Budyšin (SN). Ze zakónčenjom lětnich prózdnin 8. awgusta zahaji so za šulerjow a wukubłacych nowe šulske lěto. Za šulskich nowačkow, sobujědujcych w busu, železnicy abo tramwajce, to woznamjenja, zo podadźa so po njeznatych pućach k šuli. Tomu so tež wobchadne přede­wzaća kaž wobchadny zwjazk Hornje Łobjo (VVO) přiměrja a poskićeja staršim za tuńšu alternatiwu płaćizny jězdźenkow. Wužiwajo potuńšene tydźenske, měsačne a lětne lisćiki, trjebaja woni potom kartu kupcow. Tajku dóstanu bjezpłatnje pola VVO a dalšich wobchadnych předewzaćow.

Kładu nowe špundowanje

Biskopicy (SN). Wot dźensnišeho hač do pjatka kładu rjemjeslnicy w ambulancy za nuzne pady Biskopičanskeje chorownje nowe špundowanje. Z tym su wězo wobmjezowanja zwjazane. To rěka, zo měli­ so zranjeni w chirurgiskej praksy dr. Lehmann a dr. Viehriga w Biskopicach přizjewić. Zdobom měli so pacienća z chutnymi symptomami tež do Ka­mjen­ske­je chorownje maltezow, do Budy­skeho kaž tež Wojerowskeho klinikuma podać abo nuzoweho abo domjaceho lěkarja za­zwonić.

Wjace njezbožow

Muž so při dźěle wopalił

Wětrow. We Wětrowje je so dźěłaćer wčera dopołdnja při wukonjenju asfaltowych dźěłow zranił. Walca, kotruž 62lětny wodźeše, so na nahłym městnje po­wróći, na čož muž do horceho bitumena padny. Wožahanja dla jeho do chorownje dowjezechu. Lěkar bě z helikopterom k městnu njezboža přilećał.

Kremserowy wóz pomórali

Kulowc. Dotal njeznaći su po zdaću wčera w nocy kremserowy wóz a murju ležownosće w Kulowcu pomórali. Při tym wužiwachu grafitijowu prsykawu. Wěcna škoda wučinja něhdźe 500 eurow. Kriminalna policija za skućićelemi slědźi. Pomóranje pak skerje wobsedźer kremsera a domskeho wotstroni.

Sernjany (SN/mwe). Lětsa sedmy króć su serbscy seniorojo wčera popołdnju w Cyžec hosćencu w Sernjanach škotowali. Na turněrje so tónkróć 29 kartyplacarjow wobdźěli. Najwjace dypkow měješe Pawoł­ Mark z Brěmjenja. Druhi najlěpši běše Křesćan Weclich z Nuknicy a třeći bu Alojs Langa z Konjec.

Hižo wot 1. januara lěta 1995 Jan Macka z Chrósćic tute woblubowane zarjadowanje organizuje. „Ličba wobdźělnikow je lětsa jara dobra. To je přeco něhdźe 30 wuměnkarjow a předrentnarjow“, so wón nad wuspěchom wjeseli. Spočatk lěta sej wón ze wšěmi korčmarjemi terminy dorěči, a kóždy lubowar kartow hižo nětko wě, zo budźe přichodny seniorowy škot 30. awgusta pola Bizoldec w Haslowje.

Za wobdźěłanje ma wokrjes přemało ludźi a pjenjez k dispoziciji

Budyšin (SN/mwe). Zjednorjene noworjadowanske jednanje ležownosćow w Budyskim wokrjesu – konkretnje w kónčinach wokoło Pančic-Kukowa, Ralbic, Prěčec, Porchowa –, kotrež měli poprawom hižo loni zakónčene być, dale traja. To wobkrući Serbskim Nowinam nowinski rěčnik krajnoradneho zarjada Gernot Schweitzer. Dale wón zdźěli, zo we wobłuku noworjadowanja honow tuchwilu 30 jednanjow po zakonju k wurunanju ležownosćow (FlurbG) a něhdźe 70 jedna­njow po ratarskopřiměrjenskim zakonju (LwAnpG) wobdźěłuja. Při tajkej procedurje pak ma krajnoradny zarjad personal a financne resursy jenož we wobmjezowanej měrje k dispoziciji. Dokelž njemóža tak wšitke naležnosće ze samsnej itensitu wobdźěłać, dyrbjachu w krajnoradnym zarjedźe priority po­stajić.