjele towarstwow swoju eksistencu a swoje ležownosće zhubiło. Tole dyrbimy jim narunać“, wuzběhny Wolfgang Tietze, nawoda twarskeho a ležownostneho wotrjada Łazowskeje gmejny. Hižo w nowembru 2008 bě so gmejnska rada zasadnje rozsudźiła, twarski plan nastajić dać. „Nětko je wotškódnjenje za infrastrukturu a twarske připrawy zrjadowane. Wuměnjenja za twarski plan su tuž spjelnjene, rozłoži Wolfgang Tietze. Z najnowšim rozsudom radźićelow chce gmejna dalewobstaće towarstwow podpěrać. Twarski plan financuja z dojednanja mjez gmejnu a towaršnosću LMBV.
Z jězora nastanje wočerstwjenišćo
Šibojski jězor ma so za wobydlerjow města Wojerec přichodnje z atraktiwnym wočerstwjenišćom stać. Što maja tam dokładnje předwidźane, su wčera měšćanskim radźićelam rozłožili.
Wojerecy (AK/SN). Na zapadnym pobrjohu Šibojskeho jězora (Scheibesee) chce město Wojerecy płoniny za wočerstwjenje a turizm zaměrnje wotkrywać. Tole podšmórny nawoda twarskeho wotrjada měšćanskeho zarjadnistwa Dietmar Wolf na wčerawšim posedźenju měšćanskeje rady. „Móžachmy mjeztym tak mjenowane dojednanje wo financowanju a wo přewzaću z Łužiskej a srjedźoněmskej towaršnosću hórnistwoweho zarjadnistwa (LMBV) wotzamknyć“, informowaše wón radźićelow. „Za kolesowanski puć z města k jězorej smy nětko za prěni a druhi twarski wotrězk nadawk planowanja přepodali.“ Za dalše twarske wotrězki dyrbja hišće wotewrjene prašenja rozrisać.
